Nos Tambe Por a entregá trofeo kampion Dutch Caribbean na Frank Curiel
WILLEMSTAD- Djadumingu 13 di òktober den oranan di atardi na Frank Curiel Ballpark, ekipo Nos Tambe Por a entregá e trofeo kampion na Frank Curiel, fundadó i motor tras di e ekipo aki. Manera ta konosí Nos Tambe Por a bira kampion di e Dutch Caribbean Championship Masters 60+ 2024 ku a tuma lugá na Boneiru di 4 pa 6 di òktober Frank Curiel a kanselá su partisipashon na e delegashon na último momentu.
Frank Curiel no tin mester di introdukshon den Beisbòl i Sòftbòl di Kòrsou i Karibe Hulandes. Ta di dos biaha sigí ku Nos Tambe Por ta bira kampion di e Dutch Caribbean Championship Masters 60+. Na 2023 Nos Tambe Por a bira kampion di e torneo na Kòrsou.
Ekipo di Chilling Jaguar a biaha pa Sint Maarten siman pasá
WILLEMSTAD - E ekipo di Chilling Jaguar Travel Team 50+ a sigui move. E ekipo Chilling Jaguar ku un total di 24 persona huntu ku tékniko i fanátiko a biaha pa Sint Maarten p’asina partisipá na e torneo di Upsetterz. E meta ta pa por logra animá e otro pais nan di Dutch Caribbean pa engrandesé e Liga 50+ di damas. Na Kòrsou nos tin 6 tim ku ta partisipá den e Liga Streanan Dj’ayera damas 50 plus. Pero ainda e otro paisnan no a yega einan. Sint Maarten su tim Upsetterz awor tin su 50 plus damas, pues poko poko pero sigur e ánimo ta sigui serka e otro paisnan. For di djaluna e ekipo di Chilling Jaguar a biaha i keiru sera konosí ku diferente parti di e isla i loke tabata e cherry riba e bolo ta e trip pa Anguilla ku tabata fenomenal. Durante e partidonan tabata presente diferente tim maskulino di 50 i 60 ku tambe a partisipá na e torneo aki. Tur esakinan a tuma lugá riba e vèlt “Jose Lake Ballpark”.
Quality ta dal Broncos 11 pa 4 i Santa Rosa ta gana Yesterday 1-0
WILLEMSTAD- Beisbòl Veterano a sigi ku 5 wega den wikènt. Den e weganan mas importante di wikènt Quality a dal Broncos 11 pa 4 i Santa Rosa a derotá Yesterday 1-0. Quality ku e viktoria aki a keda number 1 ku rèkòrt di 16-2 empatá ku Santa Maria Pirates. Broncos ku su rèkòrt a bira 8-10, ta na di 6 lugá i 1,5 wega riba Jandoret Raiders ku tin rèkòrt di 6-11. Santa Rosa Memories ku e viktoria di 1-0 riba Yesterday a klinch puesto number 4 den Beisbòl Veterano, miéntras Yesterday a keda na di 5 lugá riba e standing. Den e otro weganan Santa Maria a gana Marlins 12-0, Azucar a zona Otrabanda 15-1. Den Liga 50 ekipo Energy Volcano a gana Otrabanda 3 pa 2.
Fanátikonan di Deporte Kòrsou, bon dia. Fin di siman pasa tabata kayente den Liga 50 i Liga Amstel na Van Engelen Ballpark. Bon públiko pa wak Liga 50 i dimes Liga Amstel ta haña un push manera ta e kaso último añanan. Na 2020 Liga 50 a move di Cirilo Chirino Ballpark pa Van Engelen Ballpark. Mes aña Liga Amstel a disidí di hunga nan liga pareu ku Liga 50 i esei a bira un éksito rotundo pa tur dos liga. Un saludo pa Pim Fangman ku ta e hòmber grandi di bar di tantu Liga 50 komo e otro liganan di Van Engelen Ballpark. Nos a tende ku ta bai tin un torneo kòrtiku di Liga Van Engelen. Liga van Engelen ta un di e hopi liganan di Sòftbòl ku a kai afo. Antes tabatin por lo ménos 5 liga mas, manera Trai Seru, Un i Tur, Liga Amistad, Liga Sabana, Kopa Basora, Liga Divi Divi ets.
