Royal Scorpions kampion Beisbol Hubenil 2024
WILLEMSTAD- Royal Scorpions a gana di Santa Rosa Indians ku skor di 12 pa 6 i bira kampion di Beisbòl Hubenil di 2024 djabièrnè 16 di ougùstùs. E wega a tuma lugá den Tio Daou Ballpark, despues di wega tabatin entrega di premio. Jeremiah Jones tabata n dominante komo picher riba montikulo tirando 11 ponche pa Royal Scorpions bai i ku e viktoria. Ela tira 6 inning i tuma 7 hit i 4 kareda. Ela risibí relevo di Zouk’aino Jacobs. Nair Jamanika a bati di 4 hit den 5 turno.
NUMEIRTONAN
Royal Scorpions a nota 12 kareda, bati 10 hit i hunga sin eror. Jeremiah Jones a gana i Nair Jamanika a bati di 5-4.
Santa Rosa a skor na 6 okashon bati 8 hit i kometé 3 eror. Picher pèrdèdó tabata Dmitri Dijkhuizen. Tishmar Hermanus a bati di 3-2 ku un homerun. Chey Niel de Lanoy di 4-2.
Nos Power ta gana Los Amigos i Sluggers ta derotá Nos Tambe Por den Liga 60
WILLEMSTAD- Nos Power ta gana Los Amigos ku skor di 6 pa 4 i Sluggers ta dal Nos Tambe Por ku skor di 5-3 den kontinuashon di Liga 60+ djadumingu na Frank Curiel Ballpark. Den e otro partido ekipo Jaws lusiendo nan unifֳòrm nobo nobo a pasa fásil riba Lions ganando ku skor di 9 pa 1. Ta trata aki di e promé weganan di e di dos buelta di liga. Pa loke ta trata e wega di Nos Power vs Los Amigos, Earl Virginia a dal homerun di dos kareda den bòm di e di 7 inning pa laga Los Amigos den tereno. E wega tabata 4-1 te den kabes di e di 6 inning, pero ekipo Los Amigos ta nota 3 kareda pa empatá e wega. Nos Tambe Por tabata ganá 3-0 te den último chèns di ekipo Sluggers, pero Sluggers ta nota kareda pa bai ariba 5-3 i mantené e ventaha.
.
Jaws Liga 60 a entregá unifòrm na hungadónan
WILLEMSTAD – Djabièrnè 9 di ougùstùs 2024, ekipo Jaws Liga 60 a entregá unifòrm na hungadónan, na Ledaweg na kas di hungadó i dirigente Bramford Hasham. Representante di spònsernan Landsloterij i Top Professional Cleaning (Robertico Castillo) tabata presente na e entrega i boutiso di unifòrm. Durante e entrega a hiba palabra Wimbert Hato ku ta presidente di Jaws. Despues di entrega hungadó, dirigente i fanátikonan a keda huntu den un tremendo ambiente na kas di Hasham.
Fanátikonan Deporte Korsou bon dia. Nos taabata den un siman kaminda skol lo start i hopi kore kore den oranan di mainta i mèrdia atrobe pa mama, tata, oma i opanan i naturalmente nos deportistanan ku ta sigi nos. Hopi Slowpitch, Beisbòl Veterano i Beisbòl riba nivel di Klase A, Hubenil i Dòbel A den wikènt. Den Liga 50 ekipo Sluggers a bolbe zona un kampanaso ganando di ekipo Baranka pa di dos biaha sigí e aña aki. Sluggers a gana Baranka ku skor di 6 pa 3 dia 13 di yüli i djasabra 10 di ougùstùs nan a gana Baranka ku skor di 5-4. Baranka a pèrdè 4 di nan último 5 weganan. Ketu bai e ekipo to beat den Liga 50 ku tabata kampion 2021 i 2022.
