RBC a entregá unifòrm na selekshonnan di Little League di Kòrsou
WILLEMSTAD- RBC Royal Bank, spònser di Curacao Little League Baseball, djaweps 2 di yüni 2022 a entregá unifòrm na selekshonnan di Little League di Kòrsou, ku lo hunga den e kampionatonan di Karibe i Latino Americano di nos region. Naturalmente a entregá unifòrm na e dos selekshonnan Intermediate League di Kòrsou, selekshon di Pabou i di Pariba ku lo representá Kòrsou den e kampionato Latino Americano ku lo tuma lugá na Kòrsou di 26 di yüni pa 3 yüli 2022.
E entrega simbóliko di unifòrm a tuma lugá na Frank Curiel Ballpark den presensia di tur hungadó i dirigentenan di selekshon di Liga Pariba i Liga Pabou. A entregá unifòrm simbólikamente na selekshon Little, Intermediate, Junior i Senior di Liga Pabou. Na Liga Pariba a entregá unifòrm na selekshonnan Little i Intermediate. Di parti di spònser RBC a hiba palabra sr. Pierrot Hurtado Country Manager di RBC Kòrsou i Boneiru i District Administrator sr. Urny Floran. Pa di tres biaha den historia e entrega a tuma lugá dilanti tur delegashon, esta hungadó di tur selekshonnan di liganan menshoná i nan dirigentenan.
Pierrot Hurtado a bolbe mustra riba e importansia di nos Hubentut pa ku futuro di Kòrsou i ku RBC Royal Bank lo sigui yuda den desaroyo di hóbennan na Kòrsou. Pierrot Hurtado a deseá nos selekshonnan éksito na Korsou i éksito tambe na esnan ku lo kompetí den eksterior.
Urny Floran a gradisí RBC atrobe pa e aporte na Little League, den e kaso aki unifòrm pa nos muchanan. Manera ta konosí RBC ta spònser biahe i unifòrm tambe di delegashonnan di Beisbòl Little League, ku lo biaha pa eksterior. Nos pelotero- i e coachnan ta bon prepará i naturalmente lo ta bon bistí pa representá Kòrsou dignamente aki na Kòrsou i e otro selekshonnan ku lo biaha pronto pa eksterior.
Na final di e parti ofishal tur e hungadónan di e selekshonnan menshoná na huntu a bisa: “Masha Danki RBC”
RBC lo ta presente na apertura i durante weganan di e kampionato di Latino Americano di Intermediate League pa apoyá nos hóbennan di 11 pa 13 aña. E kampionato di Intermediate lo tuma lugá den Stadion Post 6 di 26 di yüni pa 3 di yüli 2022.
Na momentu ku e selekshonnan ta biaha, RBC lo tei na aeropuerto pa yama nos hóbennan ayó i deseá nan suerte den e kompetensianan.