RBC ta sigui apoyá desaroyo di hubentut di Kòrsou Pa di 20 aña RBC ta firma kontrakt ku tres liga di Little League

RBC ta sigui apoyá desaroyo di hubentut di Kòrsou Pa di 20 aña RBC ta firma kontrakt ku tres liga di Little League

WILLEMSTAD - RBC Royal Bank N.V. a firma kontrakt di spònser ku Curacao Little League Foundation, Liga Pabou, Liga Pariba i Liga Willemstad di Little League Beisbòl.

Ta di 20 aña konsekutivo ku RBC ta spònser Little League Beisbòl.  E firmamentu di kontrakt aki mester a tuma luga inisialmente dia 18 di mart 2020 pero manera ta konosí, Kòrsou i rònt Mundu a keda konfrontá ku e pandemia COVID-19 ku a paralisá tur moveshon di deporte.

Pierrot Hurtado, Managing Director di RBC Royal Bank N.V. ta bisa: “Awor mas ku nunka nos mester keda fókùs riba e formashon i edukashon di nos hubentut. Rònt Mundu i tambe na Kòrsou e krísis di corona a afektá e kondishonnan finansiero i ekonómiko. No opstante esaki, RBC ta keda komprometi na nos hobennan di Kòrsou. Ora e Coronavirus a kuminsá impaktá nos region i nos islanan, nos a reflekshoná kon nos por sigui ku nos kompromiso ku Little League. Nos a keda den kòmbersashon ku CLL pa haña un solushon adekuá pa nos por sigui apoyá nos deportistanan den e temporada di COVID-19. Asina, CLL a presentá un programa adaptá pa 2020, kaminda nan tin nos sosten total.”

RBC, huntu ku District Administrator i Curacao Little League Foundation a mobilisá i bini ku un plan i proyekto nobo p’asina garantisá kontinuashon di Little League den 2020. E proyektonan ta konsistí entre otro di klínika/tayer di beisbòl tantu riba tereno práktiko komo mental pa e hoben, coach, dirigente i mayornan. E kategoria Baby, T Ball, Pre Minor lo siguí manera plania. RBC lo bai spònser torneonan tradishonal di e di dos mitar di aña manera entre otro Torneo Creme de La Creme (Minor i Little League), Shon Ki Nicasia Junior Tournament i Torneo Vernon Isabella. Pa e siman benidero lo tin un kurso pa umpirenan kaminda pa di promé biaha lo kuminsá duna e kurso pa hobennan for di 13 aña te ku adulto mayor. RBC ta kubri tur gastu di e kurso basiko di umpire aki. Mas despues den e di dos mitar di aña tin kurso pa skorer tambe.

Segun Hurtado e fókùs di e programa adaptá ta riba nos deportistanan hubenil i tambe riba e boluntarionan di CLL, pa nan por sigui traha riba formashon i kalidat di e deporte. E aña aki tin diferente tim ku no tin spònsor i einan RBC tambe lo duna sosten finansiero, pa unifòrm inkluso material di entrenamentu. Asina, manera nos a bin ta demonstrá e ultimo 20 añanan aki, RBC tei huntu ku CLL, pa yuda nos hubentut, tambe den e tempunan di reto aki.

Representantenan (Presidente) di e diferente liganan, District Administrator i RBC a firma e kontrakt durante un enkuentro ku Prensa na ofisina prinsipal di e banco na Rooi Catootje.

E aña aki mester tabatin un kampionato di Intermediate League (11 pa 13 aña) na Kòrsou den luna di yüli. Aki tambe RBC tabatin su aporte finansiero reservá pa kubri gran parti di e torneo menshoná pero e motibunan di kanselashon ta konosí (Covid-19).

RBC den su afan pa yuda forma Hubentut komo nos futuro di mayan ta sigui spònser Beisbòl Little League. RBC ta sumamente orguyoso di ta un patrosinadó prinsipal yudando mas ku 1300 hóben ku ta praktikando e deporte Beisbòl. E filosofía di Little League ta kuadra ku e filosofía di RBC, esta formashon di hóbennan ku ta e pilánan di desaroyo di Kòrsou, Aruba , Boneiru i Sint Maarten. RBC ta spònser Little League na Aruba, Boneiru i Sint Maarten tambe.

