PREPARASHONNAN TA KONTINUÁ PA NOS SELEKSHON NASHONAL ENFRENTÁ PANAMA, DJASABRA 12 DI YÜNI NA PANAMA I DJAMARS 15 DI YÜNI AKI NA KÒRSOU!
PANAMA CITY - Preparashonnan ta kontinuá pa nos próksimo partidonan durante kualifikashon pa Mundial di FIFA. Ámbos partido lo tuma lugá kontra Panama. E promé partido lo ta djasabra 12 di yüni na Panama den Stadion Nacional Rod Carew, 7:05 di anochi pa despues nos bolbe enfrentá Panama aki na Kòrsou dia 15 di yüni próksimo den Stadion Ergilio Hato pa 7’or di anochi.
Awe tambe nos selekshon nashonal a sigui ku e preparashonnan aya na Panama kaminda nos selekshon a entrená den e stadion kaminda nan lo hunga mañan. Durante dia ta tin diferente reunion ku e ofisialnan di FIFA pa tur kos kana bon durante wega. Darryl Lachman a yega awe den oranan di atardi i a djòin nos selekshon pa kontinuá ku sobra entrenamentunan pa e weganan di mañan ku djamars.
Karchinan ta optenibel riba djasabra 12 di yüni, djadumingu 13 di yüni i djaluna 14 di yüni na e siguiente puntonan di benta;
• FFK di 12’or di mèrdia pa 7’or di anochi
• Food court di Sambil di 12’or di mèrdia pa 7’or di anochi
• Pòmp di gasolin Santa Maria
• 4th of July snèk na Barber
Sekshon VIP ta kosta fl.175,- (optenibel na FFK i Sambil) miéntras e sekshon general ta kosta fl.40,-. Hasi lihé buska di bo pasó riba djamars dia di wega karchinan ta optenibel solamente na FFK te 2’or di atardi i lo no bende karchi na porta!
Pa asistí na wega e bishitante mester ta kompletamente bakuná (2 bes) i e di 2 bakuna mester ta hasí promé ku promé di yüni 2021. Pa e bishitante ku no ta bakuná, ta pidi pa trese resultado di e tèst di antigen no mas bieu ku 24 ora promé ku e wega. E bishitante mester presentá na wega ku su sédula i su karchi di bakunashon òf resultado di e tèst di antigen.
No lubidá di yena e parti di karchi pa registrashon i tapaboka ta obligatorio!
E dos partidonan aki ta importante pa nos sigui den kontienda pa e partidonan di kualifikashon pa Mundial di FIFA. Nos selekshon nashonal ta keda konta ku pueblo di Kòrsou komo e di 12 hungadó pa apoyá nos selekshon.
Buska bo karchi trempan, pa bo no keda afó!
