Kòrsou ta pèrdè kontra Venezuela i lo hunga djarason 2’or vs Republica Dominicana
CARACAS – Kòrsou despues di tabata dilanti 6-2 te den di 6 inning ta pèrdè e ventaha pa despues kai vensí ku skor di 8-6 kontra Venezuela, djamars anochi den Estadio La Rinconada na Caracas den kontinuashon di Serie del Caribe. Relevistanan di e ekipo Kòrsou no por a hasi e trabou despues ku e habridó Cody Mincey a tira 6 inning bon. Ku e derota aki e situashon ta bira difisil pa Kòrsou ku mester gana di Republica Dominicana i warda resultado di e otro weganan pa wak si tin un chèns chiki pa klasifiká.
E wega entre Kòrsou i Republica Domincana ta djarason pa 2’or di mèrdia. E bateo di Kòrsou a funshoná bon djamars i nos a bati 12 hit i hunga sin eror. Venezuela a bati 11 hit i kometé 1 eror. Picher ganadó pa Venezuela tabata Hernandez i Vasquez a bati di 3-2. Tabata e batiadó slengu Vasquez ku a dal e doblete ku dos out den di 8 inning pa manda Venezuela ariba ku skor di 8-6. Ventaha ku Venezuela a wanta den e dos sigiente chènsnan ku Kòrsou a haña pa bati. Pa Kòrsou Edgar Garcia tabata e picher pèrdèdó. Andrelton Simmons a bati di 5-3, Juremi Profar i Darren Seferina di 4-2.
