WILLEMSTAD – Nos Tambe Por ku bon picheo di Michelangelo ‘Galbao’ Boekhoudt a gana Jaws ku skor di 7 pa 2 den e promé wega di final di Liga 60. E final a tuma lugá na Frank Curiel Ballpark dilanti un públiko grandi. Wega number 2 di e seri final mihó di 3 lo tuma lugá djadumingu awor.
Nos Tambe Por komo ekipo di kas a nota 4 kareda den promé inning. Ekipo Jaws a kontestá ku dos kareda den bòm di promé inning ku a resultá di ta tur e karedanan ku Jaws a logra nota. Ekipo Nos Tambe Por a nota 3 kareda mas den di dos inning pa asina e wega bira 7 pa 2 ku finalmente e bira e skor final.
Lesley Fer a konektá homerun solitario pa Jaws den e promé inning i Michelangelo Boekhoudt a tira wega kompletu pa Nos Tambe Por. E habridó pa Jaws ku ta Junny Pieter a resultá e picher pèrdèdó. Ela risibí relevo di Riley Toppenberg i Rigo Thode.
Jandoret Raiders i Santa Rosa Royal ta klasifiká pa final di Liga 50
WILLEMSTAD- Jandoret Raiders a gana Otrabanda 12-1 i Santa Rosa a dal Volcano Energy 12-4 i klasifiká pa final di Liga 50 djadumingu na Vi Jansen Ballpark. Djadumingu no tabatin wega di Liga 40 den Beisbòl Veterano. Djasabra ekipo Broncos a gana di Jandoret ku skor di 8-7 i klasifiká number 6 den Beisbòl Veterano. Ekipo number 6 lo topa ku number 5 i e ganadó lo topa ku number 4 pa despues bai e play-off di 1 vs 4 i 2 vs 3. Pa Jandoret Raiders e picher ganadó tabata Clifton Ijziek. Ela risibí relevo di Amador Nita. Earl Virginia i Chervin Maduro a bati di 2-2. Edison Clemencia tabata e picher pèrdèdó. Xavier Avastia a bati di 2-2. Den e wega di Santa Rosa Edmond ‘Momon’ Martina tabata e picher ganadó, Farley Girigorie a bati di 4-3. E wega final lo tuma lugá probablemente djadumingu awor na Vi Jansen Ballpark.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bonochi. Deportenan Sòftbòl i Beisbòl ta sigi aki den novèmber. Nos por sinta na kas trankil mira weganan di klasifikashon Premier 12 ku partisipashon di selekshon di Hulanda na Meksiko (Guadalajara). Nòmbernan manera Hendrik Clementina, Sharlon Schoop, Jonathan Schoop, Ray Patrick Didder, Juremi Profar, Juan Carlos Sulbaran, Denzel Richardson, Shai Martis, Kevin Kelly, Didi Gregorius, Dwayne Kemp, Rushenton Tomsjansen, Jayden Estanista. Sharlon ‘Wecho’ Schoop riba un lansamentu haltu adén ta hala su man adén i depositá e bala den leftfield den e promé wega kontra Panama. Tabata un homerun solitario di un tempu e prospekto grandi Wecho Schoop ku nunka no a logra yega Liga Grandi.
* * * * *
Kevin Kelly a tira bon durante dos inning, pero ora ela drenta di relevo pa Shai Martis e no por a evitá e karedanan na momentu ku ela drenta relevá. En todo kaso Ray Patrick Didder a dal un hit pa right kaminda Hendrik Clementina ku tabata na segunda a nota e kareda di viktoria den di 10 inning. Djadumingu selekshon di Hulanda mester a topa ku selekshon di USA. Nos Pais TV ku komentaristanan manera Gino Valeriaan, Alexander Macaja, Jair Quant i Hensley Josephina lo transmití tur e weganan di Kòrsou. Skema ta djasabra Panama, djadumingu 7’or USA, djamars 10’or pm Puerto Rico, djarason 10’or kontra Meksiko, djaweps 14 di novèmber 3’or kontra Venezuela. Number 1 i 2 di e pul aki lo move pa Tokyo pa e Premier 12, ke mèn e weganan aki ta e klasifikashon. Hulanda a pèrdè djadumingu ku skor di 12-2 kontra USA.
* * * * *
Un tiki mas di historia di Premier 12 ku ta trata di e mihó 12 paisnan di Mundu den Beisbòl amatùr, ánke mayoria hungadó den e torneo ta profeshonal. E promé edishonnan tabata na 2015 i 2019. Hulanda a partisipá na tur dos okashon. Ekiponan di 2015 tabata Hapon, USA, Sur Korea, Hulanda, Chinese Taipei (Taiwan), Canada, Puerto Rico, Cuba, Venezuela, República Dominicana, Meksiko i Italia. E torneo a tuma lugá na Hapon i Taiwan na e okashon ei. Na 2015 Sur Korea a gana, sigí pa Hapon, USA i Meksiko.
* * * * *
E di dos tabata na Hapon, Sur Korea, Taiwan i Meksiko. Tabata Hapon, USA, Sur Korea, Meksiko, Chinese Taipei (Taiwan), Cuba, Australia, Hulanda, Venezuela i Canada. Puerto Rico i República Dominicana. Hapon a bira kampion na 2019 sigí pa Sur Korea, Meksiko i USA. Ban spera ku Hulanda lo klasifiká den e kompetensia aki ku ta fuertísimo i paisnan ta bini ku prospektonan, hungadónan profeshonal di e liganan rònt mundu i èks hungadónan di Grandes Ligas.
* * * * *
Manera ta konosí play-off final di Liga 50 a keda aplasá pa un siman, ke mèn final lo start djasabra 16 di novèmber. Lo sigi djasabra 23 di novèmber i si ta nesesario, si e seri empatá, djasabra 30 di novèmber. Liga Amstel a sigi djabièrnè na Van Engelen Ballpark. Pa loke ta djabièrnè, ekipo Gamers a gana Cicoza 8 pa 4 i Terremoto a gana Thrillers 9-8 djabièrnè. Djasabra weganan a keda suspendé pa motibu di mal estado di tereno. Tin indikashon ku Liga Amstel lo sigi ku play-off djabièrnè awor na Van Engelen Ballpark.
* * * * *
Pa loke ta trata Beisbòl Veterano, ekipo Broncos a gana di Jandoret ku skor di 8 pa 7. Jandoret tabata ganá 7-3 i Broncos bayendo pa nan último oportunidat i e picheo no por a wanta i Broncos meresidamente ta klasifiká komo number 6. Broncos mester enfrentá ekipo Yesterday ku ta number 5 i e ganadó lo mester topa ku Santa Rosa. Naturalmente ta pendiente di e wega entre Isla pa wak ken ta klasifiká number 3 òf 4. Si ekipo Marlins gana Isla loke ta bastante improbabel, ekipo Santa Rosa i Isla Crackers lo empatá. Informashon up to date ta ku Isla a gana Marlins pa defolt.
* * * * *
Standing den Beisbòl Veterano ta Quality Stars 17-2, Santa Maria 16-3, Isla Crackers 15-4, Santa Rosa Memories 14-5, Yesterday 10-9 i Broncos 9-10, Jandoret 7-12, Azucar 4-15, Otrabanda 4-15 i Marlins 4-15. Nos ta pendiente di detaye kiko ta bai pasa wikènt benidero den Beisbòl Veterano. Naturalmente pendiente di e wega final di 60+ entre ekiponan Nos tambe Por i Jaws. Nos ta keda te aki pa awe i te djarason ku Poder di Dios.
