Santa Maria Pirates kampion Beisbòl Veterano 2021
WILLEMSTAD- Santa Maria Pirates ku un viktoria fásil ku skor di 9 pa 1 den e wega finalísimo kontra di Isla Crackers, a bira kampion di Beisbòl Veterano 2021. Amador ‘Shon A’ Nita a tira wega kompletu djadumingu pa bira MVP di e seri final. Santa Maria a pèrdè wega number 1 di e seri pa despues gana dos wega sigí relatívamente fásil. Un públiko grandi tabata presente na Vi Jansen Ballpark pa mira e wega number 3 di e final. E defensa di Isla tabata erátiko tumando 7 kareda shushi riba 3 eror. Santa Maria a sali nota 3 kareda den promé inning, pa despues no pèrdè e ventaha mas. Isla Crackers a nota nan úniko kareda den promé inning. Santa Maria a nota 3 mas den di 5 inning i 3 mas den di 6 inning. Despues di wega tabatin entrega di premio dor di e direktiva nobo di Beisbòl Veterano enkabesá pa Shendy Cras.
NUMERITONAN FINALISIMO
Santa Maria Pirates 9, Isla Crackers 1
Santa Maria tabatin 11 hit ku 3 eror. Amador Nita a bai ku e viktoria. Stanford Landburg a bai di 4-3. Eldred Estanista ku Ruben Snoyl, ámbos a bati di 4-2. Raymond Soerka di 1-1. David Kirindongo ku Irving Sambo, ámbos a bai di 3-1. Gerthon Matrona a bai di 4-1. Isla Crackers a dal 6 hit i nan a hasi 3 eror. Orsendo Clemencia a karga ku e derota. Jermaine Esprit ku Kevin Boekhoudt, ámbos a bai di 3-2. Dave Janga ku Julius Veeris, tur 2 a bati di 3-1.
PREMIONAN
Kampion: Santa Maria Pirates;
Supkampion: Isla Crackers;
Di 3 lugá: Jandoret Raiders;
MVP seri final: Amador Nita;
Kampion Bate: Quincy Kook (Isla Crackers) .648;
Lider di homerun: David Kirindongo (Santa Maria) 5;
Kampion Picher: Wendell Elizabeth, Number 1 den wega ganá ku 6 i ERA di 2.00.
Kampion Bate, Quincy Kook (Isla Crackers) ku average di .648.
