Quality Stars ta gana Isla i Santa Maria ta gana Santa Rosa
WILLEMSTAD- Quality Stars a gana Isla Crackers 4 pa 2 djasabra i Santa Maria a gana Santa Rosa ku skor di 7-6 djadumingu den dos wega kandela di Beisbòl Veterano den wikènt. E weganan a tuma luga na Vi Jansen Ballpark. Ku e viktorianan di wikènt ekiponan Quality Stars i Santa Maria Pirates ta keda empatá na promé lugá den Beisbòl Veterano. Santa Maria a laga Santa Rosa den tereno riba hit pa left ku base yen di Eldred Estanista.
Santa Maria tabata dilanti fásil 5 pa 2, pero Santa Rosa a empatá riba homerun di 3 kareda pa right di Signald Paz. Den tie break e ekipo di Santa Maria Pirates komo ekipo di kas ta nota dos kareda pa laga Santa Rosa den tereno ku skor di 7-6. Den otro weganan di wikènt pasá, ekipo Jandoret a gana Otrabanda 12-5. Azucar a gana Marlins 5-1 i Broncos a gana Yesterday 7 pa 5. Standing up to date ta Quality Stars 10-1, Santa Maria Pirates 10-1, Isla Crackers 8-3, Santa Rosa 7-4, Yesterday 6-5, Broncos 6-5, Jandoret Raiders 5-6, Marlins 3-8, Otrabanda 3-8, Azucar 2-9, Flamingos 0-10.
Un Kara a gana Sin Stres 5 pa 1 i klasifiká pa final di Liga di Nos Tur
Djabièrnè 23 di ougùstùs nan a nòkout Shining Stars 11-1 den semi-final.
WILLEMSTAD- Un Kara a gana Sin Stres ku skor di 5 pa 1 djasabra i klasifiká number 1 den e kampionato regular di Liga di Nos Tur. Ekipo ku klasifiká number 1 ta pasa dirèkt pa final. Djabièrnè Un Kara a gana Shinng Stars ku skor di 6 pa 2. Ku e dos viktorianan di wikènt pasá ekipo Un Kara ta klasifiká number 1 den Liga di Nos Tur ku rèkòrt di 10-2, Sin Stres ta terminá 8-4, Shining Stars 6-6 i Join Me 0-12.
Sin Stres i Shining Stars ta bai hunga un seri mihó di 3 i e ganadó lo topa ku Un Kara den final. E seri semi-final entre Shining Stars i Sin Stres a start na Frank Curiel Ballpark. Djabièrnè 23 di ougùstùs Sin Stres a nòkout Shining Stars 11-1 den semi-final.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bondia i wikènt. Beisbòl Veterano i Sòftbòl Slowpitch a sigi den gran forma wikènt ku a pasa. Den Beisbòl Veterano ekipo Quality gana Isla ku skor di 4-2 den un bon partido. Ekipo Isla a habri ku Orsendo Clemencia veteranísmo 60+ ku a tira bon apesar di a tuma hopi hit plamá durante e wega. Orsendo a tuma 4 kareda di kual 3 tabata limpi i a duna 12 hit den 5 inning. E picher slengu Felix Ibañez ku tabata den Vosama kampionato 2023 a bini i saka 3 out sigí. Wega a drei ku un umpire so ku tabata Hooker i tabatin dos ekspulshon di parti di Isla. Bon wega, pero a spera mas fanátiko pa un wega importante asina ei. Naturalmente tin wega na Van Engelen Ballpark, weganan di 50 i Liga Amstel ku ta hala bon públiko djasabra.
* * * * *
En todo kaso Rodney Michel a bati di 3-2 i tira bon den relevo sakando e dos último outnan pa medio di ponche na momentu ku Isla Crackers komo ekipo di kas a menasá den último inning. Den otro partido di Beisbòl Veterano ekipo Jandoret Raiders a gana di Otrabanda ku skor di 12-5. Otrabanda tabata ganá ku skor di 5-2 te den kabes di e di 4 inning, pero Jandoret a nota 2 kareda den di 4 i despues 8 den di 5 inning pa hasi e wega 12-5. Otrabanda ta kargá ku hóbennan di nèt 40 kombiná ku veteranonan 60+ manera Sor Moeskiet, Pursey Schoop i Winston Kirindongo.
* * * * *
Pa loke ta Liga 50, ekipo Baranka a kai vensí ku skor di 10-2 kontra di Jaws. Den otro wega Marlins a gana di Artemisia ku skor di 15-4. Ekipo Flamboyan/Gamers a gana di Ban Serio. Nos ta pendiente pa e skor ofishal. Loke nos a tende si ta ku Wim Felicia a hunga leftfield pa ekipo Ban Serio i presidente di Liga 50, Gilbert Keller di Flamboyan/Gamers a konektá un homerun. Den e último wega ekipo Pitufos a pasa fásil riba Catpower. Awe 23 di ougùstùs tin algun wega kandela. By the way, Liga 40 a start dia 8 di ougùstùs na Van Engelen Ballpark i tabatin 3 wega kaminda dos sorpresa a kai. Awe 23 di ougùstùs tin algun wega kandela.
* * * * *
Ekipo Gamers a gana di e super kampion Baranka ku skor di 10-7. Fernando Rosario ku ta un kos serio den picheo Slowpitch a gana e wega pa Gamers. Fernando ‘Paiza’ Rosario mester ta yegando 60 aña i pa otro aña parse e ta den Liga 60 tambe. Fernando Rosario a dal homerun tambe den e wega ei. E tim Gamers 40 ta tremendo ku vários hungadó di Isla Crackers, manera entre otro Kevin Boekhoudt, Ryan Imperator i otronan. Den e otro wega sorpresa, ekipo Twister a gana di Cicoza 7-5. Farley Lard tabata e picher ganadó pa Twister. Gilbert Henrietta a pèrdè pa Cicoza. Ela tuma 7 kareda di kual 4 tabata kareda sushi. Myson Cathalina tabata di 3-3 pa Cicoza. Varios hungadó di Yesterday den e ekipo Cicoza 40+. Den e otro wega Swift a dal Jaws durísimo den 40+ ku skor di 17-2. Ekipo Jaws a kometé 9 eror i tur kareda di Swift tabata shushi.
* * * * *
Liga di Nos Tur a sigi wikènt pasá ku e último weganan di buelta regular na Frank Curiel Ballpark. Djabièrnè Un Kara a gana di Shining Stars ku skor di 6-2 i gana Sin stres 5-1 djasabra. Promé ku e weganan di wikènt e standing tabata Un Kara 8-2, Sin Stres 7-3, Shining Stars 5-5 i Join Me 0-10. Standing final ta Un Kara 10-2, Sin Stres 8-4, Shining Stars 6-6 i Join Me 0-12. Ekipo ku sali number 1 lo bai final dirèkt, miéntras 2 i 3 lo hunga kontra di otro. Ekipo Join Me a keda number 4 i a keda for di play-off. Nos ta keda te aki pa awe i te mayan ku Poder di Dios.
