RBC a entregá material nobo na tur ekipo di Little League
WILLEMSTAD - Djamars 21 di sèptèmber 2021, RBC Royal Bank N.V. (RBC) a entregá material na representantenan di tur organisashon di Beisbòl Little League di Kòrsou (CLL).
Durante un enkuentro ku a tuma luga na sede di Federashon Futbol Korsou (FFK) na Brievengat, tur ekipo di Little League a risibí un ‘outfit’ di kètcher, bate i un kaha di bala. Sharier Dorand, Branch Manager kende a representá RBC a entregá e materialnan ariba menshoná den presensia di District Administrator Urny Floran i representantenan di ekiponan di CLL. Dorand a dirigí palabra i a bisa: “Nos tur ta sinti e efektonan di e pandemia. E tempu i nos bida normal a kambia pero ku kreatividat nos a krea oportunidat pa logra muchu mas. E ta importante pa fókùs riba e positivo i sigui kwida i yuda otronan, asina nos lo logra un mihó Kòrsou pa nos tur. Un danki na tur ku ta sali nan kas determiná pa hasi bon i traha riba un mihó futuro pa nos hobenan na Kòrsou, huntu ku RBC.”
Aña 2020, tabata un aña fèrfelu pa e mundu deportivo. Debi na Covid-19 e torneo anual di Little League beisbòl no por a tuma lugá. Komo solushon kreativo, RBC a entrega unifòrm na 1.500 mucha ku ta hunga Beisbòl Little League. E entrega di material di djamars último ta konforme e kontrakt ku RBC a firma resientemente ku liganan di Little League. Fuera e sosten finansiero komo parti di spònser prinsipal di e kampionato i liganan, RBC ta aportá na proyektonan manera klinika pa umpire, kongreso, upgrade di coachnan, mayor dirigentenan i e hobennan.