PATROSINADO
E kontribushon (spònser) di RBC ta destiná entre otro, pa kubri gastunan relashoná ku representashon den eksterior, material, drechamentu di tereno, seminario i unifòrm.
Mester apuntá ku for di aña ku RBC a kuminsá patrosiná Little League, éksitonan den eksterior a kuminsá:
• 2002 Senior Kampion Mundial;
• 2004 Little League Kampion Mundial;
• 2008 Junior League Kampion Mundial;
• 2018 Senior League kampion Mundial;
• 2005 supkampion Mundial Little League;
• 2019 supkampion Mundial di Little League;
• 2019 supkampion Mundial di Senior League;
• Den semi-final di Kampionato Mundial Senior League 2003;
• Semi-final di Mundial Little League 2001, 2002, 2003, 2005 i 2007;
• Ganadó kampionato di Karibe i partisipashon den Mundial di Little League na Williamsport  di 2001 te ku 2009 i despues na 2012, 2016 i 2019 tambe;
• 2014 Ganadó di kampionato Latino Americano den divishonnan Junior, Senior i Intermediate;
• 2015 Kampion Junior i Senior;
• 2016 Kampion Intermediate i Big League;
• 2017 Kampion Klásiko Latino di Beisbòl Hubenil;
• 2018 Kampion Karibe di Senior League ;
• 2019 Kampion di Karibe di Senior;.
• 2019 Kampion di Little League.

EVENTONAN
Próksimo evento ku RBC ta spònser lo ta kurso basiko di umpire ku ta di 31 di yüli pa 2 di ougùstùs den Tio Daou Ballpark.

Teksto pa pòtrèt:
Pierrot Hurtado, country manager di RBC Royal Bank ta dirigí palabra.
Urny Floran, District Administrator na palabra.
Pierrot Hurtado ta firma kontrakt na nòmber di RBC Royal Bank.
Presidente di Liga Pabou Eugene Sambo ta firma kontrakt na nòmber di nan liga.
Miembro di direktiva di Liga Pariba Urving Faneijte ta firma kontrakt.
Tur dirigente i representantenan di RBC Royal Bank despues di firmamentu di kontrakt.
Sra. Marelva Clementina ta dirigí palabra na nòmber di Liga Willemstad.
Lando Chirino ta firma kontrakt na nòmber di Liga Pre Minor.
Sharier Dorand di RBC Royal Bank ta dirigí palabra durante firmamentu di kontrakt.
Sra. Marelva Clementina di Liga Willemstad ta entregá plakat na RBC komo muestra di apresio di ‘sponsoring’ i pa Kòrsou ban traha huntu despues di e Covid-19.

Tokante RBC den Karibe
Ku mas ku 110 aña di servisio dediká na e region, RBC ta presente den 17 pais i teritorio, ku 52 brènch i mas ku 3.000 empleado sirbiendo mas ku un mion kliente. Komo un di e kompanianan prinsipal den Karibe di servisionan finansiero diversifiká, RBC ta proveé servisio bankario personal i komersial, wealth management, corporate i investment banking, seguro, servisio di trust i asset management na un skala grandi di kliente, inkluyendo individuo, negoshi chikí, entidatnan komersial general, empresanan regional i multinashonal i gobièrnunan. Pa mas informashon, por fabor bishitá rbc.com/caribbean.

Tokante RBC
Royal Bank of Canada ta un institushon finansiero Mundial, ku un enfoke dirigí riba meta i ku prinsipionan orientá pa brinda un desempeño di guia. Nos éksito ta bini di e 86.000+ empleado ku ta duna bida na nos vishon, balornan i strategia pa asina nos por yuda nos klientenan floresé i komunidatnan prosperá. Siendo e banko di mas grandi di Canada, i un di e bankonan di mas grandi na Mundu basá riba kapitalisashon di merkado, nos tin un modelo di negoshi diversifiká ku un fókùs riba inovashon i suministrando eksperensianan eksepshonal na nos 16 mion klientenan na Canada, Estádos Unídos i 33 otro pais. Pa mas informashon, por fabor bishitá  rbc.com.

Ku orguyo nos ta sostené un skala amplio di inisiativa den komunidat pa medio di donashon, invershon den komunidat i aktividat boluntario di empleado. Mira kon na rbc.com/community-sustainability