Miembronan Nobo di Salon di Fama 2023 i nan kurikulo
WILLEMSTAD - Dia 6 di aprel 2023, 6 eks deportista i dirigente a drenta Salon di Fama di FDOK. Deporte Kòrsou tin kuríkulo kòrtiku i potret di e deportista i dirigentenan aki. Ta trata aki di sra. Norma Silvia Boeldak-Carolina, sr. Stanley Juan Ignacio, sr. Laicam Jocette Clarensa Coeriel-How, Sr. Mirro Marco Sabina, sra. Alejandra Filomena Rumai sr. Stanley Sixto Coffy. Naturalmente riba wepsait Deporte Kòrsou tin espasio pa amplia riba e eks gran deportista i dirigentenan aki.
Nòmber : Sra. Norma Silvia Boeldak - Carolina
konosí komo Nooi
Fecha di nansementu : Kòrsou, 6 di novèmber 1946
Norma Boeldak – Carolina
originalmente a kuminsá ku deporte di vòlibòl, pero na edat di 18 aña a hasi e kambio pa sòftbòl ora ku el a djòin St. Joris Angels.
Ku tempu el a pasa pa Nuevas Estrellas, seguidamente Coca Cola Wild Cats i finalmente den 1981 a bira miembro di Pichingolo.
Aki su karera a konosé un kambio i ya den su promé aña ku e ekipo di Buena Vista el a titulá kampion di Kòrsou i a keda premiá komo MVP.
Norma a kue nuebe título siguí komo kampion ku Pichingolo pa despues keda dos temporada afó pa motibu di leshon.
Na 1992, na edat di 46 aña, despues ku Pichingolo a pèrdè título Norma ta hasi un kòmbèk, yuda e team pa rekuperá título di forma invikto, ripití komo kampion den 1994 pa despues e retirá.
Na nivel internashonal tambe Norma tabata un sensashon komo pitcher estelar di selekshon: 1974 bròns Weganan Sentroamerikano i di Karibe na Sto. Domingo; 1976 medaya di oro Kampionato Sentroamerikano i di Karibe na San Salvador; 1984 bròns i premio MVP den Kampionato Sentroamerikano i di Karibe na Pto. Rico.
SALON DI FAMA NR. 2
Nòmber : Sr. Stanley Juan Ignacio
Fecha di nansementu : Kòrsou, 24 di ougùstùs 1947
Stanley Juan Ignacio a nase den Otra-banda. Krio di bestia i amor pa bestia ta su pan di kada dia.
Na aña 1980 a lanta Asosiashon Paso Fino Kòrsou (ASPAFIKO), di kua des-pues Stanley ta bira presidente i a okupá e puesto pa 25 aña largu.
Tabata e époka ku e deporte a krese aki na Kòrsou pa despues afiliá na Confede-ración Paso Mundial di kua awendia Stanley ta Miembro Honorario.
Ku tempu tambe Stanley Ignacio a bira Presidente di Asosiashon Doño-nan di Kabai (ASODOKA) i a para durante di 10 aña largu na kabes dje organisashon aki ku a organisá karedanan lokal i internashonal.
Mas aleu Stanley ta konosí pa su aktividatnan den De Vogelvriend, e ta propietario di Rancho De Herberg, tambe pa 33 aña kaba e tin e programa radial Mundu di Animal i durante di 43 aña a figurá den direktiva di Dierenbescherming.
SALON DI FAMA NR. 3
Nòmber : Sra. Lai Cam Jocette Clarensa How - Coeriel
Fecha di nansementu : 28 di mart 1964.
Lai Cam How - Coeriel a sobresalí ku un karera internashonal impreshonante den karate, tantu bou di bandera hulan-des komo bandera di Kòrsou.
Na 1987 e ta gana medaya di plata den Kampionato Hulandes, siguí pa oro na Inglatera, tambe bròns den Kampionato Europeo na Fransia i bròns den otro kampionato na Inglatera.
Ta sigui ku plata i bròns den Kampionato Hulandes i oro den Kampionato Europeo 1994 na Finlandia.
E mesun aña e ta muda pa Kòrsou i ta konkistá plata den ODESUR na Venezuela. Den 1995 e ta kontinuá ku oro den Kampionato Panameri-kano na Colombia i bròns den Weganan Panamerikano na Argentina.
