Kòrsou ta gana Meksiko 2-1 i pasa pa final internashonal di Little League world Series
WILLIAMSPORT – Jay-Dlynn Wiel a picha wega kompletu permitiendo un hit ku tabata un homerun, pa Kòrsou gana Mèksiko ku skor di 2 pa 1 i klasifiká pa final Internashonal di Beisbòl Little League World Series. Kòrsou a nota 2 kareda den bòm di di 5 ining pa bòltu e wega di 0-1 pa 2-1 pa gana e partido.
Den di 6 inning Mèksiko ta embasá e promé batiadó, pero 3 out sigi ta kai pa e wega terminá 2-1 pa Kòrsou Ku e viktoria aki Kòrsou lo hunga e wega final internashonal djasabra 27 di ougùstùs 12.30 kontra di Chinese Taipei den representashon di Asia Pacific.
Kòrsou ku tin rekòrt di 5-1 ta representá Karibe i Asia Pacific tin rekòrt di 3-0. Pa loke ta trata e parti di USA South East lo enfrentá West djasabra 3.30. Ganadónan lo hunga e gran final di World Series djadumingu 3’or pm mientras e pèrdèdónan lo hunga 10’or am djadumingu.
NUMERITONAN
Kòrsou a nota 2 kareda bati 4 hit i hunga sin eror. Jay-Dlynn Wiel tabata e picher ganadó. Wiel a bati di 2-1, Reangelo de Caster a ba ti di 1-1. Jaydion Louisa di 2-1 i Davey-Jay Rijke di 3-1.
Mèksiko a skor na un okashon, bati 1 hit i hasi 1 eror. David Zarate tabata e picher pèrdèró i ela bati e úniko hit pa Mèksiko den 2 turno. E hit di Zarate tabata un homerun.
WEGA KORSOU NICARAGUA (DJARASON)
Kòrsou ta dal Nicaragua 7 pa 2 i pasa pa semi-final Internashonal
WILLEMSTAD- Davey Jay Rijke a tira tremendísimo ku 15 ponche pa Kòrsou gana Nicaragua ku skor di 7 pa 2 i klasifiká pa semi-final di e sekshon internashonal di Little League World Series na Williamsport. Nos picher estrea Davey Jay Rijke no por tira mas den e World Series aki.
E mester sosegá kuater dia a base di e lansamentunan ku ela hasi i ta eligibel pa tira djaluna na momentu ku ya e World Series a terminá. Kòrsou den representashon di Caribbean a nota 1 kareda den promé inning, 3 den di dos inning i 2 den di 4 ining pa habri e wega for di otro. Ku e picheo di Davey Jay Rijke riba montíkulo tur kos tabata indiká ku Nicaragua no tin niun chèns. Davey Jay Rijke a tira 6 inning permití 4 hit, 2 kareda di kual unu ta limpi i tira 15 ponche. Davey Rijke a bati di 4-3 ku 1 RBI, e mihó na bate pa Kòrsou . Jay-Dlynn Wiel a bati di 2-2 ku 2 RBI.
NUMERITONAN
Kòrsou a skor 7 kareda, dal 7 hit i hunga sin eror. Davey Jay Rijke a gana i e mes a bati di 4-3. Jay-Dlynn Wiel di 2-2, Emery Hanse a bati di 1-1. Nicaragua a skor na 2 okashon, konektá 4 hit i hasi 3 eror. E picher habridó Gonzalo Lopez tabata e picher pèrdèdó. Luis Bravo a bati di 1-1. Luis Garcia a konektá un homerun.
