Santa Rosa ta gana Wild Cats i bai ariba 3-0 den e seri final
WILLEMSTAD – Santa Rosa Indians a dal Wild Cats 9 pa 4 i bai ariba 3-0 den e seri final di Beisbòl Dòbel A, seri mihó di 7. E wega ku a tuma lugá den Tio Daou Ballpark a bai solamente 6 inning debí na un palu di awaseru ku a kai na Tio Daou Ballpark i rònt Kòrsou. Ku e viktoria aki e ekipo Santa Rosa falta un wega mas pa titulá kampion di Kòrsou di Beisbòl Dòbel A. Ultimo biaha ku Santa Rosa a bira kampion tabata na 2008. Christopher Pietersz tabatin un homerun klave den promé inning ku a manda Santa Rosa ariba 3-0. Santa Rosa a keda dilanti durante henter e wega pa finalmente gana 9-4. Wega number 4 di e seri mester tuma lugá awenochi den Stadion Johnny Vrutaal. Debí na e palu di awa ku a kai djamars nos ta pendiente pa desishon di FEBEKO pa loke ta trata e wega di djarason. Promé ku wega tabatin homenahe na personanan ku a nifiká hopi pa Beisbòl den pasado. Ta trata aki di Hubert ‘Ibi’ van het Kruys (antes umpire), i Benigno ‘Bencho’ Imperator (pelotero).
NUMERITONAN
Santa Rosa a skor na 9 okashon, dal 12 hit i i kometé 1 eror. Marvin Ludowika a gana. Rochendrik Alexander, Jurgen Statie i Yevganni Reinita a bati di 3-2. Riordan Windster i Swindley Lint a bati di 4-2. Chirstopher Pietersz a dal un homerun.
Wild Cats a konekta 4 hit i hunga sin kometé eror. Sidney Antonia tabata e picher pèrdèdó. Ardley Jansen a bati di 3-2.
