Resumen Liganan di Slowpitch i Beisbòl den 2024
Amstel Bright Premier Cup tabata promé kompetensia di Slowpitch 2024.
WILLEMSTAD- E promé kompetensia di Slowpitch tabata Amstel Bright Premier Cup ku a start den luna di febrüari i despues di 4 wikènt di kompetensia e torneo a terminá dia 10 di mart ku kampionnan den e sigiente kategorianan. Jaws (60+), Jandoret Raiders (50+), Bombers (40+),Brandweer (Soshal Maskulino), Chonchi’s (Soshal Open) i COED (Open), Swift (Modified). ADC (Coed Corporate). Grupo Ritmiko Grik i Icons tabata presente pa animá. Un públiko grandísimo tabata presente na final.
Resumen 2024 (Little League)
Montanja Ariba kampion Minor i Montanja Abou kampion Little Torneo FABB
WILLEMSTAD – Djadumingu 21 di yanüari 2024, Torneo di Minor/Little League organisá pa Fundashon Akademia di Beisbòl Brievengat (FABB) a terminá ku partisipashon di ekiponan di Minor i Little di Aruba. Ekipo Montanja Ariba a bira kampion den Minor ganando Aruba Noord 9-0. Ekipo Montanja Abou Little a gana di Montanja Ariba ku skor di 2-1 pa bira kampion den Little. Despues di wega tabatin entrega di premio den presensia di Minister di Enseñansa, Siensia, Kultura i Deporte sr. Van Heydoorn, Mark ‘Gordo’ van Zanten na ken e torneo ta dediká i dirigentenan di FABB. Dimes den nos edishon di Deporte nos tabatin entrega di premio di ekipo i premionan individual ku vários pòtrèt.
Hungadónan ku a risibí premio individual den Minor tabata Kampion Bate: Shurandy De Roon Pieters (Brievengat), Xiaejay Genaro (Montanja Ariba), Yerick Griffith (Montanja Ariba). Den Little League tabata D’Shawn Mills (Montanja Ariba), D’Harvion Haard (Trai Seru), Gianiro Martina (Montanja Abou), Gideon Jorge James.
Mas resumen 2024
Torneo Hope organisá pa Van Engelen Foundation tabata eksitoso atrobe den 2024
WILLEMSTAD- Awe nos ta sigi ku resumen Sòftbòl Slowpitch di 2024. Nos lo sigi den e dianan benidero ku e resumen i spera di kaba promé ku Pasku. Awe nos ta sigi ku e torneo mas popular di Sòftbòl Slowpitch/komersial ku ta Torneo Hope. Torneo Hope 2024 a terminá den gran forma riba un djarason Dia di Obrero na Van Engelen Ballpark. For di mainta 10’or tabatin weganan final te ku den oranan di anochi. Ekiponan Polis 40+, Fire Team, The Living Legends, Onderwijs GSH/HICC, Brandweer i ADC/CMC/Brandweer a bira kampion den nan respektivo kategoría. Un públiko grandísimo tabata presente na Van Engelen Ballpark pa mira e finalnan di Torneo Hope 2024. Tabatin animashon di Oriri ku a animá e públiko presente den gran forma. Despues a sigi entrega di premio individual i di ekiponan.
Pitufos Los Prados kampion di Golden Athlete Championship Series.
WILLEMSTAD- Awe nos ta sigi ku resumen 2024 di Sòftbòl Slowpitch. Pa promé biaha tabatin e gran torneo Golden Athlete Championship Series ku partisipashon di ekiponan di Aruba, Kòrsou, Puerto Rico i República Dominicana na Kórsou. Ekipo Pitufos di Kòrsou a organisá e torneo ku tabatin bon públiko tur 5 fecha. Djadumingu 12 di mei tabata e fecha final di Golden Athlete Championship Series den Stadion Post 6. Den 60+ e ekipo Los Prados a bira kampion ganando di Nos Power den final. Nos Power tabata ganá ku skor di 4-3 te den último inning, pero ekipo Los Prados ta bòltu skor despues ku promé out a kai pa finalmente gana ku skor di 10 - 5. Den e wega di Liga 50 Pitufos a gana Jaws ku skor di 7 pa 5. Ganadónan i premio individual tabata Juan Rivas di Rep. Dom., Dwight Alexander (Aruba), Edmar Cornelia, Myron Wijman i Fernando Rosario di Kòrsou. Despues di wega tabatin entrega di premio i animashon musikal di Grupo Kompèr.
