WILLEMSTAD - Kampionato 2022 di Curacao Little League Sòftbòl ta dediká na sra. Isonette Polonius. Djabièrnè 4 di mart 2022 tabatin un tremendo apertura di e kampionato di Liga Soraida Juliana kaminda a honra Isonette Polonius. Nos tin e CV di Isonette Polonius ku a studia huntu ku hasi deporte den College i tin títulonan di Bachelor den Bussiness Administration (1999) i Master den International Finance na 2001.
Isonette Evarista Polonius, mihó konosi komo Iso, a nasé dia 1 April 1976 na Korsou. Iso ta mucha di pariba, kuna di e barrio di Seru Grandi/Montaña y su pashon pa deporte ta bini di su mama Altagracia Polonius q.e.p.d. Su mama tabata hasi deporte y tabata bai tur kaminda ku Iso (su uniko yu), vooral hopi rond di kancha di vòlibòl.
For di su 6 aña, Iso a kuminsá eksplorá ku vários deporte pero mayoria tabata pa un tempu kortiku. Su mama semper a apoyé ku kada aktividat nobo ku e tabata kier a purba manera balèt, atletismo, futbòl, vòlibòl, kickboxing y tennis. Huntu ku su primunan Isenia e tabata hunga baseball den kurá y kibra basta bentana di nan kas.
1988: Korsou a “host” kampionato Centro Americano y del Caribe di sòftbòl. E weganan aki a ser transmití na televishon kaminda por a mira nos Selekshon Nashonal den akshon. E kampionato internashonal aki a “trigger” kuriosidat di Iso pa praktiká e deporte di sòftbòl…sobrá ta historia!
Karera komo sòftbòlista:
Iso su karera di sòftbòl a kuminsa na 1988 ku su 12 anja den e ekipo di The Rangers den kategoria Stimulans y durante di 3 anja a promové bai B-klasse i A-klasse, e tempu ey no tabata tin Little League Softball.
1990: Na edat di 14 anja, Iso a forma parti di Selekshon Hubenil ku a bai Puerto Rico enkabesá pa Soraida Juliana y Ron Steward…Iso tabata e hungador di mas hoben di e selekshon.
1992-1993: Na edat di 16 anja Iso a kuminsa ekselá den e deporte den su totalidat
-Iso a ser invitá den Pre-Selekshon di Antias Hulandes na edat di 16 aña
-Durante e mesun temporada ey, Iso a bira “Umpire” ofisial y skorer pa Little League baseball Iso tabata skor weganan di sòftbòl tambe.
-Tambe tabata e temporada ku Iso a promové pa klase-AA komo miembro di e ekipo di Cardenales
1994: Na edat di 18 anja, Iso a eksperensiá su prome Kampionato Mundial di Sòftbòl komo miembro di Selekshon di Antias Hulandes na Canada. Durante di e kampionato Mundial aki, Iso a dal su prome Homerun internashonal kibrando un “No hit-No run” di e pitcher kontrikante. Entre 1992 pa 1998, Iso a forma parti di various Selekshon Nashonal representando Antiyas Hulandes den diferente kampionato nan internashonal hungando diferente posishon.
1996-1999: Na edat di 20 añ, Iso a hanja e oportunidat di oro pa eksprensia bida komo un Studiante-Atleta na Merka. Coach Sue Manahan tabata na Korsou ku un ekipo di sòftbòl Merikano y a mira Iso den akshon durante un partido di fogeo. Esey tabata inisio di e proseso largu pero eksitoso pa a logra forma parti di e ekipo di sòftbòl di East Carolina University na Greenville, North Carolina.
Entre 1996 pa 1999, Iso a hunga “Divishon I” sòftbòl ku ta e nivel di más haltu di “College” na Merka. Tabata 3 anja di hopi sakrifisio tantu den klas komo riba tereno. Durante di e temporada aki, Iso a sa di logra hopi eksito individual y tambe ku su team, saliendo kampion di Big South Conference na 1999 y kompetí den e torneo Regional di NCAA na Arizona.
