Nos Goso i Rising Phoenix ta gana awenochi ta Nos Goso vs Treasure i resultado i apertura di Beisbòl Veterano

Nos Goso i Rising Phoenix ta gana  awenochi ta Nos Goso vs Treasure i resultado i apertura di Beisbòl Veterano

WILLEMSTAD- Nos Goso a laga The Fighters den tereno ku skor di 13-12, Rising Phoenix a gana Treasure 7 pa 2 den playoff Diamond Stars League ku a tuma lugá djabièrnè 24 di mei na Sam Bunting Ballpark. Manera ta konosí tabatin un kantidat di protesta tokante time limit i despues protesta den protesta i finalmente e ganadónan a keda manera nan tabata esta, Rising Phoenix ta terminá i gana e wega i pasa pa final i Nos Goso tambe ta terminá e wega i gana i pasa pa semi-final. The Fighters tabata falta un out pa elimina Nos Goso, pero eror en tiru a alargá e inning. Semi-final entre Nos Goso i Treasure ta start awenochi (djasabra 26 di mei) pa 8’or pm na Sam Bunting Ballpark.  Nos Goso tabatin e wega ganá ku skor di 9 pa 8 den di 5 inning. Rising Phoenix tabata gana ku skor di 6-2 den e weganan di djabièrnè 17 di mei.

Santa Maria Pirates ta dal Isla Crackers 6 pa 2 den Beisbòl Veterano

WILLEMSTAD- Santa Maria Pirates ku picheo di Evenon ‘Nene’ Martis a gana Isla Crackers 6 pa 2 djadumingu atardi den Beisbòl Veterano na Vi Jansen Ballpark.  Djadumingu, 19 di mei tabatin apertura ofishal di e kampionato kaminda presidente di Beisbòl Veterano, Gilbert Denisia a hiba palabra.  BEVEKO a duna honor na e gran fanátiko Sharon Rosa pa tira promé bala. Despues di apertura ofishal a sigi e wega entre e kampionnan Quality Stars ku a gana e ekipo nobo Flamingos ku skor di 15-1. Nos tin e otro resultadonan i apertura ofishal di kampionato BEVEKO 2024.

Djasabra 18 di mei
Jandoret Raiders 10, Azucar 3.
Jandoret Raiders tabatin 11 hit ku 2 eror. Raylan Capella a gana. Mayron Martinus a bai di 1-1, Earl Virginia ku Jersiño Fluonia a bai di 2-1. Deron Clara ku Fayselic Nocento, ámbos di 3-2 i Myron Wijman di 3-3. Pa Azucar 10 hit ku 4 eror. Nelson Reinita a pèrdè. Reinardo Elcock a bai di 1-1. Eugene Martijn, Fhurgion Booi i Ian Ignacio, tur a bai di 3-2.  

Santa Rosa Memories 15, Veteranos Otrabanda 1.
Santa Rosa Memories a dal 17 hit i kometé 2 eror. Ganadó tabata Ramses Jamanika. Wilfred Reinita, Jason Benito ku Verney Jansen, tur a bai di 3-2. Railison Isenia i Curby Brunken, ámbos a bai di 3-3. Veteranos Otrabanda tabatin 3 hit ku 4 eror. Edison Clemencia a resultá pèrdèdó. Alcides Juliana a bai di 1-1 i Channon Doran di 2-2.

Djadumingu 19 di mei.
Yesterday 6, Marlins 5.
Yesterday a dal 10 hit i kometé 4 eror. Pernell Sprott tabata ganadó. Zhurendel Ilaria, Senny Pertronella, Benjamin Bikker, Mysonn Cathalina i Pernell Sprott, tur a bai di 1-1. Edson Sint Jacoba ku Sherwin Schoop ambos di 2-1. Andley Simmons a bati di 3-2. Marlins a dal 8 hit i nan a hasi 1 eror. Shanon Kleinmoedig a resultá pèrdèdó. Wilkin Lokart ku Renny Sint Jago, ámbos di 1-1.  Miguel Velasquez, Humphrey Antonia, ku Alderin Visers, tur di 2-1 i Juan Carlos Quevedo Valera a bai di 3-3.

Quality Stars 11, Flamingos 1.
Quality Stars a dal 12 hit i nan a kometé 1 eror. Felix Edword a gana i Emile Haswell ku Guilliano Benito a bai di 1-1. Xaviero Avastia ku Georgino Goeloe, ámbos di 2-1 i Fernando Sanchez a bai di 2-2. Raydell Isabella a bai di 3-2. Flamingos tabatin 2 hit ku 4 eror. Wendell v/h Kruys a pèrdè Alberto Paula Toribio ku Ocea Rivera, tur 2 di 2-1.

