Mix & Match Softball Tournament edishon 1 organisa pa Montab i mas informashon di Sòftbòl i Beisbòl
WILLEMSTAD - Den kuadro di selebrashon di Fundashon Pro Baseball Montaña Abou (MONTAB) su di 20 aniversario, MONTAB ta organisá un torneo den kual Mayornan, Téknikonan i miembronan di Direktiva di organisashon di Little League Baseball di Liga Pariba, Liga Pabou i Liga Willemstad por forma nan ekiponan i partisipá. MONTAB ta konsiderá e torneo aki un torneo den kual por yuda kreá un mihó relashon entre Mayornan, Téknikonan i miembronan di direktiva. Tambe ta duna oportundiat na e muchanan pa nan mira nan mayornan i téknikonan den akshon i apoyá nan.
“MIX & MATCH SOFTBALL TOURNAMENT” ta tuma lugá e dianan 3 & 4 di sèptèmber i 10 & 11 di sèptèmber (dos wikènt) na MONTAB Ballpark A (vèlt grandi) & B (vèlt chikí) i ta
dediká na señora Diana Daal. Un persona ku tur hende ku a sigui deporte konosé komo un estrea den Softball Fastpitch Femenino den añanan 1960 te 1990 i naturalmente Diana ta sumamente konosí den mundu di Baseball Little League. Diana pa 20 aña a dediká su bida na yuda train i prepará muchanan (entre 4 pa 16 aña) di entre otro bario di Montaña Abou.
Organisashonan ku ta afiliá Curacao Little League Baseball por kompetí den e siguiente kategoríanan :
KATEGORIA MAYORNAN : Mayornan ku nan yunan ta miembro di un organisashon di Little League for di Baby League te ku Senior League por partisipá. E ekiponan di mayornan mester kedá formá dor di por lo ménos 5 mayor femenino i 5 mayor maskulino riba tereno di wega. Esta un COMBI (loke ta konosí komo COED).
KATEGORIA TEKNIKONAN/DIREKTIVA : Timnan por ta formá pa tékniko i miembro di direktiva maskulino komo femenino. Partisipashon di e mayor femenino den e kategoría aki no ta un eksigensia.
Gino Valeriaan motor tras di Torneo Mix & Match organisá pa Montab
“MIX & MATCH SOFTBALL TOURNAMENT” lo implementá mesun reglanan ku ta usa den HOPE Softball Tournament i lo hunga ku bala moli i bala butá.
Organisashonnan di Liga Pariba, Liga Pabou i liga Willemstad ku ta deseá na partisipá por tuma kontakto ku G-no Valeriaan na telefon 524-1066 òf Sidiane Laker 520-0797 òf por manda un e-mail na Montab2002@gmail.com. Ultimo fecha pa inskripshon ta dia 22 di ougùstùs 2022. Partisipashon ta limitá.
INFORMASON DI BEISBÒL I SÒFTBÒL
Fanátikonan di Extra Inning bon dia i felis wikènt. Nos tei atrobe ku hopi informashon di Beisbòl i Sòftbòl. Kòrsou ta den gara di Mundial di Little League ku ta tumando lugá na Williamsport. Awe nos selekshon lo hunga kontra Panama. Remarkabel ta ku e selekshonnan ku a hunga riba e promé dia, esta djarason 17 di ougùstùs, por ehèmpel Kòrsou a hunga kontra Latin America ta hunga mas wega ku otro timnan. Nan lo sigi den e dòbel eliminashon. Panama ta hunga nan promé wega awe i ta yega ku ménos picher usá kompará ku ekiponan manera Kòrsou. Lòt a kai ku Kòrsou, Nicaragua, Canada, Australia di e parti internashonal. Southeast, New England, Northwest i West lo mester hunga un wega mas ku otronan. Kòrda ku e aña aki 4 tim a bini aserka i e skèdjel a kambia pa bira dòbel eliminashon.
