Selekshon di Futbòl di Kòrsou ta bèk después di ‘trainingscamp’ na Turkia
Durante e ‘trainingskamp’ di nos selekshon na Turkia, nos selekshon mester a hunga 2 partido di fogeo. E promé kontra e selekshon di Kazakhstan ku a tuma lugá djárason último i e segundo kontra Antalyaspor, ku mester a tuma lugá djasabra.
Djaweps anochi Antalyaspor a yama i a duna di konosé ku nan lo mester kanselá e partido aki, debí ku gran parti di nan hungadónan tabata sufri di kebrante di salú. Mes ora a kuminsá ku trámitenan pa buska un kontrinkante nobo pa nos selekshon. A logra haña un klup prosedente di Skopje, un pais di Masedonia Nort, ku lo a yega djabièrnè pa e partido ku mester a tuma lugá djasabra. Lamentabelmente e klup aki ta tin diferente hungadó afrikano ku lo no por a optené un visa di biahe durante e korto tempu ei, p’asina drenta Turkia. Asina ta ku e partido aki tampoko no a kristalisá.
Sr. Dick Advocaat a deklará lo siguiente; ‘Lo mi ta tin hopi gana di hunga 2 partido. Danki Dios e kondishonnan pa train tabata hopi bon i nos a traha bon ku e hungadónan. Un paso importante na kaminda pa e partidonan pisá ku ta warda nos na yüni.’
Apeser ku nos selekshon no a logra bai ku e viktoria durante nos partido di fogeo i nos no a logra ku nos segundo partido, nos ta satisfecho ku e ‘trainingskamp’ aki. Awor tur nos hungadónan ta na kas bèk i lo sigui prepará pa 6 di yüni 2025 nos efrentá St. Lucia aki na Kòrsou pa despues topa Haiti dia 10 di yüni 2025 na un país ku ainda no ta konosí. Tur esaki den kuadro di nos kompromisonan pa kualifikashon pa Mundial di FIFA.
FFK ta gradisí nos spònsernan pa hasi e evento aki posibel!
