Rising Phoenix ta swip Nos Goso i bira kampion di Diamond Stars League
WILLEMSTAD- Djasabra 8 di yüni Rising Phoenix a gana Nos Goso 6 pa 3 i bira kampion di Diamond Stars League 2024. Rising Phoenix a swip e seri di 5 den 3 wega. Djabièrnè 7 di yüni Rising Phoenix a gana Nos Goso 12 pa 4 i djasabra 1 di yüni rising Phoenix a gana 6 pa 1. Un públiko grandi a wak tur e weganan di final na Sam Bunting Ballpark. Despues di wega tabatin entrega di premio.
Rising Phoenix kampion The Diamond Stars League
PREMIONAN
Kampion: Rising Phoenix
Sup kampion: Nos Goso
Treasure di tres lugá
MVP Final: Marie Windster (Rising Phoenix)
Kampion picher: Marie Windster (Rising Phoenix)
Kampion Bate: Judeska Kastaneer ( The Fighters)
Lider di homerun: Emily Jonis (Nos Goso)
Djabièrnè 7 di yüni
Rising Phoenix 12, Nos Goso 4
Rising Phoenix a dal 15 hit i nan a kometé 4 eror. Marie Windster tabata e picher ganadó. Jacqueline Sophia a bai di 1-1, Sherly Martina di 3-2. Curilma Carolina ku Sue Ellen Mouricio a bati di 4-2. Sovienca Calmera a bai di 4-3 inkluyendo 2 homerun. Nos Goso tabatin 7 hit ku 5 eror. Carlientje Cleopa tabata e picher pèrdèdó Nathalie Lourens a bai di 2-1 i Miriela Carlo di 3-2.
Djasabra 8 di yüni
Rising Phoenix 6, Nos Goso 3
Rising Phoenix tabatin 9 hit ku 1 eror. Marie Windster a bai ku e viktoria. Ashanti Giterson ku Mirugia Paulina, ámbos a bai di 2-1. Marie Windster di 1-1 i Curilma Carolina di 3-2. Pa Nos Goso 11 hit ku 3 eror. Carlientje Cleopa a karga ku e derota. Vanessa Winklaar i Natasha Marselia, ámbos di 3-2, Miriela Carlo di 2-2 i Nathalie Lourens di 3-3, inkluyendo 1 homerun.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bon dia felis fin di siman. Ekipo Rising Phoenix a swip Nos Goso den 3 wega stret pa bira kampion di The Diamond Stars League. Rising Phoenix a gana djabièrnè ku skor di 12 pa 4 i djasabra 6 pa 3 pa bira kampion. Den e promé wega di e seri mihó di 5 ku a tuma lugá djasabra 1 di yüni Rising Phoenix a gana ku skor di 12-4. Pa promé biaha den e di 3 kampionato di e liga ku e ekipo Rising Phoenix a bira kampion. E weganan final i kampionato kompletu a tuma lugá na Sam Bunting Ballpark. Ekipo Nos Goso tabata kampion e promé dos añanan. Ekipo Rising Phoenix ta muchu mas hóben ku ekipo Nos Goso ku tin varios hungadó 50+ kompará ku e 35 i 40+nan di Rising Phoenix.
* * * * *
Liga di Nos Tur ta pendiente pa start kampionato 2024 na Frank Curiel Ballpark. Parse ku ekipo Chilling no ta partisipá mas na e liga. Nos a risibí informashon ku e liga lo start dia 5 di yüli. Ekiponan Un Kara, Sin Stress, Join Me i Shining Stars lo partisipá na e kampionato. Despues ku ekipo Un Kara tabata dominá e liga i tabatin un dinastía, ekipo Sin Stress ku tabata e promé kampion di e liga a bira kampion na 2023. Sin Stress a sali kampion na 2018 i despues tabata Un Kara ku a bira kampion na 2019, 2020, 2021 i 2022. Keda pendiente pa mas informashon di Liga di Nos Tur.
* * * * *
Nos ta bai un ratu pa Futbòl. Kòrsou a gana Aruba ku skor di 2-0 den Stadion Guillermo Trinidad aya na Aruba. Kòrsou mester a lucha bastante for di den promé mitar pa yega na gol, pero sin logra. Nos a pone atake tras atake sin yega na gol i tabata hopi posishon di bala pero ta gol ta konta. Na di 58 minüt Juninho Bacuna ta nota un bon gol ku un tiru for di alksanse di e kiper i te den lat kasi promé ku e partido terminá Xander Severina ta nota e di dos gol di Kòrous na di 90 minüt plus.
* * * * *
Ekipo Los Viajeros tabata moviendo den gran forma aya na Cali. Nan a keda den tereno den e último wega di buelta regular i a klasifiká i lo mester a hunga kontra di Panama den semi-final. Den semi-final nan a kai vensí kontra Panama ku skor di 14 pa 6 kontra Panama. Bogota a bira kampion ganando Panama 10 pa 6. Hungadónan ku nos a mira riba pòtrèt ta Sendley Reina,Nelly Jakoba, Cedric Curiel, Roy Jakoba, Marlon Winklaar, Aldrin Visers, Leito, Louisa, Martha, Baromeo, Howard, Thielman i Maal Jonis. Tyron de Palm a djòin e ekipo aya na Cali. Nan a regresá Korsou, djaluna 10 di yüni.
* * * * *
Den Liga 50 Baranka/Sharks a dal Artemisia durísimo ku skor di 15-0. Fisel Pereira a gana e wega i Gregory Bito a konektá un homerun. Mester bai wak ku ta den tereno e homerun ta òf ta bula fèns. Ku e bala nobo aki ta masha poko homerun ta bula fèns den Liga 50 . Ekipo Sluggers a sorprendé Flamboyan ganando 9 pa 6. Eldred Bakker a gana pa Flamboyan. Frensel Esclodina a bati di 3-3. Jaws a gana Marlins 5-1 den un wega ku a bai Extra Inning. Despues di 7 inning e wega tabata empatá ku Marlins komo home team ku chèns grandi pa laga Jaws den tereno. Jaws ta sali for di e inning i nota 4 kareda den kabes di e di 8 inning pa gana wega. Parse ku tin un protesta na kaminda debí ku no a hunga tie break despues di 7 inning.
* * * * *
Den e último wega di djasabra ekipo Ban Serio mester a lucha formal pa gana Catpower ku skor di 9 pa 5. Catpower a bati 10 hit i hasi 2 eror i keda kòrtiku. Catpower a sali bai dilanti 5-0 den promé inning, pero poko poko i sigur di nan mes Ban Serio kampion di Liga 50 di Kòrsou i super kampion di ABC&S a sigi lucha pa logra bai ku e viktoria. Ban Serio a saka un double play i despues un tripel play tambe ku a yuda hopi den e viktoria. Otro wikènt tin kandela atrobe na momentu ku Pitufos topa ku Ban Serio. Ta solamente Pitufos i Baranka ta invikto den Liga 50. Den Beisbòl Veterano ekipo Flamingo a bolbe pèrdè pa defolt i ta for di kampionato 2024. Ekiponan ta pendiente si direktiva lo adaptá e skema. Nos ta keda te aki pa awe i te mayan ku Poder di Dios.
%20copy.jpg)
