Kòrsou ta kai vensi ku skor di 2-1 na Panama
PANAMA CITY – Kòrsou a logra hinka un gol i a pèrdè ku skor di 2-1 kontra e selekshon di Panama. E wega a tuma lugá djasabra 12 di yüni den Estadio Rod Carew na Panama. E gol di Kòrsou a keda anotá pa Reangelo Janga na di 86 minüt. E tereno tabata pisá debí ku un palu di awa a kai durante dia djasabra promé ku e wega start.
Kòrsou tin bon chèns pa klasifiká pa e sigiente buelta hungando djamars awor. Un viktoria di 1-0 djamars ta nifiká ku e selekshon di Kòrsou lo pasa pa e buelta final di 8 ekipo inkluyendo grandinan manera USA, Meksiko, Honduras, Costa Rica i Jamaica. Pa loke ta e wega mester bisa ku Panama a dominá e akshonnan riba tereno i tabata muchu mas peligroso ku Kòrsou. E ekipo Kòrsou no tabata konvinsente den medio kampo tampoko den atake.
Panama tabata yega relatívamente fásil na rant di area penal di Kòrsou i na algún okashon hopi serka di gol. Golnan di Panama a keda anotá pa Alberto Quintero (56 minüt) i Cecilia Waterman (77 minüt).
Wega na Kòrsou ta djamars awor 7’or i mester di un viktoria di 1-0 pa sigi pa buelta di 8.
