RBC a entregá unifòrm na selekshonnan di Little League i kampionato di Karibe Senior ta start djaluna
WILLEMSTAD – Djamars 20 di yüni tabatin entrega di unifòrm na selekshonnan di Little League ku den simannan benidero lo representá Kòrsou den kampionatonan di Karibe i Latino Americano. E entrega simbóliko di unifòrm a tuma lugá na brènch di RBC den presensia di tur hungadó i dirigentenan di selekshon di Liga Pariba i Liga Pabou.
Durante e entrega di uniform a duna prensa i esnan presente detayenan di e kampionatonan di Karibe Senior i Latino Junior ku lo tuma lugá na Kòrsou.
E kuater selekshonnan di Senior i Junior League di Kòrsou, (Pariba i Pabou) a risibí nan unifòrmnan simbólikamente huntu ku selekshon Minor, Intermediate i Little League.
Managing Direktor di RBC Royal Bank Pierrot Hurtado a dirigí palabra i a papia riba e historia i relashon ku nos a forma ku Curaçao Little League, i tambe riba e filosofia di Little League i RBC Royal Bank.
“Deporte i den e kaso aki Little League ta un instrumento importante pa yega na un mihó Kòrsou den futuro. Komo parte di RBC su vishon pa yuda komunidatnan prosperá, e banko ta sigui invertí den Little League i ta orguyoso di ta spònser prinsipal ya pa 23 aña.” Hurtado a sigui bisa ku tur hobennan di selekshonnan di Little League, e coachnan i boluntarionan ta un bon ehèmpel, no solamente pa muchanan di Kòrsou, pero tambe di henter Karibe, i rònt mundu. E apoyo di banko a yuda atraves di añanan pa pone Little League, i pais Kòrsou bira mas konosí.
For di tempu RBC a drenta Little League eksitonan a kuminsá. E banko no a hasié pa éksito, pero pa formashon di nos muchanan i nan a liderá ku a redundá den èksito tantu riba komo pafó di tereno.
E eksito di Little League tambe tin un efekto positive riba turismo for di region i USA. Esei a keda demonstrá ku sifra ku durante nos muchanan ta hungando na Williamsport kuantu like i kuantu biaha Merikanonan i sigidó di deporte rònt mundu ta subi sitenan di Korsou i di CTB.
Urny Floran a gradisí RBC atrobe pa e aporte na Little League, den e kaso aki unifòrm pa nos muchanan. Manera ta konosí RBC ta spônser biahe i unifòrmnan di delegashonnan di Beisbòl Little League, ku lo biaha pa eksterior. Nos pelotero- i e coachnan ta bon prepará i naturalmente lo ta bon bistí pa representó Kòrsou dignamente aki na Kòrsou i e otro selekshonnan ku lo biaha pronto pa eksterior.
E apertura i weganan di e kampionato di Karibe di Senior pa hóbennan di 15 i 16 aña ku ta tuma lugá den Tio Daou Ballpark. E kampionato ta di 25 di yüni pa 2 di yüli. Despues di 16 di yüli pa 23 di yuli lo tin kampionato Junior Latino (13-14 aña) na Tio Daou Ballpark. RBC ta invitá pueblo for di awor pa bai Tio Daou Ballpark pa apoyá nos peloteronan. Selekshonnan, Minor Little i Junior tambe lo move eksterior ku unifòrm di spònser pa RBC.
Manera ya a bira un tradishon, na momentu ku e selekshonnan ta biaha, RBC lo tei na aeropuerto pa yama nos hóbennan ayó i deseá nan suerte den e kompetensianan.
