Montaña Ariba i Marchena ta gana dos wega den Little League Torneo FABB
WILLEMSTAD – Torneo FABB 2025 a start djabièrnè i sigi den wikènt ku algun wega interesante i emoshonante. Den e promé dos weganan ekipo Montanja Ariba a gana Santa Maria ku skor di 4 pa 3 den kategoria Little League riba tereno A i na mesun momentu Trai Seru a gana Jaguar riba tereno B den kategoria Minor League.
Ekipo Montanja Ariba a sigi gana i derotá Santa Rosa 12 pa 4 djadumingu. Marchena a gana Santa Rosa 12-1 den Little djasabra i Montana Abou 3-2 den Little. Trai Seru tambe ta invikto den Little League ku dos wega ganá i 0 pèrdí.
RESULTADONAN (LITTLE)
Montanja Ariba 4, Santa Maria 3
Jandoret 7, Brievengat 3
Marchena 12, Santa Rosa 1
Trai Seru 14, Sint Michiel 1
Santa Maria 10, Montanja Abou 0
Montanja Ariba 12, Santa Rosa 4
Brievengat 7, Sint Michiel 0
Trai Seru 7, Jandoret 3
Marchena 3, Montanja Abou 2
MINOR
Trai Seru 4, Jaguar 3
Brievengat 6, Marchena 3
Sint Michiel 9, Montanja Ariba 6
Trai Seru 9, Santa Maria 4
Santa Rosa 9, Terra Kora 1
Teksto pa pòtrèt:
Ekipo Santa Rosa Minor durante desfile.
Torneo FABB ta dediká na Jurickson Profar.
Tera Kora tambe a hunga den wikènt den Torneo FABB.
Nos Tambe Por a hunga wega amistoso di futbòl kontra Moonchi Boys
WILLEMSTAD- Ekipo Nos Tambe Por super kampion di Sòftbòl 60+ di 2024 a start den gran forma den 2025. Djadumingu 5 di yanüari Nos tambe Por a hunga un wega amistoso den mini futbòl kontra e fuerte ekipo di futbòl Veterano, ekipo Moonchi Boys. E wega a tuma lugá den Frank Curiel Ballpark. Nos Tambe Por ku hungadónan manera Norwin ‘Sor’ Moesquit, Payo Gabriel, Sjo sjo Basilio, Andrewi Does, Jero William, Richenel Rafalea i Wim Felicia a lucha fuerte den e promé mitar i a wanta e wega te na 2-1. Den di dos mitar Moonchi Boys (kasi Jong Holland Veterano), ku hungadónan manera Raymond Allee, Frensel Calmes, Henry Caldera i polisnan manera Rensley Martis i Gerald Helena, a logra gana e wega 5-2. Un enkuentro soshal ku a resultá un éksito rotundo i ta pendiente pa Sòftbòl entre Moonchi Boys i Nos Tambe Por den e dianan benidero.
MAS INFORMASHON DI BEISBÒL I SÒFTBÒL
Fanátikonan di Deporte Kòrsou. Promé siman kompletu di 2025 i nos ta kargá ku informashon di Sòftbòl i Beisbòl. Hopi interes pa Amstel Bright Premier Cup ku ta start dia 24 di yanüari na Van Engelen Ballpark. Amstel Bright Premier Cup ta organisá pa Cicoza, un dje organisashonnan mas grandi den Sòftbòl Slowpitch. Cicoza ta bayendo rumbo pa 49 aña di eksistensia. E organisashon ta enkabesá pa Ryan Isebia ku ya pa kasi 20 aña a tuma over for di su tata Eithel Isebia (QEPD). Den nos edishon di djabièrnè nos a publiká hopi detaye di e torneo i kon mester inskribí.
