Quality Stars ta gana Santa Maria Pirates 9-3 den Beisbòl Veterano
WILLEMSTAD – Quality Stars ku bon picheo di Farley Ignacio ta gana Santa Maria relatívamente fásil ku skor di 9 pa 3. E dos promé weganan di djadumingu 1 di sèptèmber a keda suspendé pa motibu di awaseru i mal estado di tereno. Rodney Michel tabata grandi na bate bayendo di 4-3. Emile Haswell Jr i Merieldo Trinidad tabatin 2 kareda empuhá. Den e otro weganan di wikènt, djasabra 31 di ougùstùs, Azucar a gana Jandoret 10 pa 2. Otrabanda a derotá Broncos 9 pa 3 i Santa Rosa a dal Marlins 7 pa 3.
Seri final di Liga Di Nos Tur ta empatá na unu
WILLEMSTAD- E seri final di Liga di Nos Tur a tuma lugá djabièrnè i djasabra na Frank Curiel Ballpark. Sin Stres a gana djabièrnè ku skor di 9-8 i djasabra Un Kara a empatá e seri ganando 11 pa 3 di Sin Stres.
Djabièrne dilanti un públiko grandi na Frank Curiel Ballpark, ekipo Sin Stres kampion di Liga di Nos Tur 2023 a gana Un Kara ku e skor ariba menshoná. Sonna Valies di Sin Stres tabatin un hugada klave den último inning ku e wega ganá 9-8. Riba un flai pa right e rightfielder Sonna Valies ta kue e bala, pa despues tira pa saka dòbel play na home plate. Hugada krusial i despues out number tres a kai pa terminá e wega ku kareda di empate pa Un Kara na tersera. Ekipo Un Kara tabata ‘home team’. Marie Windster tabata e picher ganadó pa Sin Stres, ela tira henter e wega.
Manager di Un Kara ta papia ku hungadónan despues di wega.
Djasabra 31 di ougùstùs ekipo Un Kara ku tabata lomba kontra muraya a bini bèk i empatá e seri. E picher Anoushka Delando a habri e wega pa Sin Stres djasabra. Milangela ‘Lula’ Leito tabata e picher ganadó pa Un Kara djasabra, ela tira wega kompletu.
Ta spera un públiko super grandi djabièrnè awor pa e wega finalísimo di e seri final mihó di 3. E wega number 3 ta planiá pa start 8.30. Manager di ekipo Un Kara ta Gerald Mathilda i di ekipo Sin Stres ta Rodney Riley.
General Manager di ekipo Un Kara Siegfried ‘Pepi’ Martis a bisa ku nan ta trankil i ta pidi fanátikonan pa yega djabièrnè 6 di sèptèmber. Pèpi ta den dugout tur wega. E general manager di Sin Stres ta preferá di wak e wega den tribune.
MAS INFORMASHON DI BEISBÒL I SÒFTBÒL
Fanátikonan di Deporte Kòrsou, bondia i felis siman.. Beisbòl Dòbel A a sigi djasabra kaminda Santa Maria a gana di Royal Scorpions ku skor di 5 pa 2. Jonathan Schoop tabata grandi den tur e dos weganan bayendo di 3-2 e promé wega i di 2-2 djasabra anochi. Santa Maria ta mustra fuertísimo rumbo pa playoff semi-final. Ayera mester tabatin dos wega di Beisbòl Dòbel A. Un palu di awa a kai djasabra kasi rònt Kòrsou.
* * * * *
Pa loke ta trata Beisbòl Veterano, tabatin dos sorpresa djasabra na Vi Jansen Ballpark. Den e promé wega di djasabra ekipo Azucar a dal Jandoret Raiders ku skor di 10-2 i den e sigiente wega Otrabanda a derotá Broncos relatívamente fásil ganando ku skor di 9-3. Broncos tabata menasá pa yega number 4 hopi serka di Santa Rosa, pero debí na e derota sorprendente ei nan a bai di 5 lugá hopi serka di ekipo Yesterday. Interesante e kampionato for di puesto number 1 te ku 9 riba e standing.
* * * * *
Den Liga di Nos Tur e seri final a splet. Djabièrnè ekipo Sin Stres a gana di Un Kara ku skor di 9-8 den un wega ku a bai extra inning. Den Tie Break ekipo Sin Stres a gana. Djasabra ekipo Un Kara a dal Sin Stres duru ku skor di 11-3. Ekipo Sin Stres a warda e picher Marie Windster ku a gana djabièrnè pa e sigiente siman djabièrnè. E picher Anoushka Delando a habri e wega pa Sin Stres djasabra. Ta spera un públiko super grandi djabièrnè awor pa e wega finalísimo di e seri final mihó di 3. Djabièrnè si nos tabata presente i a mira un públiko grandi. Den Frank Curiel Ballpark tin hopi espasio den right parti foul i den outfield tambe tras di fèns den rightfield hopi hende ta wak wega.
* * * * *
Nos tin mas detaye di e promé wega ku nos tabata presente. Sin Stres ta gana e promé wega di play-off final den Extra Inning ku skor di 9-8. E wega ku a tuma lugá djabièrnè 30 di ougùstùs, ku apesar di Jazz Festival ku artistanan popular manera Juan Luis Guerra i Marc Anthony aya na WTC tòg tabatin un públiko grandi na Frank Curiel Ballpark. Sonna Valies di Sin Stres tabatin un hugada klave den último inning ku e wega 9-8. Riba un flai pa right e rightfielder Sonna Valies ta kue e bala, pa despues tira saka dòbel play na home plate. Hugada krusial i despues out number tres pa terminá e wega ku kareda di empate pa Un Kara na tersera. Ekipo Un Kara tabata ‘home team’.
* * * * *
Djasabra 31 di ougùstùs ekipo Un Kara ku tabata lomba kontra muraya a bini fuerte for di promé inning ku 5 kareda pa empatá e seri. Un viktoria pa Sin Stres djasabra anochi lo a nifiká ku nan lo tabata kampion di Liga di Nos Tur pa di dos aña sigí. Manera nos a splika anteriormente Sin Stres a gana e promé kampionato di Liga di Nos Tur na aña 2018 i gana despues na 2023. Un Kara a gana na 2019, 2020, 2021 i 2022.
* * * * *
Beisbòl Dòbel A hopi interesante den e último buelta aki, buelta number 5. Marchena Braves a kai afó ku rèkòrt di 2-20, Groot Kwartier a klasifiká number 5 ku rèkòrt di 7-15. Djasabra Santa Maria a gana Royal Scorpions (16-7) 5 pa 2 i bai number dos ku rèkòrt di 15-8. Santa Rosa tabatin 14-8, Wild Cats 13-9. E standing aki ta promé ku e weganan di djadumingu. Djadumingu mester tabatin wega entre Wild Cats i Groot Kwartier den oranan di mèrdia i Marchena Braves vs Santa Rosa den oranan di anochi.
%2520copy.jpeg)
* * * * *
Nos tin e resultadonan di Liga 50 ku a tuma lugá djasabra na Van Engelen Ballpark. Pitufos a dal Artemisia 9 pa 2, Baranka mester a lucha pa gana Catpower 9-7. Jaws a gana Flamboyan/Gamers pèrtá ku skor di 6-5. Despues ku Jaws a pèrdè kontra Baranka dia 22 di yüni, nan no a pèrdè mas. E ekipo tin 6 wega ganá sigí. Sluggers a dal Lions 11-5. Sluggers no a pèrdè wega den ougùstùs i a dal dos grandi den ougùstùs, entre otro Baranka i Pitufos. Te mayan ku Poder di Dios.