Cicoza kampion Kopa ABC&S na Sint Maarten i Ban Serio kampion na Aruba
PHILIPSBURG - Cicoza a gana Swift 13 pa 7 i bira kampion kopa ABC&S na Sint Maarten. E torneo a start dia 8 di mei i terminá dia 12 di mei. E èks Big Leaguer Andlreton Simmons tabata espektakular den defensa pa Cicoza bira kampion. Swift a bira sup kampion despues di tabata varios aña komo kampion. Na 2015 tambe ekipo Cicoza a bira kampion di ABC&S di e hóbennan.
Ban Serio kampion Kopa ABC&S
ORANJESTAD -Djadumingu 12 di mei Ban Serio a bira kampion Kopa ABC&S 50+ na Pos Chikitu Aruba. Ban Serio a gana Astros di Aruba ku skor di 20-10 pa bira kampion. Ban Serio ta kampion di Kopa ABC&S di 50+ añanan 2018, 2019, 2023 i awor na 2024. Ban Serio a kibra invikto di Marlins den semi-final pa bai final.
Ban Serio kampion Kopa ABC&S di 2024 na Aruba na Pos Chikito.
Pabou a gana den 3 divishon i Pariba den 2 divishon
WILLEMSTAD- Pabou a gana den Minor, Intermediate i Senior pa loke ta e play-off di Little League. Pariba a sali number 1 den Little i Junior. E selekshon di Pabou a bira kampion den Intermediate Latino na República Dominicana. E otro selekshonnan no a logra den nan kompetensianan di Karibe i Latino. Aruba a bira kampion di Karibe ku a tuma lugá na Kòrsou den luna di yüli.
Mas resumen di Slowpitch 2024
Rising Phoenix ta swip Nos Goso i bira kampion di Diamond Stars League
WILLEMSTAD- Awe nos ta sigi ku e resumen di Slowpitch i di e kampionnan den Slowpitch den 2024. Manera ya a bira un tradishon den di dos mitar di desèmber tur aña, nos ta resumí e kampionnan di Slowpitch i Beisbòl i di ekiponan ku a bira kampion. Nos ta sigi awe ku Diamond Stars League, eksitoso liga di Sòftbòl Femenino Veterano ku a tuma lugá e aña aki atrobe na Sam Bunting Ballpark. Djasabra 8 di yüni Rising Phoenix a gana Nos Goso 6 pa 3 i bira kampion di Diamond Stars League 2024. Rising Phoenix a swip e seri di 5 den 3 wega. Djabièrnè 7 di yüni Rising Phoenix a gana Nos Goso 12 pa 4 i djasabra 1 di yüni Rising Phoenix a gana 6 pa 1. Un públiko grandi a wak tur e weganan di final na Sam Bunting Ballpark. Despues di wega tabatin entrega di premio.
Resumen Slowpitch 2024
The New Radiator/Brandweer kampion Torneo SKAK+ na Boneiru
KRALENDIJK – E kombinashon di The New Radiator i Brandweer a gana Rocargo Bonaire den final ku skor di 11 pa 3 pa bira kampion Torneo SKAK+ Boneiru. WEB Boneiru a organisá e Torneo SKAK+ 2024. SKAK ta nifiká Sòftbòl Komersial Aruba i Kòrsou, pero debí ku último añanan Sint Maarten i Boneiru tambe ta partisipá, e nòmber a bira SKAK +. Ekipo The New Radiator/ Brandweer a gana Corendon den semi-final i Rocargo a gana di WEB NV den semi-final. Un bon públiko di komienso te final na Jossy Boekhoudt Ballpark na Boneiru. Torneo SKAK+ a sigi na Kòrsou den luna di yüli. Kampion picher i MVP a bai pa Quinten Willems di The New Radiator/Brandweer. Ludson Roberto di Brandweer tabata lider di homerun.
