KU E SELEKSHON AKI ‘PANTERA NEGRA’ LO YEGA MUNDIAL 2026

‍
Ora bo ke mik riba lo máksimo, mester soña grandi. Kòrsou tin potensial pa yega e próksimo mundial. Refuerso mester. Ku e grupo aktual nos no ta bai yega. Riba papel nos por traha un selekshon ku por kompetí pa un di e tres puestonan dirèkt of esun via play-off. E sigiente hungadónan por hunga un papel importante den e kareda di CONCACAF pa 2026.

Selekshon di Kòrsou na Turkia.

‍

Defensa
Den gol, Eloy Room di 35 aña ku ta den kondisihon ahinda hungando Eredivisie na Ulanda ku Vitessse. E ta den e 5 mihónan den CONCACAF. Den e buelta klasifikatorio aki e ta e di dos mihó portero tras di Kaylor Navas di Costa Rica.
Defensa sentral pia drechi Riechedly Bazoer (AZ) i defensa sentral pia robes Armando Obispo (PSV). Komo defensa lateral tin 4 kandidato. Joshua Brenet (sin ekipo), Sherel Floranus (Almere City), Tommy St. Jago (Willem II) i Shurandy Sambo (PSV). No tin defensa lateral pia slengu di nivel, tur ta pia drechi. Brenet ku Floranus sa hunga regular defensa lateral na banda robes.

Dick Advocaat, DT di selekshon di Kòrsou.

Normalmente Brenet riba ala robes i Floranus rèksbèk, pero Brenet no tin ekipo despues ku Twente a kibra relashon kune pa problema ku hustisia i mi no sa si Advocaat lo selekté. Na Ulanda a bira difísil pe haña ekipo. Den e kaso ey St. Jago rèksbèk i Floranus na banda robes. St. Jago por hunga defensa sentral tambe si ke postula Bazoer den bolante. Sambo ta un talento di PSV, pero no ta hungando regular. Si e ta realista e ta bin aden, paso e chèns ku elo yega selekshon Ulandes ta mínimo, ku entre otro Dumfries (Inter), Frimpong (Leverkusen), Geertruida (Feyenoord), Rensch (Ajax) i su kompañero di ekipo Teze den rij prome kune.

Akshon durante wega.

Bolante
Mei mei di tereno Godfried Roemeratoe (RKC) bolante defensivo i Juninho Bacuna (Birmingham). Kevin Felida (RKC) i Leandro Bacuna (Groningen) ta duna e dosnan aki kompetensia riba nan puesto.  Roemeratoe ta mas trankil i ku mihó téknika. Felida ta kore mas ku mas velosidat. Leandro por hunga tur kaminda den defensa i bolante i tin eksperensia. Riba ala tin dos kandidato serio ku kisas ahinda mag soña ku ‘Oranje’. Tahith Chong (Luton Town) i Sontje Hansen (NEC). Tahith despues di un periodo difisil ta presta den Liga Premier i ta anotá regular.

Juninho Bacuna regular den selekshon.

‍

Ulanda no tin masha kalidat riba ala, ku eksepshon di Noa Lang (PSV) i Donyell Malen (Dortmund). Bergwijn ku Berghuis tur dos Ajax, otro for di Tahith no a demostra nivel den Liga Premier. Si Tahith sigui krese e por wordu invita pa Ulanda. Laga nos spera ku su tata Jo, por konbense pa skohe pa nos. Pa Sontje kos ta mas difísil. E ta hunga den NEC i no ta masha kla ki nivel e lo yega den futuro. Su chèns ku Ulanda ta minimal. Ku nan dos riba ala, un bèki ta awero. Nan ta rapido ku bon téknika riba velosidat. Tin mas potensial riba ala. Ar’jany Martha (Ajax), Xander Severina (Partizan Belgrado), Jearl Margaritha (Sabah) i Kenji Gorré (Umm Salal). Nan no tin nivel di Chong ku Hansen (ahinda), pero tin nivel akseptabel.

Bon salida di nos selekshon na Turkia.

Sentro Delantero
Aki no tin hopi opshon, pero esnan ku tin, tin e eksperensia i talento basiko. Jürgen Locadia (Amorebieta) i Richairo Živković (Lion City Sailors) tabata talento grandi na hubentud. Niun di dos no a realisa nan potensial i awor ta hunga riba nivel mas abow. Locadia riba di dos nivel na Spaña i Zivkovic na Singapore,ku no ta un pais futbolistiko. Nan tur dos a demostra si ku nan por goliá i pa CONCACAF sigur tin e nivel. Nigel Robertha ta sin ekipo despues di DC United. Si e haña klup ta bale la pena trese aden.

Vários kambio den e selekshon aki. Esaki ta selekshon di mas ku 4 aña pasá.

Banki
E banki ta fuerte ku St. Jago, Sambo, Martha, Jurien Gaari i Felida (ambos RKC), Leandro Bacuna, Severina i Margaritha. Giovanni Troupée ta hoben ahinda ku hopi wega den Eredivisie i ta rekuperando den TOP Oss di leshon largu. Si e rekupera e mester ta aden. Si Roshon van Eijma (TOP Oss) sigui krese, e tambe por bai. E kipernan Doornbusch (Dordrecht) i Fancito (Jong PSV) mester vigila nan desaroyo. Nan nivel no ta esun di Room.

Line up di Kòrsou aya na Turkia.

Talento
Tin mas talento hoben. E defensanan Mimeirhel Benita (Feyenoord/Excelsior), Nazjir Held (Jong FC Utrecht) i Daijiro Chirino (Castellón) i e atakantenan riba ala Jeremy Antonisse (Moreirense), Nigel Thomas (Viborg) i Ro-Zangelo Daal (Jong AZ). Tin futuro pa ‘Pantera Negra’, basta nos hasi kosnan korekto.

Stadion mester kuminsá yena bèk. Fanátikonan yega.

‍