Resumen 60+
Nos Tambe Por kampion Sòftbòl Liga 60+ 2020
WILLEMSTAD – Nos Tambe Por a dal Jaws 12 pa 4 djadumingu 22 di novèmber 2020 i bira kampion di Sòftbòl Liga 60+. Ta di dos biaha sigí ku Nos Tambe Por ta bira kampion di Liga 60. Na 2019 e ekipo a gana di mesun Jaws den e seri di 3 wega pa bira kampion. Bon públiko apesar di Covid-19 pa mira e weganan ku a tuma lugá na Frank Curiel Ballpark.
Edson ‘Son’ Sophia a bati di 3-3, dal dos homerun i empuhá 8 kareda i bira ‘player of the game’. Wim Felicia ku a relevá Siegfried Lopez for di den promé inning a bira e picher ganadó. Despues di wega tabatin entrega di premio. Durante kampion regular ekipo Nos Tambe Por a terminá ku rekòrt di 7-0 invikto. Despues gana ekipo Lions ku a sali number 2 ku 5-1 i bai final dirèkt. Ekipo Jaws a gana Amigos den e play-off di number 3 vs 4. Jaws a gana Lions tambe pa despues bai final. Den final Nos Tambe Por a pasa fásil riba ekipo Jaws.
Nos Tambe Por 12, Jaws 4
Nos Tambe Por tabatin 11 hit i nan a kometé 3 eror. Picher ganadó tabata Willem Felicia. Edson Sophia bai di 3-3. Rignald Hooi ku Richard Coffie, ámbos a bai di 3-2. Emile Haswell, Renato Anasagasti i Jeromin Willems, tur a bai di 2-1. Edson’Son’ Sophia a konektá 2 homerun. Pa Jaws 6 hit ku 3 eror. Riley Toppenberg a resultá picher pèrdèdó. Francees Petronilia, Rudsel Paulina ku Wimbert Hato, tur a bai di 2-1. Ruvio Kook, Ericson Liberia ku Simeon Curie, tur a bati di 3-1.
PREMIO
Kampion: Nos Tambe Por;
Supkampion: Jaws;
Di tres lugá: Lions;
Di kuater lugá: Los Amigos.
