RBC a start play-off di Little League ofishalmente i kandela entre Pariba i Pabou djabièrnè anochi
WILLEMSTAD- Play-off di Little League 2023 a start djamars 25 di aprel na Frank Curiel Ballpark i djarason 26 di aprel den oranan di anochi tabatin apertura ofishal. Dilanti un públiko grandi spònser number 1 di Little League ya pa 23 aña RBC tabata presente pa hasi e apertura ofishal.
Branch Manager Sharier Dorand tabata presente na nòmber di RBC i a hiba palabra na e apertura. Sr. Dorand a bolbe papia di e importansha di boluntarionan den Little League i tabatin hopi apresio pa nan trabou. Dorand a pone énfasis ku ta trata di un wega di mucha i mayornan i esnan mas grandi mester apoyá e muchanan. Dorand a pidi pa tur mucha pa hasi nan best pasobra for di awor nan ta ehèmpel pa e otro muchanan. “Esei ta pone ku mas mucha ta haña gana di kuminsá hunga Beisbòl i otro deportenan. Pelotero i nan mayornan ban gosa, disfrutá di manera ku kosnan positivo di Beisbòl i di Kòrsou lo sali den medionan di komunikashon.”
District Administator tambe a hiba palabra i a pone hopi énfasis riba e filosofía di Little League i e huramentashon di e hóben peloteronan, di coachnan i di fanátikonan. Ela para ketu na e komportashon di fanátiko i bisa ku e komportashon ta tremendo den play-off. Direktor di kampionato sr. Norval ‘Payo’ Faneyte a hiba palabra durante e apertura ofishal. Despues di e sake di promé bala a start ku e wega di Little League entre Pariba i Pabou.
Promé ku e apertura ofishal tabatin wega di Minor League entre Pariba i Pabou. Play-off Little League ta sigi ku weganan Minor i Little League na Frank Curiel Ballpark te ku dia 29 di aprel. Pa loke ta trata kategoría Junior i Senior lo tin play-off dianan 30 di aprel i 1 di mei na Tio Daou Ballpark. Kampionato di Intermediate ta tumando lugá na Muizenberg Ballpark i Stadion Post 6. Ahunto nos ta manda skema di e weganan.
Liga Pabou invikto den Little i Liga Pariba invikto den Minor
WILLEMSTAD- Play-off di Little League a sigi djarason i djaweps den Frank Curiel Ballpark. Ekipo di Liga Pabou tin dos wega ganá i invikto den Little League i ekipo di Pariba Minor ta sólido ku dos wega ganá i invikto. Djaweps Dia di Rei Pabou mester a topa Willemstad den Minor i den Little tabata Pariba kontra di Willemstad. Tantu Pabou Little komo Pariba Minor ta sólido i faborito pa klasifiká den nan divishon.
RESULTADONAN
Pariba 13, Willemstad 0 (Minor)
Pariba a dal 9 hit i hunga sin kometé eror. Javiro Hamen tabata e picher ganadó i e mes a bati di 2-2.
Willemstad a konektá 1 hit i hasi 6 eror. Orlandjelo Zimmerman tabata e picher pèrdèdó. Zylor Hooi a bati di 1-1.
Pabou 5, Pariba 0 (Little)
Pabou a dal 5 hit i kometé 2 eror. Juan Ramon Ferreras a gana. Jay-Dlinn Wiel i Nasi El Osais a bati di 3-2. Jay-Dlinn Wiel a bati un homerun i empuhá 3 kareda.
Pariba a bati 2 hit i hasi 3 eror. Raygentley Rifaela tabata e picher pèrdèdó. Quaysinn Rojer a bati di 1-1. Gianniro Martina di 2-1.
Pabou 11, Willemstad 0 (Minor)
Pabou a bati 5 hit i hunga sin kometé eror. Tyresse Martha tabata e picher ganadó i e mes a bati di 1-1.
Willemstad a dal 3 hit i kometé 2 eror. Gerald Maduro tabata e picher pèrdèd. Jaymiël Martina a bati di 3-2.
Pariba 14, Willemstad 0 (Little)
Pariba a dal 7 hit i hunga sin eror. Denzen Sint Jago tabata e picher ganadó i Raygentley Rifaela a bati di 2-2, Quaysinn Roger di 3-2.
Willemstad no a konektá hit i a kometé 5 eror. Jonathan Martina tabata e picher pèrdèdó.