Mairoshendrick Martinus ta firma profeshonal ku organisashon Los Angeles Dodgers
WILLEMSTAD- Djasabra 15 di yanüari 2022, e prospekto shòrtstòp Yu di Kòrsou, Mairoshendrick Martinus a firma pa hunga Beisbòl profeshonal ku e organisashon Los Angeles Dodgers. E firmamentu a tuma lugá na República Dominicana (Santo Domingo, na Dodgers Camp Las Palmas) den presensia di su mama Anouska ‘Popi’ Mutueel i hefenan di scouting di Los Angeles Dodgers.
Despues di algún ora e tata Mairon Martinus mester a firma na Kòrsou na ofisina di notario Alexander. Los Angeles Dodgers, via skout Lando Chirino tin algún aña ku bista riba Mairoshendrick ku tur hende ta yama Mairo. Ofishalmente Dodgers ta yama Mairoshendrick Mairo manera su mayor i su amigunan ta yamé.
Mairoshendrick a nase 3 di febrüari 2005 i ta bai kumpli 17 aña. For di chikitu Mairo tabata destaká pa su poder na bate i tremendo brasa. Ela hunga varios posishon inkluyendo picher i kècher. Mairo a destaká for di Minor League i a forma parti di tur selekshon di for di Minor te ku Senior. Mairo Martinus for di 2015 ta den e organisashon Sint Michiel Sharks.
Dodgers a firma 30 prospekto inkluyendo Samuel Muñoz ku ta rankiá number 7 den MLB top 50 prospektonan. Tambe Accimia Morales number 37. Dodgers ta konsiderá Mairo Martinus e top infielder di Kòrsou for di tempu di Ozzie Albies. Roman Barinas direktor di international scouting i Ismael Cruz ku ta direktor di scouting Latino Americano tabata presente. Lando Chirino skout di Korsou pa motibunan familiar no por tabata presente.
