RBC ku apertura ofishal Torneo Kenley Jansen

WILLEMSTAD- Djasabra 20 di febrüari na Tio Daou Ballpark tabatin apertura ofishal di Torneo Kenley Jansen.  Ta trata aki di un torneo kaminda tur ekipo di Junior i Senior League (13 pa 16 aña) di Kòrsou ta partisipá. RBC Royal Bank spònser number 1 di Beisbòl Little League ya pa 21 aña kaba, ta patrosiná e torneo menshoná ku koperashon en grande di nos Big Leaguer Kenley Jansen.

Sharier Dorand, branch manager di RBC Royal Bank a dirigí palabra durante e apertura ofishal. Ela gradisí otro spònsernan ku ta yuda RBC Royal Bank, spònser prinsipal di Little League ku ta kontribuí.

‍

Branch Manager Sharier Dorand a hiba palabra i splika atrobe e motibu di spònsering di RBC Royal Bank di tur e añanan. Nos hubentut ta nos futuronan di mayan i e filosofia di Little League ta pas ku e maneho di RBC Royal Bank, esta krea lidernan pa futuro. Sharier Dorand a gradisi Kenley Jansen i tur otro spònser ku ta yuda RBC Royal Bank den e kousa. Ela bisa ku huntu mester kontribuí ku e muchanan ku ta nos lidernan mayan.

District Administrator, Urny Floran dirigiendo palabra. Floran a anunsiá ku kampionato Junior Latino Americano ta na Kòrsou. Floran a splika tambe kon e torneo Kenley Jansen di Junior i Senior ta hinka den otro

Tambe tabata presente district administrator sr. Urny Floran i direktor di FDDK, sr. Virgilly Winklaar. Tantu Urny Floran komo Virgilly Winklaar a dirigí palabra durante e apertura ofishal. Ekiponan di Junior i Senior League di Kòrsou di tur e tres liganan ta partisipá na e torneo ku mester a start den òktober 2020, pero debí na Covid a start den febrüari 2021. Lo hunga mas ku 200 wega durante e torneo.  Despues di e apertura tabatin algun tremendo wega na Tio Daou Ballpark. Tur wikènt tin weganan di e torneo na Montab Ballpark, Tio Daou Ballpark i Shon Ki Nicasia Ballpark. Mientras tantu kampionatonan di Minor i Little League di Liga Pabou, Willemstad i Pariba tambe a start.

Virgilly Winklaar direktor di FDDK dirigiendo palabra. Ela papia na nòmber di FDDK i di Gobièrnu di Kòrsou.
Ekipo Brievengat Junior durante himno di Kòrsou

‍

Ekipo Sint Michiel Junior League durante himno di Kòrsou

‍

Virgilly Winklaar di Fundashon Desaroyo Deportivo Korsou (FDDK) ta tira promé lansamentu
Sharier Dorand di RBC Royal Bank ta batiadó i District Administrator ta umpire
Invitadonan speshal Sharier Doran, branch manager di RBC Royal Bank, District Administrator, Urny Floran, Virgilly Winklaar direktor di FDDK, representante Liga Pariba sra. Emmylou Jakoba, representante di Liga Pabou Kursley Kuwas i Amado Victoria den representashon di Gobièrnu.

‍

‍