Play-off di Beisbòl Veterano 2024 suspendé te otro aña
WILLEMSTAD- Djabièrnè den oranan lat di atardi desishon a kai ku play-off 40+ di Beisbòl Veterano lo no tuma lugá mas den 2024. Play-off di Beisbòl Veterano Liga 40 + lo sigi den aña 2025. Manera ta konosí Santa Rosa Memories a gana e wega di wild card entre number 4 i 5. Yesterday ku tabata ekipo number 5 a protestá e wega bisando ku e último batiadó di e wega ku a dal doblete pa laga Yesterday den tereno tabata ilegal, debí ku e kuerpo tékniko di Santa Rosa Memories no a anunsiá e kambio ku den e kaso e tabata un re-entry. Yesterday a pèrdè e protesta i a apelá. Direktiva di Beisbòl Veterano Kòrsou (BEVEKO) a buska un komishon di apelashon i no a bini kla ku esaki. Nos tin e informashon ku BEVEKO a manda djabièrnè 29 di novèmber den oranan di atardi.
BEVEKO ta informá:
1. No a risibí niun nòmber di kandidato pa e komishon;
2. Yesterday su protesta i apelashon mester keda revisá pa un komishon di arbitrahe;
3. E komishon mester analisá nan protesta i apelashon huntu ku reglamentu;
4. Lamentablemente no tin un komishon instalá, aprobá i no tin desishon ainda;
5. Tempu ta kòrtiku pa hasi tur esaki konforme reglamentu i di un forma legal.
Desishon: Tur wega di play-off lo keda kanselá te próksimo aña. Na momentu ku tin mas informashon lo partisipá esaki na tur miembro. Pa kualkier pregunta òf remarke por manda esaki via sgbeveko40@gmail.com
Baranka ta pika dilanti 1-0 den seri final di Liga 40
WILLEMSTAD- Baranka a laga Cicoza den tereno ganando ku skor di 13-12 i pika dilanti den play-off final di Liga 40. E wega aki, e promé di e seri final mihó di 3 a tuma lugá djaweps 28 di novèmber na Van Engelen Ballpark. Cicoza tabata dilanti ku skor di 12-3 te den kabes di e di 6 inning. Baranka te rèli nota 7 kareda den bòm di e di 6 inning i 3 kareda den bòm di e di 7 inning pa laga Cicoza den tereno. Charly Merite a konektá e hit pa left kaminda Ryan Ogenia i Eldred Estanista a nota, pa laga Cicoza den tereno. Wega number 2 di e final lo tuma lugá djamars 3 di desèmber na Van Engelen.
Baranka 13, Cicoza 12
Baranka a dal 11 hit i hasi 1 eror. Raylison Gijsbertha tabata e picher ganadó i Eldred Estanista a bati di 3-3 ku 5 RBI. Dave Kirindongo di 1-1. Willy Reinita i Ryan Ogania di 3-2. Eldred Estanista a dal 2 homerun, Dave Kirindongo a bati un homerun.
Cicoza a bati 13 hit i hunga sin eror. Andley Simmons tabata e picher pèrdèdó. Ela releva Shurentley de Lima ku a drenta pa e habridó Jeremy Obispa. Dave Janga a bati di 4-3. Julius Veeris di 2-2. Rodney Riley a bati di 4-2 i Andley Simmons di 4-2. Dave Janga a konektá homerun.
Baranka lo bolbe purba pa drenta Liga 60 den 2025
WILLEMSTAD - Organisashon Baranka hopi eksitoso den Slowpitch den nan trayektoria, lo bolbe purba pa drenta Liga 60 den 2025. Na 2024 Baranka a solisitá pa drenta Liga 60 i durante reunion general mayoria ekipo a vota kontra pa e ekipo Baranka drenta. Esnan ku a vota pro no a komprondé e motibu ku vários ekipo a vota kontra. Na 2023 un ekipo dirigí pa Erno Candelaria tambe a pidi pa drenta Liga 60, pero e ekipo aki tambe a keda rechasá pa esnan ku ta den e liga menshoná. Chèns ta grandi ku direktiva lo laga espasio pa weganan por start for di 10’or di mainta, pa asina por tuma mas ekipo. Na e momentunan aki tin 8 ekipo den Liga 60 i por yega na 10 ekipo òf mas. Dimes lo hunga 4 wega pa djadumingu i dos ekipo por haña liber. Den pasado tabatin liganan ku tabata ninga ekipo, debí ku kos tabata bon i despues e liga a kaba na nada pasobra un òf mas ekipo a kai afó i den algun aña ekiponan ku a keda den e liga no tabata interesá mas. Algun miembro di direktiva ke hasi e liga ku mas tim i mas atraktivo. Mester apuntá ku e liga ta halando hopi fanátiko tur djadumingu na Frank Curiel Ballpark. E aña aki tin un kampion nobo i ta spera mas fanátiko den 2025 naturalmente awor ku tin un kampion nobo.