* * * * *
Na Aruba tambe nan ta sigi nos i sa tin komberashon konstant ku pelotero i dirigentenan di Aruba. No tin masha moveshon temporada di Karnaval di Aruba i ta despues di Karnaval moveshonnan ta start den e respektivo liganan. Na Aruba liga di e hóbennan a bira manera slow i na Kòrsou tambe. Na Kòrsou ta Liga Amstel só a keda miéntras liganan 40, 50 i 60 ta sigi krese na organisashon i naturalmente e kampionato. Na Aruba tambe e liganan di veterano ta sigi krese i ta birando mas interesante tur aña. E aña aki e ABC&S 60+ i ku partisipashon di Hulanda tambe lo ta na Aruba. Nos Tambe Por, Los Amigos, Lions i probablemente Sluggers lo ta aya. Tin mas ekipo ta mustrando interes pa move pa Aruba entre otro Pitufos i Jaws. By the way tin un torneo di Florsheim dianan 25 i 26 di yanüari na Flatstone Ballpark.
* * * * *
Saludo pa Rudy Angela ku riba 50+ ainda ta picha den Beisbòl Dòbel A na Aruba. Rudy ta un tremendo deportista ku ta tene su kurpa den bon kondishon. Rudy ta rèfri di futbòl i a bira kampion den Beisbòl Veterano 40+ ku ekipo Spuiters. Ekipo Spuiters ta e super kampion di Beisbòl Veterano (Baseball Classico) i a swip ekipo Leftovers den final. Nan tin hungadónan manera Pierre Richardson, Gordo Cannister, vários famia Flanegin, Arnold tata i yu. E tim ei ta rumbo pa dinastía den Beisbòl 40+ di Aruba. Si no tin un kopa Antiano òf konstant (Dutch Caribbean) riba nivel di Dòbel A, por kuminsá organisá esun di Beisbòl Veterano 40+ i 50+. Tabatin Torneo di Reino pero esei a kaba na nada. Sòftbòl ABC&S ta bon organisá tantu riba nivel di hóbennan 40, 50 i 60. Interesante e moveshonnan entre e islanan i mester bisa ku den e parti di Sòftbòl Soshal tambe a moveshonnan tei konstant ku e otro nan torneo SKAK riba kada isla.
* * * * *
Djadumingu 5 di yanüari ekipo Azucar mester a selebrá 50 aña di eksistensia. Tabatin un Santu Sakrifisio di Misa na Misa di Santa Maria, sigi pa un enkuentro soshal na Amerikanen Kamp. Un dje gran ekiponan ku a logra alkansá 50 aña di eksistensia. Ekpo fundá pa Hubert ‘Ibi’ Soerka ku ta tio di Ray Soerka i Jurgen Faneyt. Azucar ta move ainda den gran forma den Beisból Veterano, pero naturalmente a bira difísil pa klasifiká den e promé 4-nan. Siman pasá Ando Cijntje ta kòrda kon Azucar komo number 6 a hunga kontra number 1 i saka ekipo Bulldogs afó. Segun mi ta na 2016. E dianan aki nos a haña algun rekorte di korant kaminda Charlton ‘Willy’ Van Thijs a sali MVP di e final di Beisbòl 2018 ku tabata entre Jandoret Raiders i Bulldogs. Van Thijs den trabou di ruim op na kas a topa ku e korantnan.
* * * * *
Djadumingu 5 di yanüari ekipo Nos Tambe Por ku tabatin un aña tremendísimo den 2024 a hunga futbòl kontra di e ekipo Moonchi Boys. Den Nos Tambe Por tin algun futbolista 60+ fèrfelu manera Norwin ‘Sor’ Moesquit, Andrewi Does, Sjo Sjo Basilia i Hendrik Gabriel. Huntu ku esnan ku ta hasi nan bèst riba tereno manera Jeromin William i Richenel Rafaela. Direktor tékniko di Nos Tambe Por tabata Wochi Balentina ku asistensia di Rere Martina. Asina e ekipo a kuminsá move pendiente pa Amstel Bright Premier Cup ku ta start fin di luna.
* * * * *
Torneo FABB a start djabièrne i sigi den wikènt ku vários wega. Apesar ku awaseru tabata menasá aki i aya weganan a sigi dilanti bon públiko aya na Van Engelen Ballpark. Djabièrnè nos a wak dos tremendo wega pareu ku tabata Montanja Ariba kontra Santa Maria den Little i Jaguar kontra di Trai Seru den Minor. Remarkabel ta ku tur dos wega a terminá ku skor di 4-3. Montanja Ariba a gana Santa Maria den Little i Trai Seru a gana Jaguar den Minor. Nos ta keda te aki. Te mayan ku Poder di Dios.
