Selekshon di Kòrsou vs Sint Lucia awenochi 7’or den Stadion Ergilio Hato
WILLEMSTAD - Después di nos viktoria di 5-0 riba Saint Martin di djabièrnè último, nos selekshon ta kla pa enfrentá Saint Lucia, awe 18 di novèmber 2024 pa 7’or di anochi den Stadion Ergilio Hato. Awor nos ta enkabesá e tabla di posishon ku 10 punto, rumbo pa promové bèk pa Liga A di Nations League i klasifiká pa Gold Cup!
Promé ku nos partido, Grenada lo topa Saint Martin 4’or di atardi den Stadion Ergilio Hato pa nan partido di Concacaf Nations League.
Awe tampoko nos lo no tin benta di karchinan na FFK, peró na e lokètnan di Stadion Ergilio Hato for di 10’or di mainta te anochi ora di wega. Nos lo tin vários lokèt disponibel pa un i tur por kumpra nan karchi pa bin apoyá nos selekshon. Portanan di stadion ta habri for di 3’or di atardi, pues yega trempan pa evitá stagnashon na porta.
Mes kos ku djabièrnè, mañan entrante 5’or di atardi lo sera algun viá ku ta kondusí na Stadion Ergilio Hato, esaki pa garantisá fluho di tráfiko i tambe akomodá tur bishitante. Un súplika ta bai na tur nos bishitantenan pa stashoná na un manera responsabel pa evitá ku Kuerpo Polisial lo por tou ku bo outo.
FFK a krea e posibilidat pa stashoná outo na Curaçao Festival Center kaminda lo tin seguridat pa bo auto, esaki pa evitá kualke inkumbiniensia. Tur nos fanátikonan ku opta pa para na Curaçao Festival Center ta wòrdu transportá ku Tuktuk pa Stadion Ergilio Hato entre 5’or di atardi pa 10’or di anochi.
Awe tambe nos lo tin nos tremendo ‘Fan-Zone’ na entrada di stadion, promé i despues di wega. Den e ‘Fan-Zone’ aki por disfrutá di bon músika, un tremendo bar ku kushina i weganan pa gana premionan atraktivo. For di 5’or nos ta warda un i tur den nos ‘Fan-Zone’ pa kalentá pa e weganan i despues di wega pa e ‘after-game’ na entrada di Stadion Ergilio Hato.
Nos selekshon ta kla, awor ta abo komo fanátiko so mester tei den stadion pa apoyá i sostené nos selekshon durante e partido desisivo kontra Saint Lucia aki!
Un tabla lo bula den Stadion Ergilio Hato awe wak pa bo tei!
