HAVANA - Ruthsel Martina sekretario general di Komité Olímpiko di Kòrsou (FDOK) a hasi un bishita di kortesia serka e presidente di Komité Olímpiko di Cuba (KOC) Lic Roberto León Richard. Pa medio di presidente di FDOK sr. Rignaal “Jean” Francisca e enkuentro aki por a tuma lugá.
E motibu di e enkuentro tabata pa forma lasonan entre KOC i FDOK pa un posibel interkambio deportivo entre e dos paisnan. Esaki tin komo meta prinsipal pa hisa e nivel kompetitivo di deportistanan di Kòrsou pa kompetensianan internashonal.
Manera ta konosí na aña 2010 Kòrsou a bira outónomo den reino, konsekuentemente Antia a stòp di eksistí i Kòrsou no a wòrdu rekonosé mas dor di Komité Olímpiko internashonal (IOC) pa por partisipá na Weganan Olímpiko i na Weganan den nos region.
Durante añanan ku a transkurí direktiva di FDOK a bin ta traha riba vários posibilidat pa haña rekonosimentu bek i na aña 2018 Kòrsou a logra partisipá pa promé biaha komo pais na Weganan Sentro Amerikano i di Caribe CAC ku nos propio himno i bandera.
Lic. Roberto León Richard .
Despues direktiva di FDOK a sigui traha riba mas posibilidatnan i a logra ku Kòrsou den aña 2022 lo partisipá na 3 Weganan internashonal. E promé Weganan ta esun Suramerikano hubenil kual lo tuma lugá di 28 aprel pa 8 mei 2022 na Rosario, Argentina. E di dos ta e Weganan di Karibe (U-23) kual lo tuma lugá di 28 di yüni pa 3 di yüli 2022 na Guadeloupe. E Weganan di Karibe ta un evento nobo kordiná pa e Komité Olímpiko di Caribe (CANOC). E di tres Weganan ta Suramerikano (señor) kual lo tuma lugá di 1 pa 15 di òktober 2022 na Asunción, Paraguay.
E plan di FDOK ta pa bai ku deportistanan ku potensial pa gana medaya. Pa e motibu aki, FDOK a aserka e federashonnan ku tin e posibilidat di partisipashon, ku petishon pa entrega nan plan di preparashon pa e por wòrdu evaluá. Den e kuadro aki lo bishita entrenamentu i tambe duna guia kaminda esaki ta nesesario. Di e forma aki lo evaluá pa wak ku e deportistanan ku lo representá Kòrsou tin un bon nivel di kompetensia. Pa e motibu aki ta buskando aliansa ku Komiténan Olímpiko di den nos region pa posibel asistensia den forma di entrenadónan profeshonal, kampamentu di entrenamentu i pre- kompetensia. Lo krea oportunidat pa selekshonnan bin entrená i kompetí na Kòrsou komo ku nos ta dispone di fasilidatnan deportivo na nivel.
E siguiente paso lo ta un enkuentro ofisial entre sr. Martina i sr. Leon Richard pa asina formalisá e kondishonnan di e kolaborashon aki. Cuba lo manda pa FDOK un modelo di e kolaborashon ku nan a logra sera ku vários pais den region. Despues di e bishita na Cuba lo sigui pa paisnan manera Santo Domingo, México i Jamaica ku ta e paisnan ku nivel deportivo hopi haltu den Karibe.
Un di e metanan di FDOK pa 2022 ta pa gana medaya den e próksimo Weganan internashonal.
.
HAVANA - Ruthsel Martina sekretario general di Komité Olímpiko di Kòrsou (FDOK) a hasi un bishita di kortesia serka e presidente di Komité Olímpiko di Cuba (KOC) Lic Roberto León Richard. Pa medio di presidente di FDOK sr. Rignaal “Jean” Francisca e enkuentro aki por a tuma lugá.
