Nos Goso/Tur Goso i Gai Lihe a sorprendé Leonise Avastia ku resientemente a drenta Salon di Fama di FDOK
WILLEMSTAD - Djadumingu 5 di mei ekipo na Sam Bunting Ballpark ekiponan Nos Goso/Tur Goso di Sòftbòl Femenino Veterano a huntu ku spònser Gai Lihe a a sorprendé Leonise Avastia ku resientemente a drenta Salon di Fama di FDOK.
A presentá ku un outo wabi ku dos miembro i Salon di Fama di Pichingolo aden ku ta Rozelin Kinburn i Soraida Juliana i a dal un keiru i bini bèk e parke. Despues tabatin un agasaho kombiná naturalmente ku kos di kome i bebe ku hopi invitado. Un tremendo sorpresa i bon organisá pa Nos Goso/Tur Goso i Gai Lihe. Leonisa ‘La Leona’ Avastia, un biaha mas, masha masha pabien.....meresidamente. Nos tin hopi portrèt di e sorpresa i agasaho.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou bon dia i felis siman. Liga 50 a start djasabra na Van Engelen Ballpark i den e promé wega ekipo Artemisia a sorprendé ekipo Ban Serio ganando ku skor di 11 pa 7. Den 2023 segun nos Artemisia no a gana masha wega (solamente un wega). Artemisia a presenta serio i sorprendé tur hende. Dòbel sorpresa pa motibu ku hopi hende e kere ku e wega no a bai dor mes, debí na un palu di awa ku a kai djasabra último rònt Kòrsou. Den bisendario di Van Engelen kasi awa no a kai miéntras na Banda Bou tabatin un desaster ku awaseru.
* * * * *
Hopi hungadó i dirigente a keda kas gewon pensando ku weganan a keda suspendé rònt Kòrsou. Pa loke ta trata Beisbòl Veterano, djabièrnè e direktiva a manda un komunikado bisando ku weganan di e promé wikènt lo no sigi. Weganan ta sigi dia 18 di mei despues ku vários hungadó a move pa Sint Maarten, Aruba i Boneiru en konekshon ku kompetensianan ABC ku ta tumando lugá. E siman aki tin vários ekipo den eksterior en konekshon ku Torneonan ABC. Pa Sint Maarten a move ekiponan Terremoto, Swift i Cicoza. Pa Boneiru tabatin intenshon pa Baranka 40+ bai, pero nan a hala atras pa loke ta trata e Clássico ABC 40+ i tin indikashon ku Baranka lo no partisipá mas na Kopa ABC. E motibu ta ku e organisadónan di Boneiru a skèdjel muchu wega tras di otro. E ekipo ku yega final lo hunga 8 wega den 4 dia i Baranka a bulafó.
* * * * *
Ban bèk pa Liga 50 + Sòftbòl ku a start na Van Engelen Ballpark. Den e di dos wega, Catpower a gana di Sluggers ku skor di 7-2. Catpower a entregá unifòrm nobo nobo djaweps último. Pitufos a sorprendé Marlins ganando ku skor di 5-4. Marlins a kuminsá bati den lat, nan a dal 9 hit kontra 5 di Pitufos, pero a keda kòrtiku. Marlins a klasifiká na di 4 lugá den e kampionato di 2023, pero a kai vensí kontra di Baranka den play-off. Di otro banda Ban Serio ku a sali number 2, a gana di Jaws den e semi-final di temporada pasá. Ban Serio a swip ekipo Baranka den final i kibra e racha di dos kampionato sigí di ekipo Baranka. Kenny Hellement refuse to lose di Baranka tei bèk den temporada 2024 i segun Barankanan ta otro gai lo kanta. Den e último wega di Liga 50 di djasabra Baranka a gana Lions 13-0. Kenny Hellement a tira e blankeo tumando solamente 4 hit den 5 inning.
* * * * *
Ekipo Marlins i Ban Serio lo move pa Aruba djarason pa partisipá na e Torneo Kopa ABC 50+. Ban Serio ta super kampion di 50+ ABC. Nan a gana na 2017, 2018, 2019 i 2023. Na 2022 tabata ekipo Baranka ku a bira kampion i kibra e racha di Ban Serio. Baranka no a partisipá na ABC 50+ na Boneiru na 2023, debí ku nan mes ta den Clássico 40+. Mirando ku Baranka lo no ta den 40+ mas, e chèns tei ku Baranka lo djòin e ekiponan ABC50+ na momentu ku e kampionato no ta na Kòrsou. Tene kuenta ku na Kòrsou tambe tin torneo riba e dianan alrededor di Ascencion. Ekipo Pitufos tin e torneo Internashonal ku a kuminsá kue fama formal den region.
%20copy.jpg)
* * * * *
Ekiponan ku ta partisipá den e torneo yamá Golden Athlete Caribbean Championship organisá pa Pitufos di 8 pa 12 di mei, ta den 60+ Pitufos i Nos Power di Kòrsou, Los Prados di República Dominicana i Florsheim di Aruba. Den 50 ekiponan ta repartí den dos pul, Bambinos di Aruba, Bario Obrero di Puerto Rico, Ban Sentral di República Dominicana. Den Pul B tin ekiponan Jaws, Pitufos i Sluggers di Kòrsou. Skema ya ta riba merkado i despues di algun aña nos lo tin ekiponan di República Dominicana den un torneo aki na Kòrsou. Nos Tambe Por a gana di Jaws ku skor di 8 -4 i bira kampion Torneo Lions 60+. Ta di dos torneo sigi di 60+ ku Nos Tambe Por ta gana. Nos ta keda te aki pa awe i te mayan ku Poder di Dios.
