RBC ta entregá unifòrm na Liga Willemstad i umpirenan di Little League
WILLEMSTAD – Djarason, 18 di novèmber 2020 RBC Royal Bank N.V. (RBC) spònser prinsipal di Beisbòl Little League pa 20 aña a entregá unifòrm na Liga Willemstad i na umpire/skorernan. E entrega di unifòrm di Little League a tuma lugá na Kolegio Amador Nita na Salinja.
Resientemente RBC a entregá unifòrm na Liga Pabou i e banko ta pendiente pa entregá unifòrm na Liga Pariba tambe.
E aña aki debí na e krísis en konekshon ku COVID-19, algun spònser a kai afó, pero RBC ta sigui hasi su esfuerso pa Curaçao Little League Foundation (CLL). Managing Director di RBC Royal Bank N.V., Pierrot Hurtado a bisa: “Den e temporada ekstraordinario aki debi na e coronavirus pandemia, mas ku nunka nos mester keda enfoká riba e formashon i edukashon di nos hóbennan. RBC ta keda komprometí na nos hubentut di Kòrsou ku ta e futuro di Kòrsou.” Hurtado a sigui: “Nos a keda den kòmbersashon ku CLL i konhuntamente nos a yega na un solushon adekuá pa nos por sigui apoyá nos deportistanan den e temporada di COVID-19. Komo parti di e programa adaptá 2020 di CLL, RBC ta spònser ekiponan di Liga Pabou, Liga Pariba i Liga Willemstad, pa motibu ku varios ekiponan no ta tin sponsor e aña aki.”
En total RBC Royal Bank a entregá 500 unifòrm pa e hóben pelotero i tambe dirigentenan di Liga Pabou resientemente i awe 500 unifòrm di Liga Willemstad. Tambe, den luna di yüli RBC Royal Bank a organisá un kurso di introdukshon eksitoso pa umpirenan.
Hurtado a entregá unifòrm na ekipo i dirigentenan di Liga Willemstad den presensia di District Administrator sr. Urny Floran i sra. Marelva Clementina, presidente di Liga Willemstad ku su direktiva. Simbólikamente a entregá unifòrm pa umpire i skorer na hefe di umpire i skorernan, sr. Sandley Martina. Den su spich sr., Hurtado a mustra riba e importansia di umpire- i skorernan pa desaroyo di Beisbòl Little League.
