Kòrsou ta debutá ku triunfo den beisbòl
SALVADOR---Tabata djasabra 24 yüni 2023, riba e promé fecha di e deporte di beisbòl den Weganan Sentro Amerikano i di Karibe na El Salvador, ku Kòrsou a logra promé triunfo.
Esaki den wega ku nos ekipo nashonal a gana di e ekipo di kas.
E wega a hunga den parke Saturnino 'Nino' Bengoa, komo e di 4 wega di dia.
Despues di a kai atras den bòm di promé entrada 0-2, Kòrsou ta reakshoná pa finalmente gana 12-4.
Nos ekipo a anotá na 12 okashon ku atake di 14 hit i a hasi 1 eror.
Temesh Lourens a habri i tira 5 entrada kompletu pa bai ku e triunfo. El a risibí relevo di Sedley Karel i Swindley Lint, kende kada un a tira un entrada.
El Salvador a anotá 4 kareda ku 9 hit i a hasi 7 eror.
Kòrsou su di 2 wega ta djadumingu, 25 yüni 2023, ora ku nan topa Cuba pa 3'or atardi.
Cuba den nan promé wega, riba e fecha di apertura a pèrdè 4-0 kontra Mexico.
Miéntras ku e otro 2 weganan a finalisá ku Venezuela derotando Puerto Rico ku skor pèrtá di 4-3 i Repúblika Dominikana a gana Nicaragua 6-5, den wega ku a bai èkstra ining.
Despues di e wega di Kòrsou, ku tabata e último wega di e promé dia di torneo, bastante tabata e fanatikonan ku a para pafó warda entre otro Andrelton Simmons, pa por a saka pòtrèt kuné.
Konhuntamente algun foto relashoná ku e promé kompromiso di nos selekshon, ku ta konta ku maneho di manager Carlos Pineda.
Kòrsou ta sufri derota den beisbòl kontra Cuba
WILLEMSTAD---Tabata djadumingu den oranan di atardi na El Salvador, ku e selekshon di beisbòl di Kòrsou, a hunga nan di 2 wega bálido pa e kompetensia Sentro Amerikano i di Karibe.
Esaki tambe tabata wega ku a hunga den parke Saturnino ‘Nino’ Bengoa, unda ku nos ekipo nashonal tabata den akshon enfrentando e selekshon di Cuba. Tabata enkuentro, unda ku Kòrsou ta keda kòrtiku, sufriendo derota ku skor di 4-2.
E ekipo ganadó a anotá na 4 okashon ku 8 hit i a hunga sin kometé eror. Miéntras ku Kòrsou a anotá na 2 okashon, ku un di e karedanan for di bataso di kuater skina di Rayshendel Michel, konektando 6 hit i a hasi 3 eror.
Ku e resultado aki, Kòrsou tin un triunfo i un derota i lo bolbe mira akshon djaluna, dia 26 yüni 2023, pa 3’or di atardi, enfrentando e selekshon di Mexico.
Konhuntamente algun foto di e partido kontra Cuba.