* * * * *
Den otro wega di Liga 50 djasabra ekipo Marlins ku ta ketu bai number 1 di e liga empatá ku Pitufos a gana fásil di ekipo Catpower ku skor di 11-3. Nos ta pendiente di resultado di e otro weganan. Pitufos ta pendiente pa subi dos grandi, Roderick ‘Roque’ Zimmerman i Fabiani Orcadio i Ban Serio tambe ta pendiente pa subi algun grandi ku a kumpli nèt 50 aña. Marlins ta moviendo bon mes den Liga 50 i ta masha hopi fanátiko bon uniformá ta presentando na weganan. Bon ambiente aya na Van Engelen Ballpark tur djasabra i mester bisa ku Liga Amstel tambe tin nan fanátikonan i no tin kaminda pa pone outo djasabra na Van Engelen Ballpark.
* * * * *
Beisbòl Veterano no tabatin wega djasabra pa promé biaha for di dia kampionato a kuminsá. Djadumingu mester tabatin 3 wega, 2 wega di Liga 50 i un wega importante di Liga 40 ku tabata entre ekiponan Yesterday (5 lugá) i Broncos (6 lugá). Tene kuenta ku 6 ekipo lo klasifiká pa play-off i e dos ekiponan menshoná ta ekiponan ku a yega di klasifiká number 5 i 6, pero masha tempu no a klasifiká number 4. Yesterday tabata den play-off for di aña 2005 i Broncos ku ántes tabata The Brothers no a yega di klasifiká na puesto mas abou ku number 5/6. Yesterday a kai vensi ku skor di 7-3 kontra Broncos.
* * * * *
By the way, pabien na e muchanan di U-8 di Kòrsou ku a bira kampion di Mundu pa loke ta trata Carl Ripken (Baby Ruth World Series. Esei tabata djasabra despues ku djabièrnè mester a lucha formal pa bini bèk den e wega semi -final pa klasifiká pa final. Tremendo trabou bou di direkshon di Ryan ‘Indjan’ Ilario, Timothy Juliana i Jair Quant aya na Ocala (Florida), algu mas ku un ora for di Orlando. Pabien na nos muchanan i coach- i dirigentenan. Kòrsou ta keda grandi den Beisbòl i un ora pa otro nos lo por yega 6 hungadó den Major League Baseball atrobe. Hungadónan Ozzie Albies, Cedanne Rafaela i Jurickson Profar tei pa hopi tempu. Kenley Jansen na edat di kasi 37 aña por bai 2 pa 3 aña mas.
* * * * *
Pa loke ta nos hungadónan den Major League Baseball, Jurickson Profar tabata batiendo .300 te ku despues di e wega di djasabra siman pasá Jurickson ta parando masha bon na homeplate, pero di un manera òf otro ta risibí hit by pitch kasi tur dia. Den e wega di djasabra último Jurickson a risibí 2 hit by pitch i despues ku ela risibí su di dos hitch by pitch ela bati man gewon, stail di aplouso pa e hit by pitch. En todo kaso Jurickson su averahe tabata .300, ku 19 homerun i 71 RBI. E hungadó di 21 aña Jackson Merril (San Diego) ta un kos serio i ela bati homerun pa empatá wega den parti final di e wega pa di dos dia sigí. Djabièrnè tabata den kabes di e di 9 inning pa empatá wega (2-2) i djasabra tabata den kabes di e di 9 inning (8-8) pa empatá e wega. Ekipo Padres a bini gana tur e dos weganan menshoná den di 10 inning komo ekipo di bishita. E serinan ei tabata na Loan Depot Park na Miami siman pasá.
* * * * *
Pa loke ta trata nos otro Big Leaguernan Kenley Jansen tabatin 3-1 ERA 2.95 te ku djasabra siman pasá. Ku 21 wega salbá i na di 4 lugá di tur tempu den salba wega den MLB. Cedanne Rafaela avg. 260, 13 homerun i 58 RBI. Albies ku ta leshoná .258, 8 homerun i 46 RBI. Xander Bogaerts, .271, 5 homerun i 23 RBI. Xander tabata leshoná pa algun luna i a bini bèk den gran forma. Nos ta keda te aki pa awe i te mayan ku Poder di Dios.
%2520copy.jpeg)
