Kòrsou ta gana Saint Martin 5-0 den Concacaf Nations League
WILLEMSTAD- Selekshon di Kòrsou di futbòl ku un bon aktuashon ta gana Saint Martin 5-0 djabièrnè 15 di novèmber den Stadion Ergilio Hato. Sin duda e estrea di e wega tabata Jearl Margaritha di 24 aña ku a nota 4 di e sinku golnan. Na di 24, 34, 54 i 80 minüt. E otro gol tabata pe medio di pinalti di Juninho Bacuna. Bon publiko presente pa mira e wega.
E hungadó Belony Dumas di Saint Martin a risibí karchi kòra despues ku ela kousa e pinalti ku Juninho a nota gol. Kòrsou a start ku Room, van Eijma, Gaari, Floranus, Comenencia, Brenet, Leandro Bacuna, Kenji Gore, Jearl Margarita, Juninho Bacuna i Jeremy Antonisse. Kòrsou tabatin 8 tiru riba gol i ekipo Saint Martin tabatin 16 tiru riba gol. Kòrsou a dominá leve den posishon di bala ku 54% kontra 46% di Saint Martin.
Ku e viktoria Kòrsou a bira number 1 di Liga B, grupo B di Concacaf Nations League ku 10 punto di 5 wega. Sint Lucia a pèrdè 4-0 kontra Grenada djabièrnè atardi den Stadion Ergilio Hato i a kai na di dos lugá ku 9 punto den 5 wega i ta pèrdè nan di dos wega sigí. Standing te ku weganan di djabièrnè ta Kòrsou 10 punto, Sint Lucia 9 punto, Grenada 7 punto i Saint Martin 3 punto. Kòrsou ku ta den bon posishon awor si pa klasifiká pa Grupo A, ta topa ku Grenada djaluna awor 4’or den Stadion Ergilio Hato.