Algun di e premio nan mas renombrá di Iso komo Studiante-Atleta na Merka:
1997: Big South Conference→ Scholar Athlete of the year, All-Academic Teams, All-Conference Team@ 2B, All Tournament Teams
1998: Big South Conference→ MVP, Scholar Athlete of the year, All-Academic Teams, All-Conference Team@ 3B, All Tournament Teams
National Honors → NFCA-All Region, CoSIDA-Academic All America & All-District, NFCA-All America 2nd team
1999: Big South Conference→ MVP, Scholar Athlete of the year, All-Academic Teams, All-Conference Team@ 3B, All Decade Team, Top-10 den kasi tur kategoria ofensivo
National Honors → NFCA-All Region, GTE Academic All-American-of-the-Year, NFCA-All America 3rd Team
Liga Profesional Merikano → Iso tabata e Promé eskoho den e 1999 Draft di Women’s Pro Softball League pa e ekipo di Durham Dragons..aunke ku e proseso aki no a ser finalisá.
E karera di Iso komo Studiante-Atleta a termina ku entrada den Salon di Fama Atletico di East Carolina University na anja 2009. Iso ta e promé sòftbòlista di ECU ku a drenta Salon di Fama.
1999-2001: Komo profesional, Iso a hunga sòftbòl durante Kampionato Nashonal di Hapon den e ekipo Fukuyuso Ogaki di Nagoya.
2011-2013: Bibando na Hulanda, Iso a forma parti di ekipo Centrals den Hoofdklasse y tambe Eurostars den Silver League logrando MVP di e ekipo na 2013.
Ketu bai Iso ta aktivo komo sòftbòlista militando den ekiponan di liganan 35+ di slowpitch.
Karera komo Dirigente Tekniko:
2002-2006: Na edat di 26 anja, Iso a drenta e mundu di Coaching dirigiendo e ekipo di sòftbòl slowpitch 35+ The Old Young Ones. Iso tabata mas hoben ku e hungadornan di e ekipo, pero a sa di manehá e ekipo ku éksito birando kampion pa 3 anja konsekutivo.
2010: Un kombinashon di forsa entre Aruba y Korsou a resultá den e projekto "Rising Stars" kaminda ku un total di 11 sòftbòlista hoben a bai Merka pa hasi un try-out pa drenta “College”. E dirigentenan prinsipal tabata
Isonette Polonius di Korsou y Carmelita Haynes di Aruba. E proyekto aki tabata tin éksito sigur, enbista ku 50% di e hoben nan ku tambe tabata forma parti di Little League sòftbòl a logra nan sonjo komo Studiante- Atleta sea na Merka òf na Puerto Rico.
2013: Iso a emigrá pa Hulanda pa un period di 3 anja entre 2010-2013. Estando na Hulanda, Iso a aseptá e reto di
bira Dirigente tekniko di e ekipo Cadetten di Euro Stars na Rotterdam. Cadetten ta muchanan entre 11-15 anja. Ku Iso na kabes, Cadetten Euro Stars a bira Kampion Nashonal di Hulanda den kategoria Aspiranten, tambe Iso a gana Euro Stars Coach Award pa e logra aki.
2018-2019: Iso semper a keda agradesido na tur ku di un of otro manera a aportá na su karera di sòftbòl y kier a duna bek na e mundu di sòftbòl di un manera boluntario. Huntu ku 10 kolega di sòftbòl ku a kere den e vishon, Iso a kuminsa ku e proyekto SQUAT (Super Qualified Unit- Assistant Trainers) dunando training i klinika na e hobenan di tur team afiliá na Little League Sòftbòl. Iso, semper a keda yuda boluntariamente na kualke proyekto di sòftbòl pa hubentud y fastpitch adulto, entre otro komo Head trainer di e Selekshon di Junior League ku a bira Kampion Latino Amerikano na 2019.
2021-2022: Aktualmente huntu ku algun coach ku tin e mesun dedikashon, Iso a kuminsa ku un projekto ku yama CEFA (Curacao Excellence Fastpitch Academy), ku e meta pa duna un ayudo èkstra na e hoben ku un dia tambe lo ke bira un Studiante-Atleta of ke hunga sòftbòl riba nivel internashonal tambe.
Tambe Iso a join e plataforma soshal GameOn! via di Facebook, pa trese programa nan informativo pa ku e deporte di sòftbòl via di e programa Den Dugout ku Iso!
Pues sea ta riba tereno of via di medianan social, Iso su meta ta pa kontribuí na e desaroyo di nos hubentud prinsipalmente hasiendo uso di su talento den e area di sòftbòl.
