Lo Celestina un dje grandinan den coaching di Little League
WILLEMSTAD- Michelangelo ‘Lo’ Celestina na aña 2019 tabata manager di e selekshon di Little League ku a bira kampion Internashonal i supkampion di Mundu na Williamsport. E selekshon di Liga Pabou Little a gana Liga Pariba den play-off i bira kampion di Karibe di Beisbòl Little League. Lo tin un trayektoria hopi largu komo coach i manager di Beisbòl Little League i a bai Mundial na Williamsport na sigur 5 okashon. Extra Inning a tene un entrevista ku Lo Celestina.
LO CELESTINA
Michelangelo Celestina a nase na Kòrsou dia 23 di ougùstùs 1976 i ta biba na Telamonstrat Vredenberg. Lo ta biba ku Osailine Benito i tin dos yu muhe, Cadane i Mikaela Celestina.
“For di ku mi 6 aña mi a kuminsá praktiká e deporte di Beisbòl ku mi tata na kas. Ku mi 9 aña mi a kuminsá trein serka Aquiles ‘Shon Ki’ Nicasia (QEPD). Mi a hunga Little League i Senior League serka Shon Ki. E tempu ei no ta tin Minor, Intermediate ni Junior League. Sali ta sali Little bai Senior League mesora.
Temporada aki na aña 1987 mi a bai St Louis ku e tim di Marchena ku Wim Van Vark na kabes di delegashon. Na aña 1988 mi a wòrdu selektá pa bai ku un selekshon formá entre Liga Pabou i Liga Pariba pa representá Kòrsou na Hapon. Den e tim aki tabatin entre otro e hungadónan, Andruw Jones, Franklin Confesor, Ivanon Coffie, Jefferdion Polonius, Derick Isenia, Rodney Michel i Willy Reinita. Frank Curiel komo manager i Michael Victoria komo coach. Na aña 1989 mi a bai ku selekshon di Little League Mexico ku Shon Ki komo Manager i Ron Stewart komo coach.
Den selekshon di Senior mi a partisipá 2 biaha. Mi promé aña nos a bai Yabucoa ku Joe Peters (QEPD) komo manager. I mi último aña den Senior nos a bai Aruba i Shon Ki Nicasia komo manager. Ora mi a kaba ku Senior mi a bai hunga Hubenil den e ekipo di Santa Maria Pirates. Na aña 1995 nos selekshon di Hubenil a bai partisipá na Weganan di Reino na Aruba kual nos a sali kampion. Mompy Van Gurp tabata manager di nos selekshon. Mi a keda ku Santa Maria Pirates i subi AA ku Santa Maria i hunga 3 aña .
Despues mi a bai Royal Scorpions pa 6 aña i sali kampion ku nan na aña 2002 i tambe Kampion di Reino na Sint Maarten. Despues di mi 6 añanan ku Scorpions mi a bai djoin Groot Kwartier Stars i hunga mi lastu 3 añanan den AA pa motibu di leshon.
Na aña 1998 nos selekshon di AA a partisipá na Juegos Centro Americano y del Caribe na Maracaibo, Venezuela. Mi ta kòrda ku mi a yega Kòrsou for di Puerto Rico ku selekshon di Little League pa sigiente dia trempan mi a bai topa e tim na Venezuela.
Ora mi a kaba ku Senior League ku mi 15 aña mi a kuminsá yuda Shon Ki ku e mucha nobonan, siñanan fangu pa despues mi a kuminsá coachnan durante weganan di Vruminga. Despues ku Shon Ki a mira mi madures pa ta un manager ela hasimi manager i ata mi aki te awe ta yuda e muchanan ku e deporte di Beisbòl.
Tabatin 2 pa 3 aña ku mi a keda’fó pa motibu di nasementu di mi promé yu. Despues ku Shon Ki a fayesé i mi a wòrdu aserká pa Luigi Sille pa yuda e organisashon bèk. E profeshonalnan i èks profeshonalnan ku mi a coach ta Jair Jurrjens, Hainley Statia, Curt Smith, Dashenko Ricardo, Andrelton Simmons, Didi Gregorius, Kenley Jansen, Ardley Jansen, Jurickson Profar, Juremi Profar i Sherman Lacrus.
Paisnan ku mi a bishitá ku selekshonnan di Little ta Puerto Rico, Aruba, St Croix, Bahamas i Antigua.
Mi a bai un aña (1997) tambe komo coach di Senior League huntu ku Purcey Lebacks. E aña aki Vernon Isabella tabata hungadó di selekshon. Komo manager di Little League mi a bai 3 biaha. E promé biaha ta na aña 2006 dia Vernon a haña aksidente di owto. Na 2015 ku nos selekshon a pèrdè den semi-final kontra Sto Domingo i na 2019 ku nos a sali kampion internashonal i supkampion di Mundu.
I mester bisa ku aña 2019 Kòrsou ta e úniko selekshon na Mundu ku a gana Korea i Hapon den e mesun torneo.
Komo coach mi a bai Williamsport na añanan 2003, 2004, 2005, 2007 i 2008.
Na aña 2004 nos a bira kampion di mundo i na anja 2005 kampion internashonal i supkampion di mundu. Komo Scout mi a haña oferta i tambe pa fungi komo agente, pero mi ta preferá ora mi ta sinti mi mes ku tin e tempu nesesario, pa por tuma e ofertanan aki.
Mensahe ku mi por duna tur otro coachnan ta, ku mester tin pasenshi i dediká hopi nan nos muchanan pa por kosechá éksito. Purba na bai tur klinikanan ku tin pa coach, pasobra ta tur aña tin kosnan nobo i yuda e mucha tambe den su desaroyo pafó di vèlt,” Lo Celestina a terminá nos entrevista.
