Marlins ta dal Flamboyan 10-0 den Liga 50 i wega number 2 di final Beisbòl Dòbel A awenochi
WILLEMSTAD- Marlins ku viktoria fásil ku skor di 10-0 riba Flamboyan ta keda na promé lugá den Liga 50. Marlins a logra nan di 12 wega sigí ganá i lo topa ku ekipo Jaws djasabra awor. Ekipo Jaws tin 8 wega sigí ganá. Ultimo wega ku Marlins a pèrdè tabata kontra Jaws den luna di yüni. E picher Gilbert ‘Gibi’ Henrietta tabata hermétiko pa ekipo Marlins nòkout Flamboyan 10-0. Pa loke ta trata e otro weganan di djasabra último, Ban Serio a gana di Lions ku skor di 8 pa 4. Artemisia a dal Sluggers 16-11 i Baranka Sharks a derotá Pitufos ku skor pèrtá 9-8. Standing up to date di Liga 50, Marlins 13-2, Jaws 11-3, Pitufos 10-5, Ban Serio 9-5, Baranka/Sharks 9-7, Flamboyan/Gamers 7-8, Sluggers 6-9, Catpower 4-10, Artemisia 4-10 i Lions 1-15. Weganan pa djasabra benidero ta 10.00 Baranka/Sharks vs Artemisia, 12.00 Marlins – Jaws, Ban Serio – Catpower, 16.00 Sluggers - Flamboyan.
Santa Maria Pirates vs Royal Scorpions awe djarason 25 di sèptèmber
Awe 25 di sèptèmber anochi 8'or den Tio Daou Ballpark Beisbol Dobel A ku wega number 2 entre Santa Maria PIrates i Royal Scorpions. Santa Maria Pirates a gana wega number 1 ku skor di 11-10 den Extra Inning. Awe ta refuerso di Aruba/College USA, Nkosi Didder pa Royal Scorpions i e refuerso (draft) Jordan Lucas pa Santa Maria Pirates.
Quality Stars ku viktoria fásil riba Santa Rosa Memories den Beisbòl Veterano
WILLEMSTAD – Den e wega ku mester a bira e kandela di wikènt a bira un viktoria fásil pa Quality Stars ku skor di 10-3. Quality Stars a nota 3 kareda den promé inning i despues den di dos inning pa despues bin gana fásil 10 pa 3. E wega a tuma lugá djasabra na Vi Jansen Ballpark. E estelar di Quality Stars Farley Ignacio-Kip a kombiná ku Xaviero Avastia pa bira e picher ganadó. Leory Antonia, Sornaley Tomsjansen i Rydell Isabella a bati di dos hit pa Quality Stars. Den otro wega Jandoret Raiders a dal Yesterday 15-4 ku picheo kombina di Rylan ‘Tutu’ Capella i Deron Clara. Djadumingu ekipo Marlins a gana Otrabanda 8-7, Santa Maria Pirates a nòkout Broncos 11-0. Irving ’Skippy’ Sambo i Amador Nita a picha pa ekipo Santa Maria. Den wega di Liga 50 Jandoret a gana Santa Rosa Royals 8-6. Mayron Wijman a bati di 3-3 i Rylan Capella tabata e picher ganadó. Santa Rosa Royals tabata invikto promé ku e wega di 50+ aki.
MAS INFORMASHON DI BEISBÒL I SÒFTBÒL
Fanátikonan di Deporte Kòrsou, bon tardi. Djadumingu a start ku play-off di Beisbòl Dòbel A na Tio Daou Ballpark. Awenochi tin wega number 2 di e play-off final entre Royal Scorpions i Santa Maria. Djadumingu ekipo Santa Maria Pirates a sorprendé den lat pa empatá e wega pa finalmente gana den 8 inning ku skor pèrtá 11-10. Santa Maria tabata pèrdí te den di 7 inning (último chèns na bate) ku skor di 5-2. Pero bon bateo di espeshalmente rumannan Schoop den último inning a a empatá e wega. Jonathan Schoop a bati di 5-3 ku 3 RBI den e wega ei i Sharlon ‘Wecho’ Schoop a bati di 5-2 ku 2RBI djadumingu último. Ta spera masha hopi fanátiko mes awe atrobe i naturalmente djaweps. Djasabra dimes lo ta yen atrobe Royal Scorpions pa final ku tin 3 picher ekstra ku por yuda debí ku ta 4 wega den ménos ku un siman mester hunga i mester di hopi picher naturalmente. Royal Scorpions a pèrdè e prome wega pero hopi ta konsiderá Scorpions tòg faborito leve. Tur dos ekipo a yega final pa medio di swip nan kontrinkante den semi-final. Santa Maria tambe tin un tremendo ekipo i nos ta pronostiká un final ku lo bai 6 wega. Santa Maria ta keda invikto den e play-off den 2024 ku 4 wega ganá sigi.