Kampion SKAK +: The New Radiator/Brandweer.
Resumen SKAK Kòrsou
WEB NV di Boneiru i CRU 40+ kampion Torneo SKAK+ Kòrsou.
WILLEMSTAD – WEB NV di Boneiru a gana di Corendon ku skor di 5 pa 2 den e gran final di Komersial i CRU a gana Selikor/Flow ku skor di 4-3 den 40+ pa bira e kampionnan di Torneo SKAK+. E torneo a tuma lugá di djaweps 25 pa djadumingu 28 di yüli na Van Engelen Ballpark na Kòrsou. Hungadónan i fanátikonan di Aruba, Boneiru i Kòrsou a gosa un bòl durante e dianan ariba menshoná. Tabatin dos ekipo di Aruba ku ta Balashi i Taxi Drivers i Boneiru a keda representá pa WEB NV. Despues di wega tabatin entrega di premio di SKAK+ (Sòftbòl Komersial Aruba i Kòrsou) organisá pa SIPS (Stichting Internationale Politie Sportweken).
Resumen
Santa Maria Pirates kampion Beisbòl Dòbel A 2024
WILLEMSTAD- Santa Maria Pirates a swip Royal Scorpions ganando 4 wega stret den final i bira kampion di Beisbòl Dòbel A 2024. E último wega a terminá ku skor di 12-5 dia 28 di sèptèmber den Tio Daou Ballpark. Santa Maria a gana wega number 1 (djadumingu 22 di sèptèmber) ku skor di 11-10, wega number 2 (djarason 25 di sèptèmber ) 21-5 i (djaweps 26 di sèptèmber) 8-4. Kevin Moesquit tabata e MPV di e seri final. Despues di wega tabatin entrega di premio. Ta for di 2018 Santa Maria a bira kampion i ta di 12 título den historia di Santa Maria Pirates den Dòbel A.
Resumen Sòftbòl Femenino Veterano
Tur Goso kampion Liga Streanan di Ayera 50+ di 2024
WILLEMSTAD- Tur Goso ku tremendo picheo di Murielle de Jongh - Avastia a gana Eureka ku skor di 4-1 i bira kampion di Liga Streanan di Ayera 50+ djadumingu 21 di yüli na Sam Bunting Ballpark. Murielle de Jongh a tira 7 inning kompletu, tuma 6 hit i un kareda pa bai ku e viktoria. Murielle de Jongh a bira MVP di e seri final ganando tur dos wega pa Tur Goso den e final. Despues di wega tabatin entrega di premio tantu di ekipo komo individual.
Resumen Sòftbòl Femenino Veterano
Sin Strès kampion Liga di Nos Tur 2024
WILLEMSTAD- Sin Strès a gana Un Kara ku skor di 9 pa 4 pa bira kampion Liga di Nos Tur 2024. E wega finalísimo di e gran final di temporada a tuma lugá djabièrnè, 6 di sèptèmber 2024 den Frank Curiel Ballpark. Un públiko grandísimo tabata presente pa mira e wega finalísimo aki despues ku e seri final a empatá na unu. E último out tabata un foul flai pa tersera base ku e tersera base di Sin Stres Tanusi Delando a kue. Tanusi Delando a bira MVP di e seri final.
Nos Tambe Por kampion Sóftból 60+ di 2024
WILLEMSTAD- Nos Tambe Por a gana Jaws ku skor di 9 pa 1 pa bira kampion di Liga 60 djadumingu, 16 di novèmber na Frank Curiel Ballpark. Siegfried Lopez i Michelangelo ‘Galbou’ Boekhoudt a kombiná pa optené e viktoria. Siegfried Lopez a bira MVP di e seri final. Frank Curiel Ballpark tabata yen yen di fanátiko pa mira e wega final.