 
Santa Maria Pirates 6, Isla Crackers 2.
Santa Maria Pirates tabatin 8 hit i kometé 1 eror.  Evenon Martis tabata ganadó. Ryan Ogenia, Roderick Zimmerman, Everon Martis i Ryan Samuel, tur a bai di 2-1. Eldred Estanista a bai di 2-2 i Raylon Francisca di 3-2.  Pa Isla Crackers 8 hit ku 2 eror. Orsendo Clemencia a resultá pèrdèdó. Quincy Kook, Dave Janga, Julius Veeris, Roderick Eustatia i Stanford Landburg, tur di 2-1. Rhiency Imperator a bai di 3-3.

‍

‍

MAS INFORMASHON DI SÒFTBÒL I BEISBÒL

Lesadónan di Deporte Kòrsou, bondia i felis wikènt. Awe nos tin resultado di e promé wikènt di Beisbòl Veterano ku a tuma lugá wikènt pasá na Vi Jansen Ballpark I skor final di the Diamond All Stars League.  A start ku e weganan di Beisbòl Veterano djasabra i djadumingu tabatin apertura ofishal. Djasabra tabatin dos wega i djadumingu 3 wega. Ekiponan ku a impreshoná tabata Quality Stars, Santa Rosa i Santa Maria. Santa Maria ku vários hungadó nobo, entre otro Evenon Martis ku a picha bon i bai bon na bate tambe.

* * * * *

Den regla ta pará ku weganan di semi-final mester bai 2 ora i e weganan a bai un ora i mei. Direktiva a husga ku e promé serinan di page system no ta semi final. I parse ku direktiva tabatin rason, pero ekipo The Fighters ku tin algun hungadó i tékniko bibu a bai buska un flyer (propaganda pa wega) kaminda direktiva a propagá e promé dos serinan di page system komo semi-final. No a keda direktiva nada otro si no duna ekipo The Fighters ganá (di e protesta). Finalmente e ekiponan ku tabata gana a sali viktorioso tòg.

‍

* * * * *

Bèk pa Beisbòl Veterano, ekipo Isla Crackers a presentá fuerte, pero a kai vensí kontra di Santa Maria Pirates.  Isla Crackers bai ariba 2-0 riba hit di entre otro Rhiëncy Imperator i Quincy Kook ku a konektá hit den kabes di e di 3 inning. Den bòm di mesun inning Santa Maria ta habri afó riba hitnan di Raylan Francsica, Roderick Zimmerman, Evenon Martis  i Eldred Estanista. Evenon a tira wega kompletu (5 inning), tuma 8 hit 2 kareda di kual 1 tabata limpi i 0 base por bola. Tabata Evenon ‘ Nene’ Martis su debut den Beisbòl Veterano. Dayron ‘Boggie’ Puriel èks Quality i èks Santa Maria a hunga den outfield pa Isla Crackers.

* * * * *

Ekipo Isla Crackers parse ku tin un staf di picheo hopi sólido ku mas ku 14 picher. Orcendo Clemencia, Felix Ibañez, Rainir Martis, Stanford Landburg, Roderick Eustatius, Dave Kirindongo, Lo Celestina, Luigi Yanez, Quincy Kook, Jurseigh Leitoe,  Dayron Puriel, Jair Josepha, Julius Veeris, Rodney Riley. Hopi ta pronostiká Isla Crackers den final di Beisbòl Veterano 2024.

* * * * *

Pa loke ta trata e otro weganan, Jandoret Raiders a gana Azucar 9 pa 3 ku picheo di Tutu Capella i bateo di Myron Wijman.  Hungadónan nobo pa Azucar tabata Emrit ‘Oso’ Volk. Santa Rosa a pasa fásil riba riba Otrabanda Veterano ganando 15 pa 1.   Otrabanda tabatin peloteronan manera Rudsel Poulina Jr, Channon Doran, Osaires Lucas, Winston Kirindongo i Raynies Faries.   Pa Santa Rosa Signald Paz a mira akshon den shortstop i Dwight Alexander komo rightfielder. Esei pa loke ta trata e hungadónan nobo ku a mira akshon pa Santa Rosa. Rames Jamanika a tira 4 inning fásil, tuma 3 hit i un kareda.

* * * * *

Sòftbòl Liga 50 ta sigi djasabra awor na Van Engelen Ballpark, despues ku tabatin apertura ofishal djasabra último. E kampionato ta dediká na Samuel ‘Bobbel’ Hamson. Djasabra awor pa 4’or ta Marlins kontra Ban Serio i 10’or tin Pitufos vs Jaws. Otro weganan ta 12’or Lions kontra Flamboyan/Gamers i 2’or Catpower kontra Artemisia.  Liga 60 ta start djadumingu awor na Frank Curiel Ballpark i pa 1’or tin e apertura ofishal. Weganan di djadumingu 26 di mei ta 11’or Curacao Super Stars – Sluggers, 1’or Nos Tambe Por vs Nos Power i 3’or Jaws vs Lions. Nos ta keda te aki pa awe. Te mayan ku Poder di Dios.

‍

‍