* * * * *
Ban pa Slowpitch. Ekipo Marlins ta sigi gana den Liga 50. Djasabra último Marlins a gana Flamboyan/Gamers ku skor di 10-0 ku bon picheo atrobe di Gilbert Henrietta. Marlins a gana nan di 12 wega sigí. Jaws tambe tin hopi wega ganá i nan tin 8 wega ganá sigí. E dos ekiponan aki lo topa otro den un tremendo klèsh djasabra awor pa 12’or na Van Engelen Ballpark. E ekiponan menshoná a topa otro den promé buelta i tabata Jaws ku a gana ku skor di 5-1 djasabra 8 di yüni. Despues di einan ekipo Marlins no a pèrdè mas. Jaws a pèrdè kontra Baranka djasabra 22 di yüni i despues nan tampoko no a pèrdè mas den 50+.
* * * * *
Den e otro weganan di djasabra Ban Serio a gana Lions 8-4. Galbao Boekhoudt i Miro Daal a kombiná pa e viktoria. Jair Josepha a dal homerun pa Ban Serio. No tin masha homerun ku e bala moli e aña aki. Artemisia a gana Sluggers 16-11 i den e último wega den otro klèsh di Liga 50 djasabra e ekipo Baranka a gana Pitufos 9-8. Pitufos tabata bon chèns pa bini bèk den último inning i ta habri ku homerun di Roque Zimmerman despues ku nan tabata pèrdí 9-7. Einan e wega a bira 9-8. A sigi base por bola i dos out sigí pa terminá e wega. Un wega bon bringá ku Pitufos tabata ganá 6 pa 3, pero Baranka ta bini bèk i nota 6 kareda den nan último dos inningnan pa bai ku e viktoria.
* * * * *
Pa loke ta Beisbòl Veterano ekipo Jandoret a gana di Yesterday ku skor di 15-4. Rylan Capella i Deron Clara a kombiná pa e viktoria i Deron Clara a bira e picher ganadó. Den e sigiente wega ekipo Quality Stars a dal Santa Rosa fásil ku skor di 10-3. Farley Ignacio i Xaviero Avastia a kombiná pa e viktoria. Djadumingu mester tabatin un wega krusial entre Santa Maria i Broncos. E promé 6 ekiponan den Beisbòl Veterano ta klasifiká. Number 5 vs 6 i e ganadó lo topa ku number 4. Standing up to date ta Quality Stars 14-2, Santa Maria 14-2, Isla Crackers 11-3, Santa Rosa 11-5, Yesterday 8-7, Broncos 8-8, Jandoret 6-10, Otrabanda Veterano 4-12, Azucar 3-12 i Flamingos 0-10.
* * * * *
Nos a drenta último siman di kampionato regular di Major League Baseball. Solamente dos ekipo a gana nan divishon ku ta Milwaukee Brewers i Cleveland Guardians. Lucha lo bira tenás pa terminá na promé lugá, pero ku mihó rèkòrt ku tur otro ekipo pa keda ku e ventaha komo home team durante henter e play-off. Tin indikashon tambe ku niun ekipo lo no yega 100 wega ganá e wega e aña aki. Ekiponan kargá ku fanátikonan aki na Kòrsou manera Yankees i Dodgers ya a klasifiká i ta pendiente ku nan lo gana divishon òf lo keda komo Wild Card.
* * * * *
Atlanta Braves i ekipo New York Mets ta den un lucha tenás pa gana e último puesto den Wild Card den Liga Nashonal. Promé ku e weganan di djadumingu Atlanta Braves tabata dos wega tras di New York Mets faltando 1 wega pa e temporada regular terminá, pero Atlanta ta mei wega tras di Arizona ku tambe ta den lucha pa wild card. Un di nan lo kai afó. Nos lo mira Jurickson Profar i Xander Bogaerts di San Diego Padres den playoff. Ozzie Albies ku ta bèk ku Braves despues di leshon tambe por yega den play-off manera nos a skibi. Boston ku 5 wega for di Wild Card falta 5 wega, nan ta eliminá. Nos ta keda te aki pa awe i te djarason ku Poder di Dios.
