Kurso básiko pa umpire pa Little League di spònser pa RBC a start
WILLEMSTAD – Djabièrnè, 31 di yüli 2020, na sede di FFK na Brievengat, tabatin apertura di un kurso básiko pa umpire di Little League di spònser pa RBC Royal Bank i organisá pa Curacao Little League Foundation. Na e apertura ofishal sr. Sharier Dorand di RBC Royal Bank a dirigí palabra den presensia di e futuro umpire- i e instruktornan.
District Administrator Urny Floran a hiba palabra i na nòmber di e instruktornan a hiba palabra Sendley Martina. Sharier Dorand di RBC a splika ku RBC huntu ku Curacao Little League Foundation a adaptá henter e programa di 2020 i a bini ku proyektonan kreativo i di balor pa kontinuashon di Little League den 2020. E promé proyekto e aña aki ta e kurso di básiko di umpire aki ku lo dura 3 dia, ku training duná dor di umpirenan ku ya tin eksperensia di dunamentu di e kurso menshoná. Na final di e kurso e umpirenan lo risibí un sertifikado.
RBC i Curacao Little League Foundation manera semper ta pone hopi énfasis riba formashon di e hoben. Den e kaso aki a bini ku un novum na Kòrsou kaminda for di edat hóben (13 aña i mas ariba) ta forma e umpirenan p’asina nan yuda engrandesé e Little League i despues den e beisbòl engeneral ku arbitrahe. RBC den su afan pa yuda forma Hubentut komo nos futuro di mayan ta sigui spònser Beisbòl Little League. RBC ta sumamente orguyoso di ta un patrosinadó prinsipal di Little League pa 20 aña konsekutivo, yudando mas ku 1300 hóben ku ta praktikando e deporte Beisbòl. E filosofía di Little League ta kuadra ku e filosofía di RBC, esta formashon di hóbennan ku ta e pilánan di desaroyo di Kòrsou. Eksito na tur e 25 umpirenan ku a inskribí.