Na 1997 oro den Mundial WADO na Miami; 2004 atrobe oro den Panamerikano aki na Kòrsou i finalmente den 2017 medaya di bròns den Mundial WADO dilanti di su mes públiko aki na Kourou.
Na 1991 Lai Cam How a keda premiá komo Sportvrouw van het Jaar di Karate Bond Nederland i den 1995 komo Deportista Femenino di Aña di FDOK.
SALON DI FAMA NR. 4
Nòmber : Sr. Mirro Marco Sabina
Fecha di nansementu : Kòrsou, 29 di yüli 1942
Mirro Sabina a forma parti dje époka di oro di hisamentu di peso, biahando sigur na 25 okashon ku selekshon.
Na edat di 18 aña el a kuminsá praktiká e deporte aki na Sta. Rosa pa despues nan muda pa Rif.
Su promé kompetensia grandi tabata Weganan Panamerikano na Winnepeg, Canada, finalisando na di 4 puesto.
Na numeroso okashon kampion di Kòrsou ‘lightweight’, sigui despues pa ‘middle weight’ i tambe ‘light heavy weight’.
Su promé titulo internashonal tabata den torneo internashonal 3er lustro di “Curacaose Gewichtheffersbond”.
Na 1969 medayista di bròns den Kampionato Sentroamerikano i di Karibe na Pto. Rico.
Den 1974 tambe bròns Weganan Sentroamerikano i di Karibe na Sto. Domingo.
Na hopi okashon kampion di Kòrsou i Antia Hulandes durante di un karera di mas ku bintisinku aña largu.
SALON DI FAMA NR. 5
Nòmber : Sra. Alejandra Filomena Rumai
konosí komo Ninita
Fecha di nansementu : Kòrsou, 5 di òktober 1954
Alejandra Filomena Rumai a praktiká vòlibòl i karate. Tabata ku 30 aña ku el a dal su promé paso den body building.
Den añanan 1986 i 1987 el a titulá kam-pion den diferente kompetensia lokal i antiano i ta kulminá esei ku e título komo kampion Sentroamerikano i di Karibe.
Den aña 1989 e ta sigui dominá tantu na Kòrsou komo riba nivel antiano na St. Maarten i ta koroná ku su di dos korona Sentroamerikano i di Karibe, e biaha’ki na Trinidad & Tobago.
Den e mesun kompetensia e ta keda premiá komo ‘Best Poser’ i den ‘couples’ ta kue e di 3 puesto huntu ku Fauzi Hanst, pa despues risibí e rekonosimentu komo Atleta di 1989 aki na Kòrsou.
Te ku 1994 ta sigui ku vários puesto di honor lokal i antiano, tambe di 13 lugá den IFBB World Championship na Mexico i di 7 puesto den ’Couples’ huntu ku Stanley Francisca na Mexico.
SALON DI FAMA NR. 6
Nòmber : Sr. Stanley Sixto Coffy
Fecha di nansementu : Kòrsou, 16 di ougùstùs 1947
Stanley Coffy a start su karera deportivo na 1967 ora ku el a lanta e ekipo di futbòl Juventus den Otrobanda.
Komo ku e hóbennan tabata krese, el a funda un di dos team ku a bira Depor-tivo Amigoe di Kòrsou, ku den desèm-ber 1981 a bira INDEKOR.
Na 1970 Stanley a keda aserká pa forma parti di Komishon Hubenil di CVB huntu ku Hubert Jansen i Ibi Schoop.
Na 1974 a lanta FEDEPROF, ku Stanley komo sekretario.
Despues di ousensia pa motibu di estudio, den añanan 80 e ta hasi su regreso i a bira presidente di Curacaose Voetbal Bond, ku despues a bira Federashon Futbòl Kòrsou.
Ademas di sekretario, e ta okupá puesto komo vise-presidente di F.F.K. i miembro di diferente komishon.
Mas aleu Stanley tabata sekretario di Curacaose Sport Federatie; e tabata den komishon pa organisá sertámen Reina di Deporte i durante mas ku 25 aña den organisashon pa eligí deportista- i dirigentenan di aña.
Na 2019 el a keda nombrá komo Presidente di e komishon ku a organisá Caribbean Shields di CONCACAF i despues tambe Presidente di komishon di CONCACAF pa torneo kualifikatorio di Dama U-20.
