Minister Van Heydoorn a risibí Pichingolo/Nissan
WILLEMSTAD- Minister di Enseñansa, Siensia, Kultura i Deporte Sr. Sithree Van Heydoorn djamars 20 di desèmber 2022 den oranan di atardi a risibí e ekipo kampeon di Kòrsou di softball femenino fastpitch ku ta Pichingolo/ Nissan na su despacho den edifisio di “World Trade Center”.
Ta di dos aña konsekutivo ku hungadónan i dirigentenan di Pichingolo ta serka minister Van Heydoorn pa risibí un distinshon di parti di gobièrnu. Huntu ku e mandatario di deporte tabata presente Sra. Lizette Sambo-Velder, direktor (a) di sektor di Kultura i Deporte. Tambe Sr. Amado Victoria ku ta konsulente deportivo di e ofisina di kultura i deporte, Sr. Errold Bishop ku ta kolaborador di nos minister Sr. Sithree Van Heydoorn.
Minister Van Heydoorn su deseo ta pa sigui yuda deporte.
Minister Van Heydoorn a felisitá Pichingolo ku otro título di kampeon. Minister a pidi e sòftbolistanan i dirigentenan pa sigui hasi nan esfuerso pa mantené nòmber di Pichingolo i softball fastpitch na laria. Su eksperensia ku miembronan dje organisashon ta bon, ya ku fuera di sòftbòl nan ta bon hende pa nos komunidat.
E mandatario a konta ku dia ku tabatin e problema pa hunga final debí na áwaseru i ku baseball i softball mester a hunga riba e mes dia, e la kombersá ku Sr. Fenton Tomasita dirigente di Pichingolo i puntra kon bin no ta hunga wega di kampeonato di softball na e parke na Buena Vista. E miembro di direktiva di Pichingolo a splika ku e lusnan ta poko defisiente, i tambe tereno rondó dje parke ta habri.
Lo hasi mantenshon i adaptashon na e parke na Buan Vista
E mandatario a bisa ku ta su deseo pa yuda sigur e deportenan ku ta saka kara mas di Kòrsou pa nan tin bon instalashon. Ta su pa nan por tin ounke ta 3 parke ku por hunga wega di kampeonato riba dje. Esei mes a pone ku e ta bai pèrkurá pa parke di Pichingolo na Buena Vista haña e iluminashon adekuá pa por hunga wega anochi sin problema.
Huntu ku esei, kopiando riba terenonan deportivo na Bonaire ta bai yuda pa e parke na Buena Vista por ta será.
Sabana Ballpark lo haña yerba artifisial
Tambe e mandatario a rekonosé durante e bishita di Pichingolo ku Sabana Ballpark lo haña yerba artifisial i lo perkurá tambe pa e ta sera. E mandatario no a skonde su preokupashon ku tin biaha kosnan di gobièrnu ta tarda poko, pero ku nan lo hasi lo máksimo pa sigurá ku mei mei di 2023 tur kos ta kla o sigur riba e bon kaminda.
Sra. Lizette Sambo-Velder tambe a hiba palabra, e la elogiá balanse ku e la nota den Pichingolo ku tin sòftbolistanan hóben, i tambe poko mas veterano. E la probechá pa felisitá e tim kampeon di Kòrsou.
Sr. Amado Victoria tambe a felisitá e organisashon di Pichingolo ku otro título. I urgi nan pa sigui traha duru i ku ánimo pa engrandesé deporte. Sr. Errold Bishop, kolaboradó di nos minister a rekonosé e hazaña inkreibel di e organisashon di Buena Vista ku a logra nan di 40 título di kampeon di Kòrsou.
Pichingolo rumbo 50 aña di eksistensia
“Ta un rekòrt inkreibel ku ni mi ñetunan lo no mira kibrá”, Sr. Bisshop a deklará. Sr. Taffy de Jongh na nòmber dje organisashon di Pichingolo a gradisí e titular di deporte i su hendenan pa e invitashon. I bisa ku ta un honor pa kualke deportista di por ta di bishita serka un mandatario. Pichingolo ku poder di Dios lo selebrá 50 aña di eksistensia dia 7 di mei 2023 i lo ta algu tremendo e loke ku minister Van Heydoorn a primintí e organisashon.
Minister Van Heydoorn tambe a splika di un petishon pa duna e kaminda na entrada dje parke di Pichingolo te kaminda ku ta bai ABC Bus Bedrijf e nòmber di “Kaya Pichingolo”, su ministerio tin un representante den e komishon, i lo sostené e petishon ku lo tin di bai pa e ministerio di Sr. Charles Cooper. Tabata un atardi hopi dushi i ameno serka Minister Sr. Sithree Van Heydoorn i su hendenan.
