RBC Royal Bank ta entrega unifòrm na ekiponan di Little League Liga Pabou
WILLEMSTAD- RBC Royal Bank, spònser number 1 di Little League ya pa 20 aña, ta sigi invertí den desaroyonan di nos hóbennan. Djaweps 1 di òktober 2020 na Frank Curiel Ballpark, Managing Director di RBC Royal Bank, sr. Pierrot Hurtado a entregá unifòrm na ekipo i dirigentenan di Liga Pabou.
E entrega a tuma lugá den presensia di District Administrator sr. Urny Floran i sr. Eugene Sambo, presidente di Liga Pabou ku su direktiva. Naturalmente peloteronan di Liga Pabou i nan coachnan tabata presente.
E aña aki debí na e krísis en konekshon ku COVID-19, algun spònser a kai afó i RBC Royal Bank a primintí durante firmamentu den luna di yüli ku lo remplasá e spònsernan durante e temporada di krisis. RBC lo spònser varios ekipo di Liga Pabou, Liga Pariba i Liga Willemstad i a entregá kantidat di unifòrm na Liga Pabou, pa despues sigi ku Liga Pariba i Liga Willemstad. En total RBC Royal Bank a entregá 500 unifòrm pa e hóben pelotero i tambe dirigentenan di Liga Pabou.
Durante e enkuentro ku Prensa ku a tuma lugá na Frank Curiel Ballpark, a hiba palabra Pierrot Hurtado, Urny Floran i Eugene Sambo, pa despues hasi entrega di e unifòrmnan simbólikamente. Pronto lo entregá unifòrm na Liga Pariba i Liga Willemstad.
