Play-off Liga 60 djadumingu ku Nos Tambe Por vs Jaws i Pitufos/Lions
WILLEMSTAD- Play-off Liga 60 ta start djadumingu awor na Frank Curiel Ballpark ku dos wega. Den e promé wega pa 11’or am ekipo Pitufos lo topa ku Lions den e seri di 3 vs 4 page system. Despues pa 2’or Nos Tambe Por lo enfrentá Jaws den e seri di 1 vs 2.
Nos Tambe Por (1) vs Jaws (2) djadumingu awor 2’or na Frank Curiel Ballpark.
E serinan aki lo hunga solamente un wega. Pèrdèdó di 1 vs 2 lo topa ganadó di 3 kontra 4 i naturalmente e pèrdèdó di 3 i 4 ta eliminá. Ganadó di e seri 1 vs 2 lo pasa dirèkt pa final. E wega semi-final lo tuma lugá otro siman dia 3 di novèmber. E gran final seri mihó di 3 lo start djadumingu 10 di novèmber.
RESULTADONAN
Nos Tambe Por 7, Lions 1
Nos Tambe Por a konektá 7 hit i kometé 1 eror. Richenel Rafaela tabata e picher ganadó e mes a bati di 2-2. Lions a bati 4 hit i kometé 2 eror. Heinrich Weever tabata e picher pèrdèdó. Herbert Lucas a bati di 1-1.
Mon Repos Sluggers 2, Nos Power 1
Mon Repos Sluggers a dal 9 hit i hasi 1 eror. Picher ganadó tabata Eldert Bakker i mihó batiadó Normal Sloop di 3-2, Clint Maynard di 2-2 i Abelino Julia di 2-1. Nos Power a bati 6 hit i kometé 3 eror. Franklin Leuteria tabata e picher pèrdèdo i Tito Rosalia a bati di 2-2. Franklin Leuteria a bai di 1-1.
Yubi Evertsz batting tunnel ta gradisí i anunsiá ganadónan di kompetensia di bateo
WILLEMSTAD- Yubi Evertsz Batting Tunnel/Stichting Batting Tunnel na Groot Piscadera ta gradisí tur ku a yuda i koperá di kualkier forma, ku e tradishonal fundraising di tur aña. Djasabra 12 di òktober 2024 tabata e di ocho(8) biaha ku nos a organisá e aktividat aki, kual a bai hopi bon atrobe. E aktividat aki yama “Best Target Hitter”. Bo ta kumpra un kaarchi di sinku florin i bo mester purba di bati e bala, bon dirigí, pa e por dal den un rònchi den e tunnel.
E aña aki nos tabatin 5 ganadó ku a gana e oportunidat di por hasi uso di e tunnel aki, durante di un ora den e aña 2024/2025.
E ganadónan tabata 1.-Tseandrick Fraay di 9 aña, bishitando Sint Margaretha Colleg grupo 6 di organisashon Sta. Mari; 2.- Thomaz-Jakob Regales di 12 aña, bishitado MIL Havo 1D, di organisashon St. Michiel; 3.- Dencherick Gustina di 8 aña, bishitando Monsieur Niewindt
College grupo 5, di organisashon St. Michiel; 4.- Arjay Pinedo di 6 aña; 5.- Ethan Pinedo di 5 aña, tur dos bishitando Helfrich Krijtschool i tur dos di organisashon Elite.
Riba e pòtrètnan por mira e diferente ganadónan, huntu ku dos(2) dirigente di e batting tunnel.
Un pabien ta bai na tur e ganadónan i ta rekordannan, pa kòrda hasi uso di nan premio.
