Selekshon di Kòrsou ta logra solamente un empate 0-0 vs Grenada
SINT LUCIA – Djabièrnè 11 di òktober, selekshon di Kòrsou rankiá na di 88 posishon a empatá kontra Grenada (173) ku skor di 0-0. Den un wega ku nos no a mira masha kos, Kòrsou a logra empatá. DT Advocaat a hasi algun kambio den lat pero no a logra e viktoria pa Kòrsou.
Den promé tempu e selekshon di Kòrsou a tene e bala basta bon pero no a logra yega na gol ku apenas un tiru riba gol. Den duelonan personal Kòrsou tabata pèrdè tur mirando e fisika i hugada fuerte di e selekshon di Grenada.
Medio kampo di Kòrsou no por tene e bala i parti e bala manera mester ta i arma atake. Den di dos mitar tabata mas bien Grenada ku tabata ataká i krea oportunidatnan i nos kiper Eloy Room na algun okashon a trese salbashon. Na 71 minüt Kòrsou a hasi 3 kambio pero sin muchu resultado i sin yega na gol naturalmente.
Ku e empate di djabièrnè 11 di oktober selekshon di Kòrsou, ta bira difísil pa Kòrsou promové pa Liga A di Nations League. Nos ta topa Grenada atrobe djaluna 4’or di atardi. Sint Lucia ku nos a pèrdè kontra dje ta number 1 den e grupo C di Liga B di Concacaf Nations League ku 9 punto den 3 wega. Nos tin 4 punto den 3 wega empatá ku Grenada. Sint Martin ta den bòm ku 0 punto den 3 wega. Atrobe... situashon difísil pa Kòrsòu pa por klasifika komo number 1 den e pul aki.