MAS INFORMASHON DI SÒFTBÒL I BEISBÒL
Fanátikonan di Extra Inning bon dia i felis siman. Djaweps tabatin e promé wega di e seri final Liga 40 entre ekipo Baranka i Cicoza. Baranka a gana Cicoza 13-12 den un wega historiko di final. Djamars Cicoza a gana ekipo Gamers fásil ku skor di 11-0 ku tremendo picheo di Jose Obispa.Tira blankeo den play-off no ta fásil, sigur kontra un ekipo manera Gamers ku tabatin un tremendo temporada den Liga 40, pero ya.. nan a bolbe terminá number 3 den Liga 40 manera tabata e kaso temporada 2023. Gamers tin algun hungadó bon manera Ryan Samuel, Jair Quant, Roque Zimmerman, Ryan Imperator, Kevin Boekhoudt, Fernando Rosario, Byron Kook, Tyrone Hollander, Jarl Henriquez ets. Obispa a dominá e fuerte ekipo aki kompletu.
* * * * *
Pa loke ta Cicoza, nan tin line-up mas kandela ainda, pendiente pa e gran final kontra di Baranka ku tin 3 siman ta warda e seri final. Hungadónan manera Rodney Riley, Dave Janga, Yurendell de Caster, Andley Simmons, Riency Imperator, Julius Veeris, Senny Petronella, Rodney Michel i Dayron Puriel ets, e ekipo ta fèrfelu i ta spera kandela entre Cicoza i Baranka den e seri final mihó di 3 aki. Djamars benidero ta spera basta bon púbiko na Van Engelen Ballpark pa mira e wega aki ku por ta e último di temporada 2024 di Liga 40. Liga 40 tin basta aña sin ta hala bon públiko manera 10, 15 i 20 aña pasá. Pero basta bon públiko den e promé wega di final kaminda Baranka a gan aku skor di 13-12.
* * * * *
Play-off semi-final di Beisbòl Veterano suspendé. Play-off mester ta Santa Rosa kontra Isla esei ta sigur i e otro mester ta Quality Stars kontra Santa Rosa Memories i naturalmente ekipo Yesterday a protestá e wega i ta ‘claim’ e di 4 lugá debí ku Santa Rosa Memories no a anunsiá e kambio. En todo kaso e wikènt aki skema mester a bira, djasabra 30 di novèmber Santa Maria Pirates kontra Isla Crackers 11 ‘or. Pa 2’or ta Quality Stars kontra di Santa Rosa Memories. Djadumingu 1 di desèmber ta Santa Rosa Memories vs Quality Stars pa 11’or i Santa Maria kontra Isla Crackers pa 2’or. Ya nada no a tuma luga i mester warda te 2025. Pa mas detaye lesa e artikulo di playoff Beisbòl Veterano.
* * * * *
E siman aki nos a pone algún detaye di Liga 60 pa loke ta otro aña. Algún lesadó di nos a puntra ki día ta stòp di laga hungadónan 59+ partisipá den Liga 60. For di 2024 hungadónan ku no kumpli 60 aña no por hunga kampionato ku esepshon di esnan ku ta kumpli 59 aña promé ku kampionato start. Pa 2025 hungadónan ku no tin 60 aña no por hunga den kampionato. E hungadónan aki no por hunga den Kopa ABC&S mas tampoko. Pa loke ta trata torneonan Amstel Bright, Torneo Lions, Torneo Kid Boca Chica parse ku lo laga 59+nan hunga. E kambio di Wimbert Hato di Jaws pa Pitufos i otro notisianan di 60+ a dal formal djarason último. Naturalmente e otro moveshonnan den 50+ tambe a dal formal. Liga 60 ku hopi moveshon e último añanan i otro notisia kayente ta ku Baranka lo bolbe solisitá pa drenta Liga 60. Baranka lo tin ekiponan den Liga 40, 50 i 60+.
* * * * *
Otro aña den luna di mei/yüni Wim Felicia lo kumpli 50 aña tirando Slowpitch. Selebrashon lo bai ta grandi i lo tin un torneo naturalmente ku partisipashon di ekiponan di Aruba, Boneiru, Kòrsou i probablemente Hulanda i Sint Maarten. 20 aña pasá na okashon di selebrashon di 30 aña den Slowpitch di Wim Felicia tabatin un komishon ku ta konsistí di Elvin Regina, Uchi Reina i Ashwin Macaay di Baranka, Anto Leonora di The Best i Junny Pieter e tempu ei di Ebony Café.
* * * * *
Nos a bai bèk den tempu i dal den algún nòmber ku tabata hunga den Liga van Engelen 19 pa 20 aña pasá. Fernando Rosario, Nestor Sosa di Quisqueya, Jose Obispo, Judsel Baranco (QEPD), Clifford Domatilia di Dalpega. Edmar Cornelia, Kenchi Ortega (QPED), Luigi Virginia, Willy Reinita di Baranka. Hensley Wanga, Gregory Ranes, Chal van Thijs di Crazy Tigers. Roy Gregorio, Rudsel Josepha, Jurien Martina di Lions. Giovanni Maduro, Robertico Anita, Roland Adamus i Nelson Reinita di Uniko. Rafael Caraballo Soriano, Jose Cristo Lopez (Pocho), Silvio Cruz i Renato Da Costa Gomez di Swift. Remy Thielman, Miro Daal, Reynaldo Casimiri i Mayron Martinus di Marlins. Patrick Laken, Virgilio James, Shurandy Lourens, Dolfi Mercera, Axel Gomez, Joel Angelista i Eddy Thielman di Navegantes. Nos ta keda te aki pa awe i te djaluna ku Poder di Dios.