* * * * *
Ban pa e resultadonan ku nos tin di weganan ku a tuma lugá djasabra tantu den Sòftbòl Slowpitch komo Beisbòl Veterano. Cicoza a gana Terremoto den Liga Amstel i Ban Serio a gana Pitufos den 50+. Liganan Amstel i 50+ a sigi djasabra ku 7 wega na Van Engelen Ballpark. 3 wega di Liga Amstel i 4 wega di Liga 50. Den Liga Amstel Cicoza a gana Terremoto 15 pa 9 den un wega ku Cicoza a bini bèk i nota 11 kareda den nan último 3 inningnan. Terrepower a gana X-Treme 15-8 i Thrillers a dal Sugar 23-13. Den 50+ Ban Serio a gana Pitufos 9 pa 5, Marlins a derotá Sluggers 4-2. Jaws a zona Catpower 10-0 i Lions a derotá Artemisia 9-4. E situashon ta bira interesante entre ekiponan Artemisia i Sluggers.
* * * * *
Sluggers tin rèkòrt di 6-11 i Artemisia tin rekòrt di 5-12 i nan dos ta luchando pa klasifiká number 7. E lucha lo bai ta te e último fecha di e buelta regular ku ta djasabra awor na Van Engelen Ballpark. Ekipo Catpower lo topa ku Sluggers i Artemisia lo hunga kontra Jaws. Sluggers ku ta ariba naturalmente tin mihó chèns pa gana di Catpower i keda na di 7 lugá , miéntras Artemisia lo topa ku Jaws ku ta den un tremendo temporada. Standing up to date ta Marlins 15-3, Jaws 13-4, Ban Serio 12-5, Baranka/Sharks 10-7, Pitufos 10-7, Flamboyan/Gamers 9-8, Sluggers 6-11, Artemisia 5-12, Catpower 4-13 i Lions 2-16.
* * * * *
Sistema di play-of ta konosí, number 4 kontra 7 i number 5 kontra 6. E ganadónan lo topa ku otro pa saka number 4. Despues ta sigi e tradishonal play-off 2 vs 3 i 1 vs 4. Skema di play-off, fecha i orarionan ya ta konosí. Liga 50 interesantísimo i parse ku ta bai tin transmishon bibu i direkto via e plataforma Facebook i Youtube. Djasabra último nos a papia ku presidente di Liga 50 ku ta Gilbert Keller ku den dianan benidero lo bini ku mas informashon i detaye.
* * * * *
Den Beisbòl Veterano ekipo Santa Maria a dal Marlins durísimo ku skor di 12-0 djasabra 12 di òktober na Vi Jansen Ballpark. Evenon Martis a tira 4 inning kompletu pa e blankeo i e nòkout. Den e otro wega ekipo Azucar rumbo pa selebrashon di 50 aña di eksistensia a dal Otrabanda duru ku skor di 15-1. Tantu Otrabanda komo ekipo Azucar no tin chèns mas pa klasifiká. E lucha lo bai bira tenás entre ekipo Broncos i Jandoret Raiders pa klasifiká number 6. Ekiponan ku ya a klasifiká ta Quality Stars, Santa Maria Pirates, Isla Crackers, Santa Rosa i Yesterday. Puesto number 6 lo keda pa sea Broncos i Jandoret Raiders. Broncos na e momentunan aki ta number 6 ku 1,5 wega riba Jandoret Raiders despues ku nan a pèrdè djadumingu kontra Quality Stars.
* * * * *
Ekipo 50+ di Sòftbòl Femenino Veterano Chilling Jaguar tabata na Sint Maarten den fin di siman i nos tin un reportage kon kosnan a bai. Liga 60 a sigi ayera na Frank Curiel Ballpark i ekipo Nos Tambe Por a presentá ku e trofeo ku nan a gana den e Dutch Caribbean Championship Master 60+ i entregá esaki na Frank Curiel. Nos ta keda te aki pa awe i te mayan ku Poder di Dios.