* * * * *
Wega di Junior League entre Kòrsou i Republica Cheka ta tumando luga djabierne anochi ku Republica Cheka gana ku skro di 2-0 den di 4 inning. Selekshon di Korsou na Williamsport a perde ku skor di 9 pa 3 kontra Panama djabièrnè mèrdia. Pa loke ta trata e wega Tremendísimo e partido ku Kòrsou a gana ku skor di 2-0. Selekshon di Kòrsou a demonstrà nivel haltu, entre otro e picher habridó Davey Jay Rijke ku ya a traha nòmber tirando 14 ponche riba e fuerte ekipo Nicaragua ku tambe tabatin un tremendo picher ku yama Luis Garcia. Davey Jay Rijke a saka un otro out bulando un tremendo kabes komo picher riba un toke fèrfelu ku lo a bira empate na 1 kareda den bòm di e di 5 inning. Hopi tenshon mes aya na Williamsport i naturalmente pa esnan ku ta wak e weganan aki na Kòrsou via televishon. Riba kanalnan lokal tradishonal EPSN 1 i 2 no por a mira e weganan manera tabata e kaso e añanan anterior ku Kòrsou a hunga na Williamsport. Algun hende a wak e weganan via You Tube, pero ku yen interupshon i logo grandi di Little League World Series di manera ku no por mira e wega. E wega di djarason no tabatin eror i tabata tremendo aktuashon di e shortstopnan tantu di Kòrsou komo di Nicaragua. Davey Jay Rijke a tira 14 ponche, saka un out komo picher i saka dos out komo shortstop. Ke mèn, ta 17 out total ela saka. No tabatin out saká den outfield pa e ekipo di Kòrsou den e promé wega.
* * * * *
Ban pa Slowpitch un ratu. Liga di Nos Tur ta sigi awe djabièrnè 9.45 pm ku wega di Sòftbòl Femenino Veterano kandela entre kampion i sup kampion di Liga di Nos Tur. E weganan ta tuma lugá naturalmente den Frank Curiel Ballpark. Un Kara (super kampion) ta den kabes ku rekòrt di 10-1, miéntras Chilling (sup kampion 2021) ku ta na di 4 lugá ku rekòrt di 5-6. Pa 8’or pm awe lo tin otro wega kayente ora Sin Stress topa ku Join Me. Djasabra ta 8’or pm Chilling kontra Sin Stress i pa 9.45 pm ta Join Me kontra Un Kara. Ekipo Sin Stress tin barwacht i ta invitá tur hende bin baha stress i disfrutá di e weganan sin stress, bar i kushina sin stress i un tremedo DJ sin stress. Standing Liga di Nos Tur. Un Kara 10-1, Sin Stress 10-3, Shinings Stars 7-5, Chilling 5-6, Curacao Sweethearts 3-9 i Join Me 1-12. Hopi komentario i promoshon pa e weganan di wikènt aki. Skèdjel nobo di Liga di Nos Tur a sali.
* * * * *
Final di Beisbòl Hubenil ku ta entre Marchena Braves i Wild Cats a start awenochi pa 7.30 pm den Stadion Johnny Vrutaal. Wega number 2 di e final aki ta djasabra 7.30 pm den Stadion Johnny Vrutaal. Den kaso ku tin empate e wega number 3 lo ta djabièrnè 26 di ougùstùs. Semi-final di Klase A ta start djasabra awor na Bonnam Ballpark. Pa 9’or di mainta Santa Rosa Indians lo topa ku Royal Scorpions. Despues pa 12’or pm Santa Maria Pirates ta topa ku Groot Kwartier Stars. Djadumingu ta Groot Kwartier Stars kontra Santa Maria Pirates na Montab Ballpark pa 09.00 i despues Royal Scorpions kontra di Santa Rosa Indians djabièrnè. Den kaso di empate lo hunga Santa Rosa vs Royal Scorpions djamars 23 di ougùstùs. Santa Maria Pirates vs Groot Kwartier Stars djarason 24 di ougùstùs. Nos ta keda te aki pa awe.
