Mester buska hungadonan Chirino, Troupée i Kuwas pa selekshon di futbòl den òktober aki.
WILLEMSTAD - E siman aki nos a risibí mas análisis di Pepi Sulvaran pa loke ta trata no selekshon di Futbòl di Kòrsou. Pepi Sulvaran ta eks direktor tékniko di futbol di Kòrsou i eksperto ku gran konosementu riba futbòl internashonal. Konstantemente Pepi ta analisá i manda komunikado pa prensa lokal epseshalmente ku análisis di nos selekshon di futbòl.
Pantera Negra a kai atrás
Kòrsou a kai atras den grupo B di Liga B den Liga di nashon di CONCACAF. Esaki debí na e debakle kontra St. Lucia den e promé buelta di e kompetensia aki. Laga nos spera ku e derota aki a lanta e futbolistanan profeshonal di nos for di soño, ku den Karibe bo no ta gana wega bala riba nòmber so, pero ku entrega i sakrifisio fisiko. Nada no ta pèrdí ainda si. Esun ku sali promé den e grupo ta haña un boleto direkto pa ‘Kopa di Oro’ i e number dos lo mester purba yega via play-off e torneo mas grandi di nos region.
E hungadónan mionario ku nos tin den tapara, no ta bai bin ahinda, sigur despues ku nan a mira e tereno na Grenada ku ta un desaster i e futbòl ku nos a etala. Aworaki ta nesesario dos viktoria riba Grenada pa nos tin chèns di kaba kos den nos ‘Kueba di Panter’ na Brievengat na novèmber awo ora nos enfrenta St. Lucia na kas. Den Ergilio Hato nos no ta pèrdè fasil ku nos fanatikada ferviente animando nos elenko nashonal. Pero mester kuminsá drecha e selekshon. E selekshon tin debilidat serio mei mei den defensa i falta forsa ofensivo den atake. Riba half den defensa ku Floranus i sigur Brenet nos ta ok. Mei mei di tereno Leandro ta den bon forma ku Roemeratoe komo su sekundante. Juninho tin tur kalidat, pero mester papia kune pa e stòp di bin ku su mes bala wega, kual e no ta pasa pa niun hende. Sentro delantero ta e veterano Janga so tin, ku awor a kaba di haña ekipo riba di dos nivel ulandes. Riba ala Gorré, Margaritha i Severina ta di mas o menos mes nivel, ku ta bon pa Karibe.
Daijiro Chirino
E hoben aki a kuminsá den PEC Zwolle i a krese den Castellón ku awor ta hunga den di dos divishon na Spaña. Den korto tempu ela traha su nòmber komo defensa sentral, ku ta nèt lokual e selekshon aki falta. E ta rapido i ta un defensa luchado. Den pasado ela yega di bin hunga kaba pa e selekshon ku Dean Gorré a forma pa hunga kontra Ajax.
E duo Gaari ku van Eijma no ta stabil i ta laga muchu buraku den sènter di defensa. Gaari ta di origen rèksbèk i awo a kaba di haña un ekipo riba di dos nivel na Saudi Arabia i Van Eijma ta struggle pa mantené su posishon komo bèk sentral den RKC na Ulanda. Mester kuminsá por lo menos buska un defensa sentral mas pa òktober. Pa aworaki ni Bazoer ni Obispo ni St. Jago no ta bai bin. Pa ‘Kopa di Oro’ i e sigiente buelta di pre mundial un òf mas probablemente lo bin, paso e kontrinkantenan lo bira mas atraktivo.
Giovani Troupée
Toupée tabata un gran talento promé ku leshon a manka su karera pa mas ku dos aña, pero awor e ta bèk. Ela hunga den tur selekshon ulandes te ku U-20. E ta un defensa ku bon téknika i bon kruse di balon for di riba ala. Apesar ku ela keda dos aña praktikamente afo, e tin mas ku 100 wega den Eredivisie ulandes riba su nòmber i ku 18 aña ya tabatin un balor di 2.5 mion Euro.
Aworaki e ta den Top Oss ahinda, pero ta ser spera ku pronto e lo reaparesé den un ekipo di e divishon maksimo. Ela firma ku Top Oss pa purba kon e pia ta bai despues di hopi tempu di leshon i esei ta resultando bon. Kune nos tin mas opshon den defensa. E ta duna nos por ehèmpel e posibilidat pa hala Floranus ku por hunga tur kaminda den defensa, na e puesto di defensa sentral i pone Troupèe ku tin bon bista di wega rèksbèk, pa mas impulso ofensivo.
Brandley Kuwas
Kuwas tabata un di e hungadónan ku no tabatin ekipo i ku tabata for di forma i ku rason no a wòrdu invita lastu be. Pero Bradley tin su kalidatnan i un tempu hasta a wòrdu menshoná pa selekshon ulandes. E tin eksperensia tambe den kampionato di nivel manera Eredivisie i Süper Liga di Turkia. Awor ku ela haña ekipo atrobe ku Volendam, e mester ta aden. Riba e nivel di Liga B ku e selekshon aki ta aden, e por hasi e diferensia riba ala.
E konosé gol i tin un bon tiru. Apesar ku su nivel a baha, kontra un isla manera Grenada en no mester tin problema pa alkansa un bon nivel. Gol nos mester, tantu den òktober komo den novèmber. Kastaneer ahinda no tin ekipo i tur kos ta indiká ku ta Janga so ta nos sentro delantero i e gol no mester dependé di un posishon so.
