Santa Rosa a gana Wild Cats 12-10 i bira kampion Beisbòl Dobel A 2020
WILLEMSTAD- Santa Rosa a gana Wild Cats ku skor di 12-10 i bira kampion di Beisbòl Dòbel A 2020. E wega finalisimo, wega number 7 a tuma lugá djaweps 15 di òktober dilanti algun fanátiko i dirigente na Tio Daou Ballpark. Despues di wega tabatin entrega di premio na ekiponan i tambe na e MVP-nan di e seri.
E segunda base di 17 aña, Jevganni Reinita a bira MVP di e play-off kompletu i Jordan Lucas MVP di e seri final. Santa Rosa a bira kampion pa di 7 biaha den nan historia (1965, 1986, 1987, 1988, 2003, 2008 i 2020). Santa Rosa Indians a sali dilanti for di e promé inningnan i a logra nota 8 kareda kontra Jair Jurrjens ku a tira 2 inning i 2 tersio. Mester apuntá ku 4 di e 8 karedanan ku Jair a tuma tabata karedanan shushi. Santa Rosa a usa 4 picher miéntras Wild Cats a usa 3 picher. Jordan Lucas manera Deporte Kòrsou a antisipá tabata tremendo atrobe. Ela tira 5 inning, tuma 5 hit, 3 kareda di kual dos tabata limpi. Otro pichernan ku a tira pa Santa Rosa tabata Siamani Boekhoudt (0.0 inning), Marvin Ludowika( 3.0 inning) i Hershelon Lucas (1.0 inning). Aldair Daal tabata grandi bayendo di 5-4 ku 3 RBI pa Santa Rosa. Riordan Winster a bati di 5-3 ku bon defensa den shòrt. Aldair Daal a hasi un atrapada tremendo den right pa para un rèli di ekipo Wild Cats. Ildion Martina a dal un homerun importante pa Santa Rosa. Batiadónan di Wild Cats a dal 4 homerun. Dos di Calten Daal i unu di Reangelo Beaumont i Daytan Biegel.
NUMERITONAN
Santa Rosa a skor na 12 okashon, bati 14 hit i kometé 2 eror. Jordan Lucas a gana i Hershelon Juliana a salba e wega. Aldair Daal a bati di 5-4 i Ildion Martina a dal un homerun.
Wild Cats a nota 10 kareda, bati 10 hit i hasi 4 eror. Jair Jurrjens tabata e picher pèrdèdó. Risandro Pastor i Kennimar Leocadia tambe a picha pa Wild Cats. Reangelo Beaumont a bati di 3-2 i Rojean Cleofa 4-2. Calten Daal a dal dos homerun, Reangelo Beaumont i Rojean Cleofa a dal un homerun.
