Nos Goso ta gana Treasure 10 pa 6 i final ta start awenochi
WILLEMSTAD- Nos Goso a gana Treasure 10 pa 6 den e di dos wega di semi-final djabièrnè 31 di mei i final ta start 1 di yüni 2024 pa 8.30 pm den Sam Bunting Ballpark. E seri final di The Diamond Stars League ta entre Nos Goso i ekipo Rising Phoenix. Carlientje Cloepa tabata e picher ganado ayera i Vanessa Winklaar a bati di 3-3. Emily Jonis a konektá homerun. Nos Goso a dal 11 hit i hasi 2 eror. Treasure a bati 10 hit i kometé 4 eror. Un públiko grandi tabata presente djabièrnè pa mira e wega.
MAS INFORMASHON DI SÒFTBÒL I BEISB0L
Fanátikonan di Deporte Kòrsou, bondia. Nos tei atrobe kargá ku informashon di beisbòl i sòftbòl den e kolumna aki. Tur djaluna 3’or pm riba plataformanan digital di Extra manera Extra.cw, Facebook, You Tube i demas plataformanan tin un podcast Extra Inning. Djaluna dia 27 di mei Edmar ‘Boy’ Motor Cornelia tabata den e podcast Extra Inning hopi interesante atrobe. Edmar a konta historia di Williamsport 1980 i 2019. Na 1980 Boy Motor tabata den e promé selekshon di Kòrsou ku a partisipá na kampionato Mundial di Little League na Williamsport. Na 2019 Boy a bira e promé coach ku a bai komo hungadó i despues komo coach Williamsport.
• * * * * * *
Lesadónan por bai bèk i wak e podcast i e 3 proménan via e plataformanan ariba menshoná. Edmar Cornelia a duna hopi detaye mes, entre otro ku práktikamente niun mayor no tabata bai Wiliamsport ku e selekshon. A bini hopi kos mas aserka, pero for di 1980 e trato tabata manera Big League ku e asina yamá unclenan. Na 2019 tur asuntu a bira mas detayá, espeshalmente e parti televisá, kaminda Kòrsou i rònt Mundu por wak e weganan via ESPN. Boy a bira supkampion na tur dos okashon ku e selekshonnan. Pa loke ta trata e selekshon 2019 mayoría hungadó a logra firma òf a haña un beka pa studia na USA.
• * * * * *
E Podcats (Extra Inning) di djaluna último den un dia a bula 7500 views. E transmishon di e wega entre Pariba i Pabou e wega final di djasabra 18 di mei a logra 50.000 views riba Facebook so, sin konta e viewsnan riba e otro plataformanan. Sin duda tremendo proyekto di Extra Curacao pa rekordá ku 20 aña pasá Kòrsou a bira kampion di Mundu. E proyekto ta, artíkulonan den korant Extra, Podcast, transmishon di weganan di play-off, Seri del Karibe i finalmente nos lo tei na Williamsport pa trese detayenan pa e fanátikonan.
• * * * * *
Na 2004 Kòrsou a gana Aruba North (na Aruba) den final ku skor di 6-0 i pasa pa Williamsport. E wega final ei tabata riba un djasabra 24 di yüli. Tabatin 10 ekipo den e Seri di Karibe di Little League na Aruba. Kòrsou, Aruba ku dos selekshon, Sint Maarten, República Dominicana, British Virgin Island, Bahamas, Boneiru, Puerto Rico i Sint Thomas. Timnan a baha un tiki pa loke ta trata e kompetensia. Pa kolmo Puerto Rico ta bai dirèkt atrobe i Cuba ku na 2019 a djòin a haña chèns di bai Williamsport dirèkt.
%20copy.jpg)
• * * * * * *
Ata e historia di e gran final di 2004 na Williamsport. Nos kampionnan Mundial dirigí pa Vernon ‘Tripel A’ Isabella ku su kuerpo tékniko Michelangelo ‘Lo’ Celestina i Luis Provacia a bira kampion di Mundu aña 2004, dia 29 di ougùstùs. Promé ku nos bira kampion di Mundu nos a gana Aruba Noord na Aruba dia 24 di yüli 2004 pa kampion di Karibe. E gran final di Beisbòl Little League di Mundu na Williamsport a paralisá Kòrsou kompletu debí ku na Kòrsou i rònt Mundu por a mira nos muchanan di 11 i 12 aña den akshon via televishon ESPN i ABC.
• * * * * * *
Kòrsou a gana US West ku skor di 5-2 ku tremendo bateo di Jurickson Profar i picheo di Carlos Pineda. Na momentu ku e selekshon a yega tabata un euforia di otro mundu. E hóbennan ku a pone nos riba mapa Mundial (un tiki mas atenshon naturalmente debí na transmishon di e kadena ABC i ESPN) a keda risibí manera heroenan nashonal. Invitashonnan a keda bini di tur sektor ku a duna e hóbennan di Little League homenahe meresí. Nos tin hasta e numeritonan bon wardá ainda. Kòrsou (Caribbean) a nota 5 kareda, dal 6 hit i hasi 1 eror. Carlos Pineda a gana ku relevo di Jonathan Schoop ku a tira dos tersio den inning number 6. Jurickshon Profar a bai di 3-2 ku un homerun di dos kareda, Jonathan Schoop di 3-2 ku un kareda empuhá. US West a bati 4 hit i hasi 3 eror. Jordan Brouwer a pèrdè i Sean McIntyre a bai di 3-2. Adam Justiniano a bati un homerun di dos kareda den último inning pa US West. Nos a bai bèk den tempu un ratu. Warda e historia aki, mi lesadónan. Nos ta keda te aki pa awe. Te mayan ku Poder di Dios.
