Kòrsou kontra Panama djaluna 6’or pm den Concacaf U-17
GUATELEMA Awe, djaluna 13 di febrüari 2023 pa 6’or pm nos selekshon U-17 lo hunga kontra Panama. Djasabra nos a kai vensí ku skor di 9-0 kontra di Meksiko. E sigiente wega ta djarason kontra selekshon di Panama. Djarason dia 8 di febrüari den oranan di mainta nos selekshon a biaha pa Miami di transito pa sigui rumbo pa Guatamala pa nan partisipashon na e CONCACAF Under-17 Championship. Nos selekshon a yega bon i a train bon pa e promé partido den Stadion Doroteo Guamuch Flores na Guatemala City kontra Meksiko pero a kai vensí ku e skor ariba menshoná.
Despues di nos 3 partidonan di e promé i segundo buèlta, lo tin e partidonan di kuart final i semi final miéntras e gran final lo tuma lugá dia 26 di febrüari 2023. Preparashonnan ta kontinuá pa nos selekshon logra sali viktorioso di nos promé 3 partidonan i sigui den kontienda pa e final di e kampionato aki. FFK ta deseá nos selekshon nashonal kategoria U-17 tur klase di éksito durante nan promé kompromiso den e CONCACAF Under-17 Championship aya na Guatemala.
CAROLINE RODRIGUES DA SILVA I JEAN-MARC SCHOLTZ A REPRESENTÁ KÒRSOU NA E CFU NEXT GENERATION REFEREE COURSE!
E di 2 edishon di e CFU Next Generation Referee Course a tuma lugá di 19-23 di yanüari último na Antigua & Barbuda. Na e okashon aki nos rèfrinan Caroline Rodrigues Da Silva i Jean-Marc Scholtz ta tin e oportunidat pa asistí i representá Kòrsou na e kurso aki.
Meta di e kurso ta pa yuda halsa e nivel di rèfrinan hóben den Karibe ku tin e potensial p’asina nan por subi riba lista di FIFA den un periodo di un pa dos aña.
Esaki, nan ke logra dor di ekipá e rèfrinan aki ku konosementu riba tur área ku ta di importansia pa un rèfri riba lista di FIFA. Durante e kurso a traha riba diferente área manera; liderasgo, reglanan, kòntròl i maneho di wega en general.
E kurso a keda duná pa Dave Meikle (Concacaf refereeing manager), Kelesha Antoine (FIFA & Concacaf Elite fitness instructor), Dianne Ferreira-James (Concacaf Elite Assessor & instructor), Victor Stewart (FIFA & Concacaf instructor & referee Assessor) i Rohan Thobourne (Concacaf fitness instructor). El a keda repartí den e parti teorétiko pero tambe nan a hasi e parti físiko riba tereno.
Un total di 25 partisipante di diferente pais manera Kòrsou (2), Sürnam (3), Trinidad & Tobago (2), St. Kitts & Nevis (2), St. Lucia (2), Barbados (2), Bahamas (1), Antigua (3), Martinique (1), Haiti (1), Cayman Islands (2), Jamaica (1), Repúblika Dominikana (2) i Grenada (2).
Pues un total 14 pais den Karibe a partisipá kaminda kada rèfri i asistente ku a wòrdu invitá ta un hóben prospekto ku den un periodo kòrtiku por subi lista di rèfri FIFA. A skohe e partisipantenan abase di nan prestashon durante e diferente tèst i kursonan pa rèfri ku a tene durante aña i mas ku klaro siguiendo konseho di e departamentu di arbitro di kada pais.
Tantu Caroline komo Jean-Marc ta di opinion ku e kurso a bai hopi bon. E kurso tabata sumamente interesante kaminda nan a haña oportunidat pa siña kosnan nobo i engrandesé nan konosementu pa ku e reglanan di arbitrahe. Aparte di esei tur partisipante ta tin e mesun meta i tabata enfoká pa duna di nan banda i yega na e nivel di mas haltu den arbitrahe.
FFK i su departamentu di arbitrahe sigur ta kontentu ku despues ku nos tin un rèfri riba lista, nos tin mas prospekto hóben ku tambe pronto lo figurá riba lista di FIFA!