Resumen Sòftbòl 50+
Baranka ta gana Ban Serio i bira kampion Liga 50 di 2024
WILLEMSTAD- Baranka riba doblete ku dos out den di 7 inning di Myron Wijman i bon picheo atrobe den Kenny Hellement ta gana Ban Serio ku skor di 8 pa 7 i bira kampion Liga 50 di 2024. Bon públiko na Van Engelen Ballpark pa mira e di dos partido di gran final seri mihó di 3. Baranka a swip e seri ganando e promé wega djasabra 16 di novèmber ku skor di 6 pa 5 i djasabra 23 di novèmber ku skor di 8-7. E wega a keda empatá i den bòm di e di 7 inning ku dos out Baranka ta laga Ban Serio den tereno pa bira kampion. Kenny Hellement ku a gana e dos weganan di final a bira MVP di e seri final.
Resumen Liga Amstel 2024
Gamers ta gana Cicoza dos biaha djasabra den final i bira kampion Liga Amstel
WILLEMSTAD- Liga Amstel tabatin un gran aña despues ku tabata parse ku e liga lo stòp. E liga a drei bon ku 7 ekipo i finalmente Gamers a ripití komo kampion. Gamers ku tremendo picheo di Emilio Velarde a bira kampion Liga Amstel di 2024. E gran final a tuma lugá djasabra 23 di novèmber na Van Engelen Ballpark. Gamers a gana wega number 1 ku skor di 6-5 lagando Cicoza den tereno i wega number 2 Gamers a gana Cicoza ku skor di 25-13. Emilio Velarde ku a picha den tur dos wega final a bira MVP di e seri final. Direktiva di Liga Amstel a manda un mensahe kaminda nan ta yama danki na tur ku a koperá ku e liga a bira eksitoso.
Baranka grandi den 40+ tambe
Baranka kampion Liga 40 di 2024
WILLEMSTAD – Baranka ta gana Cicoza ku skor di 13 pa 2 den wega number 2 di e final djamars 3 di desèmber i bira kampion Liga 40 di temporada 2024. Basta bon públiko pa mira e wega number 2 di final ku a tuma lugá na Van Engelen Ballpark. Raylison ‘Sontje’ Gijsbertha ku a picha e dos weganan final kompletu, a gana tur dos pa bira MVP di e seri final. Liga 40 a start den luna di ougùstùs i a terminá komo último liga den luna di desèmber. Otro liga ku tabata parse ku lo no sigi, pero a move den gran forma den 2024 ku partisipashon di 6 ekipo. 2025 Liga 40 lo tei atrobe, pero lo start mas tempran pa terminá den novèmber.
Ultimo resumen
Nos Tambe Por kampion Dutch Caribbean Championship Masters 60+
KRALENDIJK - Awe nos tin e último di e seri di resumennan di 2024. E torneo ku yama Dutch Caribbean Championship Masters 60+ tabata e último torneo internashonal entre islanan ABC&S ku a tuma lugá den 2024. Einan tabatin partisipashon di Hulanda tambe i e 60+nan a gosa un bòl huntu ku fanátikonan. Nos Tambe Por ku bon picheo di Siegfried Lopez a gana Bonaire Stars ku skor di 5 pa 0 i bira kampion di e Dutch Caribbean Championship Masters 60+. E torneo a tuma lugá na Boneiru. Nos Tambe Por a klasifiká number 2 den pul B i ekipo Sluggers a sali number 1 di Pul A. Nos Tambe Por a gana ekipo Sluggers ku skor di 10 pa 0 den semi-final. Bonaire Stars number 2 den Pul A a gana di Lions number 1 den Pul B, ku skor di 8 pa 5. Den e parti di Challenger ekipo Dalspat a laga One Reckless di Hulanda den tereno pa bira kampion.
