Na memoria di Raymond ‘Boy’ Constancia gran deportista i persona
Djasabra 9 di novèmber 2024 a tuma despedida di Raymond ‘Boy’ Constancia, gran deportista i hungadó aktivo di ekiponan Pitufos, ekipo di trabou CRU i Isla Crackers. Boy Constancia a fayesé djaluna 4 di novèmber 2024, despues ku e tabata malu último lunanan. Redaktor di Deporte Kòrsou konosé Boy Constancia for di tempu di skol i a militá huntu ku e gran persona i deportista aki den Pitufos, Jandoret Raiders, Happy Stars ets i na hopi okashon tabata kontra otro riba tereno den Sòftbòl Slowpitch.
Boy Constancia ta ruman di Elston ‘Tonchi’ Constancia i primu di rumannan Edgar i Harvey Constancia di ekipo Pitufos. Boy di estatura grandi, gran pelotero for di tempu di Boca Stars, despues Pitufos, su ekipo ku e ela funda Forsa/Chez Susenne huntu ku Shòti Balentina (QEPD), hopi aña gran lider i manager di ekiponan di Refineria Isla/CRU den Sòftbòl. Boy Constancia tabata tremendísimo kabayero, vòlibolista i futbòlista tambe tempu e tabata hóben. Un gran lider i hòmber di palabra. Manager i dirgente di algun ekipo den Sòftbòl Femenino Veterano, entre otro Unidos, Sin Stres ets. Dirigentenan/hungadó den vòlibòl Stakamahachi, The Birds, Jong Colombia (Futbòl).
Diripiente Boy Constancia a bira malu na febrüari 2024 i sorprendé tur hende. Dor di un amistat bon di sigur mas ku 45 aña nos tin hopi pòtrèt di Boy komo dirigente, manager i den akshon i nos lo kompartí esaki ku boso. Entiero ta tuma lugá Djasabra 9 di novèmber 2024. Mahsa hopi hende mes tabata na entiero di e gran deportista, dirgiente i personahe aki. Deskanso Boy...
