Sede i fechanan di Little League Karibe i Latino Amerikano ta konosí
WILLEMsTAD – E siman aki tabatin un reunión virtual entre dirigentenan di Little League di Latino Amerika i Karibe di Williamsport i direktor Regional, durante kual e fechanan di e kampionatonan riba nivel di Latino i Karibe a bira konosi.
Den e reunión entre dirigentenan di Williamsport, Direktor Regional i 28 district Administrator di Latino Amerika e siguiente puntonan a bin dilanti. Tur liga mester Charter pa haña derechi pa partisipá na torneonan 2022. Torneonan Regional i Mundial ta sigui normal. Tur partisipante mester ta kompletamente bakuná pa partisipá na e torneonan.
FECHANAN
Little League (11-12) lo tuma lugá na Punta Cana di 5 pa 10 di yüli. Kategoria Intermediate (11-13) lo ta na Kòrsou di 26 di yüni pa 3 di yüli. Junior (13-14) lo tuma lugá na Caguas, Puerto Rico di 8 pa 17 di yüli. Finalmente kategoria Senior (15-16) Guayama, Puerto Rico di 23 pa 30 di yüli 2022. Fecha i sede di Minor (9-10) no ta konosí ainda.
