Santa Maria Pirates Veterano a premia hungadónan
WILLEMSTAD- Den e luna ku tras di lomba e ekipo di Santa Maria Veteranos a sera aña ku su hungadónan, dirigente i fanátikonan. Parti mainta tabata tin un paseo den konvoi den area di Banda Abou i a finalisá esaki den Hòfi Mango na Santa Cruz. Aki nan a premia tur hungadó pa e logro di kampion di Beisbòl Veterano 2021. Despues a sigui ku e premio nan individual.
Kampion picher tabata Eldred Estanista. Ela tira 11.2 inning, 2 ganá i 0 pèrdí. Ela risibi 10 hit. Nan a anotá 2 kareda na su man di kual 1 tabata limpi. Eldred a tira 2 base por bola i poncha 10 batiadó. Ela dal dos hende ku bala i tabata tin un ERA di 0.60.
Kampion di homerun tabata David Kirindongo ku 5 homerun. Kampion Bate di Santa Maria tabata David Kirindongo. Ku un average di 500 produkto di 12 hit den 24 turno.
Hungadó Mas Balioso tabata David Kirindongo. Ela tira 7.2 inning, 1 ganá i 0 pèrdí, nan a dale 7 hit, ela poncha 6 batiadó, tira 7 base por bola, ela dal 2 hende ku bala i ku un ERA di 3.65. Tambe ela bati 12 hit, di kual 5 hr i 1 doblete, ela anotá 11 kareda i empuhá 16 kareda, nan a dal e 3 biaha ku bala, ela risibí 3 base por bola i poncha na un okashon.
Premio Mi Mes ku mi Logronan:
Standford Landburg. Esaki ta un premio ku ta ser otorgá na e hungadó ku su esfuerso, dedikashon i entrega tabata un gran ayudo pa nos por a logra bira kampion.
