Marlins ta gana Ban Serio 2-1 i Jair Josepha ta gana Homerun Derby
WILLEMSTAD- Ekipo Marlins a gana Ban Serio 2-1 den un wega di promé buelta ku mester a keda hungá di nobo. Manera ta konosí Marlins a gana e wega aki den e promé buelta, pero Ban Serio a protestá un hugada di mal interpretashon riba un interference den un infield fly.
En todo kaso a hunga e wega kasi kompletamente di nobo i Marlins a bin gana 2-1. Den e otro wega di djasabra último e wega aki bálido pa di dos buelta, ekipo Baranka a dal Lions durísimo ku skor di 15-0. Pa loke ta e Homerun Derby Jair Josepha a gana di Luigi Yanes 5-2. Den e final kada un hungadó por a swing 10 biaha den e final i naturalmente tambe den e buelta regular. Pa loke ta All Star Game, e streanan dirigí pa Jerry Booi a gana di esnan dirigí pa Sendley Reina ku skor di 6-2.
Marlins 2, Ban Serio 1
Marlins a dal 5 hit i hasi 2 eror. Gilbert Henrietta tabata e picher ganadó. Johnny Balentina a bai di 3-2. Ban Serio a konektá 5 hit i kometé 1 eror. Miro Daal tabata e picher pèrdèdó. Winston Kirindongo a bati di 2-2.
Baranka 15, Lions 0
Baranka a dal 12 hit i hasi 1 eror. Kenny Hellement tabata ta e picher ganadó. Fisel Pereira a bati di 3-3. Dennis Dambruck i Elvin Regina di 1-1. Lions a konektá 1 hit i kometé 4 eror. Charles Daal a bati di 1-1.
MAS INFORMASHON DI SÒFTBÒL I BEISBÒL
Lesadonan di Deporte Kòrsou, bon dia i wikent siman. Awe ta djabièrnè 5 di ougùstùs 2024 i nos ta sigi ku masha hopi informashon di Sòftbòl i Beisbòl. Djasabra tabata un dia grandi na Van Engelen Ballpark den kontinuashon di Liga 50. Despues di hopi tempu òf pa promé biaha tabatin un kompetensia di bati homerun (Homerun Derby) i despues tabatin Wega di Strea. E dia a bira un éksito rotundo i lástimamente koriente a kai afó na mitar kaminda di e Homerun Derby i esnan presente no por a sigi e narashon di e Homerun Derby pa por sa ken ta ken pa loke ta e batimentu di homerun. En todo kaso Jair Josepha a gana di Luigi Yanez den final. Jair a dal 5 homerun den 10 swing i Luigi a dal 2 homerun den 10 swing.
* * * * *
Otro hungadónan ku a partisipá na e Homerun Derby tabata entre otro Vernon de Lanoi, Robertson ‘Tom ‘ Josepha, Barry van Het Kruys, Richenel Candelaria, Gilbert Juliet i Myron Wijman. Pa loke ta trata e Wega di Strea, e hungadónan 50 enkabesá pa Jerry Booi a gana esnan di Sendley Reina ku skor di 6-2. Den Jerry Booi tabatin e hungadónan Jair Josepha, Ludwig Pietersz, Charles Daal di Artemisia, Sor Moesquit, Casimiri ets. E tim di Sendley Reina tabata Kenny Hellement, Joseph Everon , Dudley Felicia di Sluggers, Vernon de Lanoi, ets. Un tremendo atardi aya na Van Engelen Ballpark. Den e weganan di buelta regular ekipo Baranka a nòkout Lions ku skor di 15-0. E wega ei tabata bálido pa buelta number 2.
* * * * *
Den e otro wega, e klèsh entre ekipo Marlins i Ban Serio, Marlins a gana ku skor di 2-1. Gilbert Henrietta a tira wega kompletu pa bai ku e viktoria. Tabata e wega ku Ban Serio a protestá, un wega ku Marlins a gana den e promé buelta. Mester a sigi e wega den di 2 inning i Marlins a logra gana e wega. Ku e viktoria aki Marlins ta na promé lugá empatá ku ekipo Pitufos ku rèkòrt di 7-2. Marlins a pèrdè kontra Jaws i Pitufos den buelta number 1. Standing despues di un buelta ta Marlins 7-2, Pitufos 7-2, Baranka/Sharks 7-3, Ban Serio 6-3, Jaws 6-3, Flamboyan 4-5, Sluggers 3-6, Artemisia 3-6, Catpower 2-7 i Lions 1-9.
* * * * *
Djabièrnè último (020824) tabatin entrega di unifòrm na ekipo Pitufos na kas di Boy Constancia na Boca Sami. A entregá unifòrm na miembronan di ekipo Pitufos 50+ i 60+. Boy Constancia naturalmente presente, a papia ku nos i ta rekuperando satisfaktóriamente. Pitufos ta den gran forma tantu den Liga 50 komo Liga 60 e aña aki. Roque Zimmerman, estrea outfielder/primera base di ekipo Pitufos, ta pendiente pa kumpli 50 aña e luna aki i ta kla pa subi lista pa reforsá e ekipo Pitufos den 50+. Fabiani Orcadio tambe lo subi komo kècher pa ekipo Pitufos ku lo klasifiká sigur. Pitufos lo bisti mesun unifòrm den 50+ i 60+.
* * * * *
Nos a risibí e tristu notisia ku Signith Isenia, picher di Los Amigos 60+, hòmber di mil kampaña den Slowpitch a fayesé na edat di 73 aña. Signith tabata un dje grandinan di Los Amigos ku te últimonan aki tabata aktivo. Ela forma parti di e ekiponan di Los Amigos ku a bira kampion di Liga 60 na 2016 i 2017 tempu ku 60+ tabata hunga na Cirilo Chirino Ballpark. Un gran kabayero ku pa hopi tempu a traha na
Speedy Security. Kondolensia na famia i amigunan i naturalmente ekipo Los Amigos. Akto di entiero ta djasabra 10 di ougùstùs di 1 pm pa 3.15 pm na Consolador Brievengat.
* * * * *
Ekipo Intermediate di Kòrsou, kampion Latino Americano a kai vensí kontra di Asia Pacific (Korea) ku skor di 5-4 den un wega bon bringá ku nos tabata ganá ku skor di 2-1 te den bòm di e di 5 inning. Akinan ekipo Korea ta rèli pa 4 kareda i keda dilanti den e partido. Den di 6 inning i di 7 inning nos a logra anotá kareda pero keda kòrtiku. Pichernan ku a tira pa Kòrsou tabata Helmir Helmijr, Sean Serverie i Jay Wiel. Provacia, Wiel i Winklaar a bati di 3-2, Sherman Jacobus di 1-1. Nos a nota 4 kareda, dal 10 hit i hunga sin eror. Korea a skor na 5 okashon, bati 8 hit i hunga sin eror. E selekshon e regresa djaluna. Nos ta keda te aki pa awe. Te mayan ku Poder di Dios.
